Монгол Улсын иргэн бүр Үндсэн хуульд зааснаар эрүүл, аюулгүй орчинд аж төрөх эрхтэй. Иргэн таны энэ эрх хэрхэн хангагдаж байна вэ. Гэрээсээ гадагшаа гарахад нөгөө л нэг байдал угтана. Гэрэлтүүлэг муутай, зам нь эвдэрсэн, түгжрэл нь утгаа алдсан, амраад суух газар цөөн, хүүхдийн тоглоомын олигтой талбайгүй зэргээр нэрлэх байх. Нэг л өглөө сэрэхэд байнгын зорчдог замыг нь хаачихна. Тэгснээ хаасныхаа дараа хаасан шүү гэдэг анхааруулга өгнө. Үүнээс ямар ч зохион байгуулалтгүйг л харж болох юм.

Уг нь зарим орнуудад зам хаахаар бол иргэдийн сэтгэл зүйг бэлдэж, хэдэн өдрийн өмнөөс урьдчилж мэдэгддэг юм билээ. Манайд бол эсрэгээрээ.

Дээр нь явган хүн аюулгүй зорчих зам байхгүй. Хэдэн зам нь хэмхэрсэн, заримыг нь хуулаад хаячихсан. Бүтэн улирал болоход хуулаастай хэвээрээ, ямар ч өнгө үзэмжгүй байсаар намартай золголоо.

Улаанбаатар хотын Захирагчийн ажлын албаныхан уг нь бидний ая тухтай байдлыг хангаж, амьдрах орчинг өөд татах үүрэгтэй хүмүүс шүү дээ. Хотын менежер та өөрийгөө рекламдаж цахим сүлжээгээр сэвж суухаар энэ мэт зүйлсэд анхаарал хандуулна уу!

А.Сүх