Зүрх судасны мэс засалч, анагаах ухааны доктор, гавьяат эмч Б.Болдсайхан эмч "Зүрх мартахгүй" төслийг эхлүүлэн Монгол Улсаа нар зөв тойрч, зүрхний өвчтэй, хагалгааны заалттай олон мянган хүүхдэд үзлэг оношилгоо, хагалгаа хийж, эрүүл болгож байгаа нэгэн билээ.

Тэрбээр хагалгааны мөнгө хангалттай байдаг бол олон мянган хүүхдийг эх орондоо оношилж, эмчлэх боломж байгаа гэдгийг хэлж, олон ч хүүхдийн амь насыг аварсан.

Тэрбээр саяхан хүртэл "Зам тээврийн сайд Л.Халтар "Авто машины “азын” буюу сонирхол татахуйц дугаарыг нээлттэй дуудлага худалдаагаар борлуулж олсон 2 тэрбум төгрөгийг "Хүүхдийн төлөө сан"-д хүлээлгэн өгсөн талаарх мэдээлэл цацагдсаны дараа "Зүрх мартахгүй” төслөөр зүрхний хагалгаанд орж буй хүүхдүүдэд энэнээсээ жоохон ч гэсэн өгч болдог бол… гадагшаа явж хэдэн зуун сая төгрөгөөр нэг хүүхэд хагалгаанд орж байхад бид энэ мөнгөөр бол 300 хүүхэд хагалгаа хийж эрүүл болгож туслана даа" хэмээж байв.

Тэгвэл Хөрөнгө оруулалтын чиглэлийн "Alpha Corp" ХХК болон "Elite Contour" брэнд хувцасны дэлгүүрийн үүсгэн байгуулагч, захирал З.Дархисүрэн төрсөн өдрөөрөө "Зүрх мартахгүй" төсөлд 10 сая төгрөг хандивлажээ. 

Тэрбээр энэ талаар "Энэ хорвоод төрсөн минь учиртай. Ковид тархалт маш идэвхтэй болзошгүй эрсдэл бүхий байдалд хэн хэнийг эрсдэлд оруулахгүй байх. Мөн залуу хүний арай өөр өнцөгөөр юмыг харах гэж хичээж яваагийнх энэ жилийн төрсөн өдрөө ингээд маш даруухан тэмдэглэчихлээ. Хүний тэр тусмаа бяцхан хүүхдийн амь насны төлөөх гэгээн бодлыг миний олон залуучууд зөвөөр харж хэрэгжүүлээсэй. Шал өөр хандлага буй болсоор л байгаа шүү" гэжээ.

Б.Баатар