УИХ-ын нөхөн сонгуулийн үеэр нэр дэвшигчид мөнгө тараасан, сонгогчдыг машинаар зөөсөн гэсэн асуудал яригдсан. Уг асуудлаар Сонгуулийн ерөнхий хороо ямар арга хэмжээ авч ажилласан талаараа мэдээлэл өглөө.

СЕХ-ны Хууль эрх зүйн хэлтсийн дарга Д.Бат-Эрдэнэ “УИХ-ын нөхөн сонгуулийн аравдугаар сарын 10-ны өдөр болсон санал хураалт болон аравдугаар сарын 16-ны өдөр болсон нэмэлт санал хураалтын явцад цагдаагийн байгууллагад нийт 62 өргөдөл, гомдол ирсэн. СЕХ-ны хувьд ямар нэгэн байдлаар сонгуулийн хууль тогтоомж зөрчсөн эсэхийг шалган шийдвэрлэх эрх хуулиар олгогдоогүй.

Үүнийг Зөрчил шалган шийдвэрлэх тухай хуульд зааснаар цагдаагийн байгууллага шалгаж, шүүх харьяаллыг нарийвчлан тогтоосон байдаг.

Дээрх гомдол, мэдээллийн нэг нь шийдвэрлэлтийн явцад байгаа. Бусад нь шийдвэрлэгдэж дууссан гэдэг мэдээллийг цагдаагийн байгууллагаас ирүүлсэн. Өргөдөл, гомдлын дийлэнх нь зурагт самбарыг урсан, алга болгосон, хуулсан гэдэг мэдээлэл эзэлж байна. Мөн мөнгө тарааж байгаа талаар мэдээллийг авсан. Уг асуудлаар цагдаагийн байгууллагаас шалгаад эрүүгийн хэрэг үүсгэхээс татгалзаж шийдвэрлэсэн” гэлээ.

А.Сүх