Пунцоглин хийдэд эд өглөгийн Гуу сан болсон Гонгорын Намсрайн бумбан, Дүртэддагва, Жамсран бурханы тахилга энэ сарын 26-27-нд болно. Гонгор тэргүүтэн олон бурхдын үүднээс эрдэм үйлсийн мөн чанар болсон бумба бүтээх, тахих ёс эрт дээр үеэс уламжлагдан ирсэн байдаг билээ. Гонгорын бумбыг залсан айл гэр, хамт олны дунд бурханы шашин өнөд удаан орших, ахмад хөгшидийн нас уртса, үр хүүхэд нь эрүүл саруул, ухаан хурц, идэр залуусын ажил үйлс бүтэмжтэй байх аж.

Харин Намсрайн бурханыг тахин залснаар олон амьтны үгүйрэл хоосролын зовлонг арилгахыг бэлэгдэж гэр орон, сүм хийдэд бүтээн залж ирсэн билээ. Энэхүү бумбыг тахиваас өвчин зовлонгүй, нас буян цог учрал, хийморь золбоо, эд хөрөнгө, идээ ундаа, төгс эдлэл бүхэн хурах шалтгаан бүрдэх юм. Тэгвэл Дүртэддагва буюу цагаан сахиус нь хулгай дээрмийг номхотгогч хийгээд гарлага гарзын үүдийг хаагч бурхан болой. Энэхүү бурханыг тахиваас эр эмийн үхэл хагацал, гэнэтийн аюул осол, хулгай зэлгийг номхотгон дардаг бурхан ажээ.

Харин Жамсран бурхан нь нь Богд хаан болон Далай ламын хамгаалагч бурхан бөгөөд Богдын зарлигаар 1911 онд Буддын шашин догшин Чойжин сахиус Жамсран бурханыг цэргийн яамны шүтээн болгон залсан байдаг. Жамсран бурхан нь Чойжин сахиусууд дотроос ер бусын хүчин чадал, ид шидтэйн дээр мутартаа нум сум зэрэг зэр зэвсэг агсан, лагшиндаа хөө хуяг өмссөн, сугандаа суга таяг хавчуулж, маш олон цэрэг эрсээр хүрээлүүлсэн “Цэргийн баатар жанжин”-ы дүртэй, эрт цагаас Монголын Богд дээдсүүдийн шүтээн болж байсан учир тийнхүү цэргийн яамны шүтээн болгон залсан түүхтэй.