Эрүүл мэндийн яамнаас баасан гараг бүрд хийдэг ээлжит мэдээллээ хийлээ.

П.Н.Шастины нэрэмжит Улсын гуравдугаар төв эмнэлгийн дарга Ц.Төмөр-Очир “Улсын гуравдугаар төв эмнэлэг Эрүүл мэндийн сайдын тушаалаар өнгөрсөн дөрөвдүгээр сараас эхлэн ковид-ын хэвтүүлэн эмчлүүлэх үйлчилгээг хүлээн авч, тусламж үйлчилгээ үзүүлж байна. Энэ хугацаанд нийт 1800 гаруй иргэнд ковид-ын тусламж үйлчилгээ үзүүлээд байна. Нийт эмчлүүлж байгаа тохиолдоыг 18-20 хувь нь маш хүнд, хүндэвтэр нь 60-70 орчим хувийг эзэлж байна.

Эндээс үзэхэд ковид-ын хүнд нөхцөл байдал үргэлжилсэн хэвээр байна. Нас баралт буурахгүй байгаа нь архаг суурь өвчтэй хүмүүс дархлаа сэргээх тунд хамрагдах байдал хангалтгүй, нөгөөтээгүүр, иргэд халдвар хамгааллын дэглэмээ барихгүй байгаатай холбоотой байна.

Эрүүл мэндийн сайдын тушаалаар Эмнэлзүйн зөвлөх баг ажиллаж байгаа. Дотоодод халдвар бүртгэгдсэнээс хойш энэ багийн үйл ажиллагаа эрчимжсэн. Энэ баг эмчилгээ оношилгооны түр зааврыг шинэчлэн боловруулах, олон түвшинд хэрэгжиж байгаа арга аргачлал, ДЭМБ-аас гаргасан зөвлөмж зэрэгт үндэслэж үндэсний хэмжээний зааврыг боловруулахаас гадна 21 аймаг, 9 дүүрэгт мэргэжил арга зүйн зөвлөгөө өгдөг юм.

Иргэдийн хувьд эмнэлэг рүү шинжилгээ өгөхдөө бөөндөө явах зэргээр эрсдэлээ нэмэгдүүлж байна. Аль болох ганцаараа, зайлшгүй шаардлагатай үед нэг хүн дагаж явах зэргээр анхаарах хэрэгтэй байна. Мөн дархлаа сэргээх тунд хамрагдаагүй суурь өвчтэй иргэд хүнд хэлбэрээр өвдөх эрсдэлтэй байгаа учраас архаг суурь өвчтэй, 65-аас дээш насны иргэд гурав дахь тундаа зайлшгүй хамрагдах шаардлагатай” гэлээ.

А.Сүх