Монгол Улсаас БНХАУ-ын Эрээн хотод суугаа консулын газраас нэгэн шуурхай мэдээг амралтын өдрөөр Гадаад харилцааны яаманд ирүүлсэн нь Хятадын талаас боомтын асуудлаар “Түр цагийн журам” нэртэй төлөвлөгөөг Монголын талд танилцуулсан тухай байлаа.

Эрээн хотын Улс төрөөр зөвлөлдөх зөвлөлийн дарга Цогзол яаралтай уулзах хүсэлт Монголын талд тавьсны дагуу энэ уулзалт 2021 оны арваннэгдүгээр сарын 13-ны өдөр болсон байна.

Уулзалтад Монгол Улсын талаар Эрээн хотод суугаа консул Т.Мөнхгэрэл, дэд консул Э.Түвшинбаяр, дэд консул Ж.Дашням, Хятадын талаас Эрээн хотын Улс төрөөр зөвлөлдөх зөвлөлийн дарга Цогзол, АЗГ-ын Гадаад харилцааны албаны дарга Нарсу, тасгийн дарга Ци Жуанжу, Боомтын захиргаа, худалдааны газрын дарга Мөнхөө нар оролцжээ.

Уулзалтаар Хятадын тал хамгийн багадаа 20 хоногийн дараа хил хоорондын ачаа тээврийг эхлүүлэх тухай "Түр цагийн журам" нэртэй төлөвлөгөөг танилцуулжээ. Тухайн саналыг Монголын тал хүлээж авахгүй бол дараагийн шатны хэлэлцээ, холбогдох шатны байгууллагуудаас зөвшөөрөл авах зэргээр ойрын таван сарын хугацаанд хил нээх боломжгүйг анхааруулжээ. Ийм “тулгалт”-тайгаар тавьсан Хятадын талын дөрвөн үндсэн саналыг танилцуулъя.

Нэгдүгээрт,

-Хятадын талын урьд нь тавьсан саналын дагуу хилийн тэг цэгт чингэлэг шилжүүлэх ачих талбайг Хятадын хөрөнгө оруулалтаар байгуулж, өдөрт нэг талдаа 50 чингэлэг солилцох,

-Чингэхдээ үдийн өмнө Хятадын талаас ачаатай чингэлгийг талбайд хүргэн, хоосон буцах,

-Үдийн хойно Монголын тал мөн зарчмаар чингэлэг сольж, хүн хооронд харилцаа үүсгэхгүйгээр тээвэрлэх,

-Явцаас хамаарч чингэлгийн тоог дэс дараатайгаар нэмэгдүүлэх

Хоёрдугаарт,

-Чингэлэгт багтахгүй овор ихтэй ачааг хоёр талаас нэг стандартын тодорхой тооны машин гаргаж толгой солих байдлаар шийдвэрлэх. Ийм төрлийн ачаа харьцангуй цөөн бөгөөд энэ зохион байгуулалтыг хоёр талын Боомтын зөвлөл харилцан тохирч чингэлэг тээврийг түр зогсоон мөн дээрх зарчмаар хэрэгжүүлэх

Гуравдугаарт,

-Чингэлгийн түрээсийн зардал, дундын талбайн ариутгалыг Хятадын тал бүрэн хариуцах.

-Монголын талын калмарыг Монгол тал өөрсдөө хариуцах, /Калмарыг Хятад талаас түрээслэх бол 1 жилийн түрээсийн төлбөр 800 мянган юань байна/

Дөрөвдүгээрт,

-Эрээнд байгаа 31 жолоочийг хил нээсэн даруйд Монгол руу буцааж, Хятад талын тээврийн хятад жолоочоор хийлгэх.

-Хятадын тал тэг цэг хүртэл тээвэр хийх жолооч нарыг сонгон шалгаруулж, 14 хоног тусгаарлалтад байлгасны дараа ажилд гаргана.

Эдгээр саналыг тавьсан Хятадын тал 2021 оны арваннэгдүгээр сарын 15-ны 12.00 цагаас өмнө албан ёсны хариугаа өгөхийг хүссэн байна. Энэ хугацаа нь өчигдөр байсан бөгөөд Гадаад харилцааны яам, Эрээн дэх Монголын консулын газраас ямар хариу өгсөн талаар бид удахгүй хүргэх болно.

О.Балдан-Очир