Амьдрал гэдэг урт замын богинохон хугацаанд бид амьдарч байна. Амьдралд ирээд өөрийгөө бусдаар хүндлүүлж, хайрлуулаад буцна гэдэг хэн болгонд тохиох аз биш билээ. Тэгвэл бид шинэ оны босгон дээр 2022 онд хорвоог орхин одсон, бидний сэтгэл зүрхэнд үүрд үлдэх 24 алдартанг дурсан, танилцуулж байна. 

1. Робби Колтрейн, 72 настай

Шотландын жүжигчин Робби Колтрейн нь “Харри Поттер” киноны Хагридын дүрийг бүтээснээрээ алдартай. Тэрбээр 1993-1995 онд гарсан "Cracker" телевизийн шоуны гол дүрээрээ Британийн телевизийн Академийн шагналыг (BAFTA) гурван удаа хүртсэн. Мөн 1995 онд Жеймс Бондын тухай "Golden Eye", 1999 онд "The World Is Not Enough" кинонд тоглож, 2011 онд Шотландын BAFTA-ын шилдэг амжилтын шагналыг хүртсэн юм. Робби Колтрейн 10 дугаар сарын 14-нд 72 насандаа таалал төгссөн.

2. Анжела Лансбери, 96 настай

Анжела Лансберигийн жүжигчний карьер 1942 онд "Gaslight" киноноос эхэлж, Оскарт нэр дэвшиж байжээ. Тэрбээр "The Manchurian Candidat", "Beauty and the Beast" зэрэг кинонд тоглосон.  Мөн 2013 онд Оскарын хүндэт шагнал хүртсэн бөгөөд нийт зургаан удаагийн Алтан бөмбөрцөг шагналын эзэн. Лансбери 1984-1992 онуудад үргэлжилсэн "Murder She Wrote" телевизийн шоунд тоглож, Эммигийн шагналд 18 удаа нэр дэвшиж байжээ. Лансбери аравдугаар сарын 11-нд 96 насандаа таалал төгссөн билээ.

3. Кулио, 59 нас

Кулиогийн анхны цомог болох "It Takes a Thief"  1994 онд гарч, "Fantastic Voyage" дуу нь Billboard чартад гуравт орж байв. Түүний дараагийн ижил нэрт цомогт багтсан "Gangsta's Paradise"  дуу нь нэгдүгээр байрт орж, 1996 онд Грэммигийн шилдэг бие даасан рэп үзүүлбэрийн шагналыг хүртсэн. Уг дуу нь олны хайр, талархлыг хүртсэн шилдэг уран бүтээл билээ. Тухайн жилд тэрбээр Америкийн хөгжмийн шагналыг “олны дуртай рэп/хип-хоп уран бүтээлч” төрөлд  хүртсэн. Кулио есдүгээр сарын 28-нд 59 насандаа Лос Анжелес хотод таалал төгссөн билээ.

4. Хатан хаан II Елизавета, 96 нас

Хатан хаан II Елизавета 70 жил хаан ширээнд суусан нь Британийн хаант засаглалын түүхэн дэх хамгийн урт хугацаа юм. Тэрбээр 1952 онд 25 настайдаа хаан ширээнд сууж, Английн 15 Ерөнхий сайдыг удирдаж, АНУ-ын сүүлийн 14 ерөнхийлөгчийн 13-тай нь уулзсан байдаг.  Мөн тэр 1947 онд хунтайж Филиптэй гэрлэж,  2021 онд нас барах хүртэл нь 73 жил ханилжээ. Хатан хааны гэр бүл,  дэлхийн хоёр дайн, тэр дундаа дэлхийн улс орнуудын үймээн самууныг хянаж байсан хатан хаан амьдралынхаа туршид  сайн удирдагчийн үүргийг тууштай гүйцэтгэсэн. Хатан хаан II Елизавета есдүгээр сарын 08-нд 96 насандаа таалал төгссөн юм.

5. Михаил Горбачев, 91 нас

ЗХУ-ын ерөнхийлөгч асан Михаил Горбачев Орос, Барууны хоорондох төмөр хөшгийг нээж, хүйтэн дайныг зогсоосны төлөө Нобелийн энх тайвны шагнал хүртэж байв. Тэрбээр ерөнхийлөгч Рональд Рейгантай хамтран цөмийн зэвсгийн уралдааныг удаашруулахын зэрэгцээ коммунист улс орны доторх хязгаарлалтыг сулруулж, нээлттэй байдал, бүтцийн өөрчлөлтийг хийж, ардчилалд хөтөлхийг эрмэлзэж байв. Горбачев нь Афганистанаас Зөвлөлтийн цэргийг гаргаж, Берлиний ханыг нураахад чухал үүрэг гүйцэтгэсэн нэгэн. Тэрбээр наймдугаар сарын 30-нд 91 насандаа таалал төгссөн билээ.

6. Энн Хэче, 53 настай

Жүжигчин Энн Хэче телевиз, кино, дэлгэц болон Бродвэй театрт тоглож, "Gracie's Choice" телевизийн киногоороо  Эммигийн шагнал, "ХХ зуун" жүжгээрээ Тонигийн шагналыг  тус хүртэж байсан. Тэр "Намайг галзуу гэж дууд" хэмээх дурсамж номдоо бага насандаа хүчирхийлэлд өртөж байсан тухайгаа бичсэн байдаг. Хэче Лос-Анжелес хотод автомашины ослоор хүнд бэртэл авч, наймдугаар сарын 12-нд нас баржээ.

7. Билл Рассел, 88 нас

"NBA-ийн түүхэн дэх хамгийн агуу тоглогч" хэмээн өргөмжлөгдсөн Билл Рассел 6 фут 9 инч өндөр байсан нь түүнийг сагсан бөмбөгийн талбайд домогт статустай болоход хүргэсэн гэдэг. Карьерынхаа туршид таван удаагийн MVP, 12 удаагийн Бүх Оддын шагналыг хүртсэн. Рассел 1960-аад онд Бостон Селтикс багт тоглож, 11 удаа аварга болсон юм. Тэрбээр 2022 оны долдугаар сарын 31-нд 88 насандаа нас барсан.

Японы Ерөнхий сайдаар хамгийн удаан ажилласан Шинзо Абэ дэлхийн хоёрдугаар дайны дараа энх тайванч үзлээр эх орноо сэргээж, эдийн засгаа мандуулахын төлөө олон жил  ажилласан. Абэ Японы олон улсын харилцааг шинэ түвшинд гаргаж чадсан билээ. Түүнийг дэлхий дахинд хамгийн нөлөө бүхий энх тайвныг эрхэмлэгч  гэцгээдэг байв. Абэ долдугаар сарын 08-нд ард иргэдтэй уулзалт хийх үеэр гар хийцийн буутай этгээдийн гарт алагдсан.

9. Жеймс Каан, 82 нас

Жеймс Каан нь 1963 онд "Ирма ла Дус" кинонд тоглосон. Тэрбээр 1971 онд гарсан "Брайаны дуу" телевизийн кинонд зүрх шимшрүүлэм үзүүлбэр үзүүлж, Эммигийн шагналд нэр дэвшиж байжээ. 1972 онд тэр "Загалмайлсан эцэг" кинонд Сантино "Сонни" Корлеонегийн дүрд тоглосноор шилдэг эрэгтэй туслах дүрийн номинацид нэр дэвшиж байлаа. Тэрбээр 1974 онд "Загалмайлсан эцэг: II кинонд дахин тоглосон  бөгөөд  1990 онд гарсан "Зовлонт", 2003 онд гарсан "Элф" кинонд бүтээсэн дүрээрээ олонд танигдсан юм.  Каан долдугаар сарын 06-нд 82 насандаа таалал төгсөв.

10. Takeoff, 28 нас

Жинхэнэ нэр нь Кирсник Хари Болл юм. Тэрбээр Ouavo, Offset нартай хамтарсан хип хоп гурвал буюу “Мигос” хамтлагийн нэг хэсэг байсан. Мигос нь 2013 онд "Versace" дуугаараа алдартай болсон юм. Тус хамтлаг Ники Минаж, Карди Би нартай хамтарсан "Motosport" зэрэг хит дуугаараа алдартай. Болл нь Грэммид олон нэр дэвшсэн уран бүтээлчдийн нэг билээ.  Тэрбээр 11 дүгээр сарын 01-нд Хьюстон хотын төвд 28 насандаа буудуулж амиа алдсан юм.

11. Аарон Картер, 34 нас

"Backstreet Boy" хамтлагийн гишүүн Ник Картерын дүү, дуучин Аарон Картер 1997 онд анхны бие даасан цомгоо гаргаснаар есөн настайдаа алдар нэрд  хүрсэн. Ихэнхдээ ахынхаа хамтлагтай аялан тоглолтоор явдаг  байсан Картер насанд хүрсэн хойноо ч хөгжмийн карьераа үргэлжлүүлсэн билээ. Улмаар тэр ахтайгаа таарамжгүй харилцаатай байсаар 2022 оны арваннэгдүгээр сарын 05-нд гэртээ нас баржээ.

12. Кевин Конрой, 66 нас

Кевин Конрой нь 1992-1995 онд "Batman: The Animated Series", 1993 онд "Batman: Mask of the Phantasm", 1999-2001 онд "Batman Beyond" зэрэг киноны Бэтмэний дуу хоолой байсан. Кевин Конрой арваннэгдүгээр сарын 10-нд 66 насандаа таалал төгсөв.

13. Боб МакГрат, 90 нас

Боб МакГрат нь 1969 онд нээлтээ хийсэн "Sesame Street" хүүхдийн телевизийн үүсгэн байгуулагч, хүүхэлдэйн жүжигчин гэдгээрээ алдаршсан. МакГрат бараг 50 жилийн турш хүүхдийн шоуны зохион байгуулагчийн үүрэг гүйцэтгэжээ. Тэр бол жүжигчин, хүүхдийн зохиолч, хөгжимчин нэгэн бөгөөд түүний тенор хоолой дэлхийн өнцөг булан бүрд агаарын долгион, концертын танхимуудад сонсогддог байсан гэж хэлж болно. Тэрбээр 12 дугаар сарын 04-нд 90 насандаа хорвоог орхисон юм.

14. Жерри Ли Льюис, 87 нас

Жерри Ли Льюис нь 1956 онд “Sun Records”-той гэрээ байгуулж, анхны хит дуу болох "Whole Lotta Shakin" уран бүтээлээ 1957 онд олны хүртээл болгосон. Тэр жилдээ "Great Balls of Fire" дуугаараа дахин хит болж байжээ. Тэрбээр зэрлэг, тэрслүү тоглолтын арга барил, тайзны дүрээрээ алдартай байв. Улмаар 2019 он хүртэл уран бүтээл үргэлжлүүлж, аялан тоглолтоо хийсэн юм.

15. Тим Пэйж, 78 нас

Домогт дайны гэрэл зурагчин Тим Пэйж 1960-аад оны Вьетнамын дайны тухай сурвалжлагаараа алдаршсан нэгэн. Их Британид төрсөн Пэйж 1965 онд 20 настайдаа Вьетнамд ирсэн бөгөөд дайныг сурвалжилж байхдаа дөрвөн удаа шархаджээ. Зан чанар нь түүнийг "Apocalypse Now" кинонд  гэрэл зурагчин Деннис Хопперын дүрд тоглоход голчлон нөлөөлсөн гэдэг.  Мөн Майкл Херри  Пэйжийг Вьетнамын дайны тухай бичсэн "Диспетчүүд" хэмээх номондоо дурдсан байдаг. Тэрбээр 78 насандаа, наймдугаар сарын 24-нд Австрали дахь гэртээ хорт хавдраар нас баржээ.

16. Жэймс Уинберн, 85 нас

1978 онд бүтээгдсэн анхны “Halloween” киноны гол дүр болох Майкл Майерсийн дүрээр олноо танигдсан Жэймс Уинберн 11 дүгээр сарын 19-нд тодорхойгүй  өвчний улмаас 85 насандаа хорвоог орхижээ. Тэрбээр мөн “ Чарли Чан ба Луугийн хатан хааны хараал”, “Кагни & Лэйси”, “Анчин”, “Шулмын арал” зэрэг шоу, кинонд тоглосон. Мөн тэр гурван кино найруулж байв.

17. Ким Ми Сү, 29 нас

“The Snowdrop”-ийн жүжигчин Ким Ми Сүг  энэ оны нэгдүгээр сарын 05-ны өдөр тодорхойгүй шалтгааны улмаас нас барсныг зарласан юм.  Тэрбээр “Disney+” кино компанийн “The Snowdrop” цувралд оюутны идэвхтэн Ео Жун Миний дүрийг бүтээж, нэрд гараад байсан билээ.

18. Тихч Нат Хан, 95 нас

Буддын шашны нөлөө бүхий лам, энх тайвны төлөө тэмцэгч Тихч Нат Хан энэ оны нэгдүгээр сард  95 насандаа таалал төгссөн юм. Вьетнамын дайны үеэр сүм хийдэд бясалгах, дайнд нэрвэгдсэн хүмүүст тусламж үзүүлэх эсэхээ шийдэж чадалгүй, хоёуланг нь зэрэг хийхээр шийдсэн гэдэг.  Ингэснээр  тэр “Engaged Buddhizm” хөдөлгөөнийг үүсгэн байгуулж, энх тайвны төлөө тэмцэгч болсон юм.

19. Роббинс, 65 нас

"Peanuts"-ын  анхны хүүхэлдэйн киноны Чарли Брауны дүрийн жүжигчин Роббинс 65 насандаа таалал төгсөв. Жинхэнэ нэр нь Луис Г.Нанаси байсан Роббинс 1956 онд Лос Анжелес хотод төрсөн бөгөөд 1965 онд Чарли Брауны дууг оруулж, цувран гарсан удаах кинонуудад дуу оруулж, олны танил болсон нэгэн.

20. Грант Вал, 49 нас

АНУ-ын хамгийн алдартай хөлбөмбөгийн сэтгүүлчдийн нэг болох Грант Вал энэ сарын 10 болсон Аргентин, Нидерландын шигшээ багуудын тоглолтыг сурвалжилж байхдаа нас барсан юм.  Түүний хажууд сууж байсан АНУ-ын хэвлэл мэдээллийн ажилтнуудын мэдээлснээр тоглолтын нэмэлт цагийн үеэр тэр суудал дээрээ ухаан алдаж унасан бөгөөд эргэн тойронд нь байсан ажилтнууд яаралтай түргэн тусламж дуудан хариу арга хэмжээ авсан ч эмнэлгийн ажилтнууд түүнийг нас барсан гэж мэдэгдсэн байна.

21. Жон Энистон, 89        

 “Former Days of Our Lives” киноны од, Холливудын нэрт жүжигчин Женнифер Энистоны аав Жон Энистон арваннэгдүгээр сарын 11-нд 89 насандаа таалал төгссөн юм.  Тэрбээр 1933  онд Грекийн Грет хотноо мэндэлжээ.  Жон 1985 онд бүтээгдсэн олон ангит кинонд Виктор Кириакисийн дүрд тоглосон бөгөөд 36 жилийн турш уг дүрийг бүтээснээрээ алдартай.

22. Тони Браун, 55 нас

NBA-д хамгийн удаан буюу 20 жил ажилласан шүүгч  Тони Браун 55 насандаа нойр булчирхайн хорт хавдраар нас барсан билээ. 2021 оны эхээр өвчинтэйгөө тэмцэж эхэлсэн тэрбээр талбайдаа эргэн ирэхийн тулд маш олон эм тариа хэрэглэж байжээ. Түүний үхлийн дараа хамгийн ихээр гашуудсан хүн бол Лос Анжелес Лейкерс багийн тоглогч Леброн Жеймс юм. Учир нь тэд сайн найзууд байсан ажээ.

23. Лесли Жордан, 67 нас

Лесли Жорданыг нас барсан тухай мэдээ 10 дугаар сарын 24-нд цацагдаж, жүжигчний шүтэн бишрэгчдийг цочирдуулсан юм. Тэрбээр “Ally McBeal,” “Desperate Housewives,” “American Horror Story” зэрэг телевизийн цуврал, шоунд тоглож, алдарт хүрсэн нэгэн. Мөн тэр 1996 онд “Sordid Lives”, “Southern Baptist Sissies” зэрэг жүжигт тоглож, Бродвэйгээс гадуурх “Southern Blindness”, “Like a Dog on Linoleum” зэрэг шоугаараа олны хайртай жүжигчин болсон юм.  Лесли Жордан аравдугаар сарын 24-нд 76 насандаа таалал төгссөн.

24. Адалия Роуз Уильямс, 15 нас 

Хатчинсон-Гилфордын прогерийн хам шинжтэй гэдгддэг YouTube-ийн од Уильямс энэ оны нэгдүгээр сард 15 насандаа хорвоогоос явсан. Тэрбээр YouTube-д өөрийн амьдралын өдөр тутмын хөгжилтэй мөчүүдийг оруулдаг бөгөөд олны хайр хүндлэлийг хүлээсэн нэгэн байв. 

Л.Сайнаа

Амьдрал гэдэг урт замын богинохон хугацаанд бид амьдарч байна. Амьдралд ирээд өөрийгөө бусдаар хүндлүүлж, хайрлуулаад буцна гэдэг хэн болгонд тохиох аз биш билээ. Тэгвэл бид шинэ оны босгон дээр 2022 онд хорвоог орхин одсон, бидний сэтгэл зүрхэнд үүрд үлдэх 24 алдартанг дурсан, танилцуулж байна.