Улсын онцгой комисс, Нийслэлийн онцгой комиссын шийдвэрийн дагуу үйлчилгээний газрууд, ресторанууд, шөнийн цэнгээний газрууд журмын дагуу үйл ажиллагаагаа үргэлжлүүлж байгаа. Гэсэн ч манай улсад гарч байгаа коронавирусээр өвчилсөн тохиолдлууд буурахгүй, харин ч дельта хувилбар ихсэж байгаа нь эрүүл мэндийн салбарынхныг түгшээсээр байгаа.

Тэд үйлчилгээний газруудын үйл ажиллагааг хязгаарлах хүсэлтийг УОК, НОК-т тавьж байгаа ч энэ нь хэрэгжээгүй билээ. Харин Боловсрол, соёл, шинжлэх ухааны яамнаас сургуулийг долоо хоног танхимаар, долоо хоног цахимаар хичээллүүлэхээр шийдвэрлээд байгаа. Халдварлах магадлал бусад хувилбаруулаасаа өндөр дельта хувилбарын тохиолдол ихсэж байгаа энэ үед эрүүл мэндийн салбарынхны саналыг үл тоож, үйлчилгээний газруудын үйл ажиллагааг хязгаарлах шийдвэр гаргахгүй байгаад нь эмч, эмнэлгийн ажилчид, эрүүл мэндийн салбарынхан бухимдаж байгаа юм.

Тэдний нэг нь ХӨСҮТ-ийн дарга Л.Баттөр. Тэрбээр өөрийн твиттэр хуудсаараа дамжуулан "Бар, караоке нээлттэй байхыг зөвшөөрч байгаа бол сургууль нээхэд асуудалгүй шүү. Эрсдэл нь хаанаа илүү байгааг тунгааж бодно биз. Хаавал хоёуланг нь хаах ёстой байх" хэмээн үзэл бодлоо илэрхийлсэн юм.

С.Сүлд