Манай улсад коронавирусний халдвар хүнээс амьтанд халдварласан анхны тохиолдол бүртгэгджээ.  Энэ талаар ЗӨСҮТ-ийн дэд захирал Б.Амгаланбаяраас тодрууллаа.

Тэрбээр "Бид дэлхий дахинд коронавирусний халдвар илэрснээс хойш тандалт судалгаа хийж эхэлсэн. Тавдугаар сард халдвар авсан гэр бүлийн тэжээвэр муурнаас халдвар илэрч байсан. Түүнээс хойш буюу наймдугаар сарын зургааны өдөр Минж үржүүлгийн газарт халдварын шинж тэмдэг илэрч байж болзошгүй гэх мэдээлэл ирсэн. Энэ дагуу шинжилгээ хийхэд тухайн газарт ажиллаж байсан хүнээс халдвар илэрч улмаар 49 минжнээс долоон минж халдвар авсан болох нь тогтоогдсон. Энэ нь Монгол Улсын хувьд хүнээс амьтанд халдварласан анхны тохиолдол болж бүртгэгдэж байгаа юм. Халдвар авсан минжнүүдийг тусгаарлан эмчилсэн" гэлээ. 

Ташрамд өгүүлэхэд, Коронавирус нь олон төрөл, зүйлийн амьтанд өвчин үүсгэдэг. 2002 онд Хятад улсад SARS-CoV нь махчдын багийн муур хэлбэртэн болох Сивэт муур /civet cat/ хэмээх амьтнаас хүнд халдварласан бол 2012 онд MERS-CoV Саудын Араб улсад нэг бөхт тэмээнээс хүнд халдварласан. Коронавирус нь ихэнхдээ амьтанд түүний дотор сарьсан багваахай болон тэмээнд халдварладаг вирус боловч эдгээр амьтдаас хүнд халдварлаж өвчлөлийг үүсгэдэг байна. 

Зоонозын Өвчин Судлалын Үндэсний Төв (ЗӨСҮТ-өөс:

• Тэжээвэр амьтдаа тэврэх, арчлах, хооллохын өмнө болон дараа гараа сайтар угаах эсвэл халдваргүйжүүлэх
• Амьтад халдварт өртөхөөс сэргийлж, гэрийн эзэн, амьтан маллагч амны хаалт тогтмол зүүх
• Үүр, хэвтэр, хоолны сав зэргийг тогтмол цэвэрлэж, угаах, ялгадас хог хаягдлыг халдваргүйжүүлэх
• Амьтанд ханиадны шинж тэмдэг болон хоолонд дургүй болох, гүйлгэх зэрэг шинж тэмдэг илэрвэл харьяа мал эмнэлгийн газар, ЗӨСҮТ-д хандах
• Өөрт шинж тэмдэг илэрсэн эсвэл халдвар авсан бол өөрийгөө тусгаарлахыг зөвлөв.

Б.Баатар