БАРИМТ 1
Рустам Оружов нь 1991 оны аравдугаар сарын дөрвөнд тухайн үеийн Зөвлөлт Холбоот Улсын Иркутск дахь Усть-Илимск гэх хотод мэндэлжээ.
БАРИМТ 2
Тэрбээр анх долоон настайгаасаа жүдо бөхөөр хичээллэж эхэлсэн бөгөөд 16 нас хүртлээ Иркутскт бэлтгэл хийснийхээ эцэст эцэг эхийнхээ төрөлх Азербайжан улсын нийслэл Баку хот руу нүүж суурьшсан.
БАРИМТ 3
Бага наснаасаа спортод авьяастай байсан түүний хувьд жүдо бөхийн төрлөөрөө Евро-Азийн аварга болж байсан ба насанд хүрэгчдийн ангилалд анх -66 кг жинд барилддаг байсан.
БАРИМТ 4
Гэвч тун удалгүй 2011 онд өөрийн үндсэн жин болох -73 кг-д барилдаж эхэлснээр Европын Цомд оролцож мөнгөн медаль хүртсэн. Энэ нь түүний олон улсын тацанд гаргасан олон ололт амжилтуудын эхлэл нь байв.
БАРИМТ 5
2012 онд нутгийнхаа дэвжээн дээр Бакугийн Гранд Сламд түрүүлсэн тэрбээр Европын Жүдо Бөхийн Холбооны олгодог тивийн эрхээр Лондонгийн олимпд оролцсон. Энэ нь түүний замналынхаа турш тамирчны хувиар оролцох гурван олимпын эхнийх нь байсан ба хоёрдугаар тойрогт тухайн олимпын аварга ОХУ-ын тамирчин Мансур Исаевт ялагдал хүлээсэн.
БАРИМТ 6
Олимпын дараа Азербайжан улсын хуулийн дагуу иргэний хувьд хүлээсэн үүргээ биелүүлж цэргийн албанд татагдсан бөгөөд 2013 онд албанаас чөлөөлөгдсөн. Ойрын хугацаанд тэмцээнд оролцоогүй түүний хувьд тавдугаар сард зохиогдсон Бакугийн Гранд Сламд түрүүлснээр маш богино хугацаанд дахин амжилт үзүүлсэн.
БАРИМТ 7
Рустам Оружов нь 2015 онд Марокко улсын Рабат хотод зохион байгуулагдсан чансаа өндөр бөхчүүд оролцдог Мастерс тэмцээнд түрүүлснээр тухайн цаг үеийнхээ -73 жингийн хамгийн шилдгүүдийн нэгээр албан ёсоор нэрлэгдэх болсон.
БАРИМТ 8
Улмаар 2016 онд Европын аварга болсон тэрбээр Рио Де Жанейрогийн олимпд тун хүлээлт өндөртэй очсон. Рустам Оружов үзэгчдийн хүлээлтэд хүрэхүйц барилдааныг үзүүлж Казахстан, Астрали, Унгар, Израилийн бөхчүүдийг ялсаар алтан медалийн төлөө барилдаж Олимпын хошой, дэлхийн гурван удаагийн аварга Шохей Оногийн эсрэг ялагдал хүлээсэн.
БАРИМТ 9
Улмаар Рустам Оружов 2017 оны ДАШТ-д өөрийн оргил үе дээрээ очсон боловч аваргын төлөөх барилдаанд Японы -73 жингийн өөр нэгэн аварга болох Сойчи Хашимотод ялагдаж олимп дэлхийн мөнгөн медальтан болсон.
БАРИМТ 10
Тухайн ДАШТ-ий финалд шалгарахын тулд Рустам Оружов нь эхний тойрогт Европын аварга Косовогийн Акил Гяковаг, хоёрдугаар тойрогт Европын аваргын хүрэл медальт Францын Пьер Дупраг, гуравдугаар тойрогт Мстерсийн мөнгөн медальт, самбо бөхийн дэлхийн аварга Тажикистаны Бехрузи Хожазодаг, хэсгийн аваргын төлөө 2015 оны Улаанбаатар Гранд Пригийн аварга БНХАУ-ын Сайнжаргалыг, хагас шигшээд дэлхийн аварга БНСАУ-ын Ан Жан Римийг тус тус буулган авсан.
БАРИМТ 11
2018 оны ДАШТ Азербайжан улсын Баку хотод зохиогдоход Рустам Оружовын эх орондоо дэлхийн аварга болох мөрөөдөл хэсгийн аваргын төлөө барилдах эрхийн төлөөх барилдаан буюу шөвгийн 16 дээр 2022 оны дэлхийн аварга Ц.Цогтбаатарын эсрэг хийсэн барилдааны дараа нуран унасан.
БАРИМТ 12
ДАШТ-ээс хойш зохион байгуулагддаг том тэмцээн бол яах аргагүй Мастерс. Уг тэмцээнд Рустам Оружов амжилттай барилдаж түрүүлснээр Азербайжаны багийн цор ганц медалийг хүртсэнээс гадна Мастерс тэмцээний аварга болсон.
БАРИМТ 13
Тэрбээр дэлхийн аварга болох мөрөөдлөө хадгалсаар 2019 оны Токиогийн ДАШТ-д зодоглосон. Рустам Оружов бүх өрсөлдөгчдөө буулган авсаар алтан медалийн төлөө шалгаран үлдсэн ч түүнийг Шохей Оно хүлээж байв. Уг барилдааны эцэст Шохей Оно дэлхийн гурван удаагийн аварга болж Рустам Оружов дэлхийн аваргын хошой мөнгөн медальтай болсон.
БАРИМТ 14
Рустам Оружов нь ганцаарчилсан төрөлд Олимпын наадмаас мөнгөн медаль, ДАШТ-ээс хошой мөнгөн медаль, Европын наадмаас мөнгөн медаль, Европын аваргын алт, гурван хүрэл медаль, Мастерсийн алт, гурван хүрэл медаль, Гранд Слам тэмцээнүүдээс гурван алт, гурван мөнгө, 10 хүрэл медаль, Гранд При тэмцээнүүдээс таван алт, дөрвөн мөнгө гурван хүрэл медаль тус тус хүртэж байжээ.
БАРИМТ 15
Азербайжан улсын үндсэн спорт бол жүдо бөх гэхэд буруудахгүй. Үүний илрэл болж Рустам Оружов 2020 оны Токиогийн олимпын наадмын нээлтийн үйл ажиллагааны үеэр Азербайжаны багийн тугийг барьж алхсан ба уг олимп нь түүний тамирчны хувиар оролцох сүүлийн олимп байв.
БАРИМТ 16
Токиогийн олимпд Рустам Оружов эхний тойрогт гоц мөргөж, хоёрдугаар тойрогт ДАШТ-ий хошой хүрэл медальт Муса Могушковыг, гуравдугаар тойрогт Азийн аваргын мөнгөн медальт Тажикистаны Сомон Махмадбековыг ялж хэсгийн аваргын төлөө барилдах эрхтэй болсон.
БАРИМТ 17
Хэсгийн аваргын төлөө өнөөх л Шохей Оногийн эсрэг нүүр тулах болов. Барилдааны төгсгөлд ялдаггүй хүнийг ялдаггүй л юм байна гэдгийн адилаар Шохей Оно иппон үнэлгээгээр барилдааныг дуусгаж олимпын хошой аварга болох зорилгодоо нэг алхам ойртсон бол Рустам Оружовын олимпын аварга болох мөрөөдөл талаар болов.
БАРИМТ 18
Дагах барилдаанд Рустам Оружов 2016 оны олимпын эхний тойрогт барилдаж байсан Косовогийн Акил Гяковаг ваза-ари үнэлгээгээр ялж хүрэл медалийн төлөө БНСАУ-ын Ан Чан Римийн эсрэг ялагдал хүлээж шагналт тавдугаар байранд шалгаран үлдсэн.
БАРИМТ 19
Тэрбээр замналынхаа турш Шохей Оногийн эсрэг 2016 оноос хойш нийт зургаан удаа таарч барилдсан ба нэг ч удаа түүнийг ялж байгагүй. Ингэхдээ олимпын наадамд хоёр удаа, ДАШТ-д нэг удаа түүнд ялагдсан. Мөн тэрбээр Японы Сойчи Хашимото аваргын эсрэг дөрвөн удаа барилдаж нэг ч удаа ялалт байгуулж үзээгүй.
БАРИМТ 20
Харин түүний хамгийн олон удаа учраа таарч барилдсан бөх бол Гүржийн олимп дэлхийн аварга Лаша Шавдатуашвили аварга юм. Тэд хоорондоо нийт 11 удаа таарч барилдсан ба есөн удаад нь Рустам Оружов ялалт байгуулж байжээ. Барилдааны хэв маяг болон бие бялдрын хувьд ойролцоо, ижил Европ тивийн нэгэн үеийн шилдэг тамирчид тул ийм олон удаа хоорондоо барилдсан байна.
БАРИМТ 21
Харин одоо Рустам Оружов Монгол улсын тамирчдын эсрэг хэрхэн барилддаг байсан талаар мэдээлэл хүргэе. Дэлхийн аварга Ц.Цогтбаатарын эсрэг гурав барилдаж хоёр удаа, ДАШТ-ий хүрэл Медальт МУГТ Г.Одбаярын эсрэг зургаа барилдаж гурван удаа, Олимпын хүрэл медальт МУГТ С.Ням-Очирын эсрэг хоёр барилдаж нэг удаа тус тус ялалт байгуулж байжээ.
БАРИМТ 22
Өдгөө 31 настай 180 см өндөртэй түний хувьд жин хасаж -73 кг жинд тогтмол барилдах нь амаргүй болж эхэлсэн. Тийм учраас тэрбээр Токиогийн олимпын дараа зарим тохиолдолд жин өгсөж -81 кг жинд барилдаж байв. Мөн түүний үндсэн жин болох -73 кг жинд Азербайжан улсаас Хидаят Хейдаров гэх ДАШТ-ий гурван хүрэл медальтай шилдэг жүдоч барилдаж байгаа тул түүний залгамж халаа найдвартай хүний гарт орсон гэж хэлж болно.
БАРИМТ 23
Рустам Оружов он гарснаас хойш Португалийн Гранд При, Тель Авивийн Гранд Слам, Тблисийн Гранд Слам гэх гурван тэмцээнд оролцсон ч медаль хүртэж чадахгүй явсаар ийнхүү зодог тайлж байна. Тэрбээр 2022 оны долдугаар сард Унгарын Гранд Сламд хүрэл медаль хүртсэн нь түүний тамирчны хувиар хамгийн сүүлд хүртэж буй медаль нь болж байна.
БАРИМТ 24
Рустам Оружов нь хамгийн их хөрөнгөтэй жүдочдын нэг бөгөөд түүний нийт хөрөнгө нь 1.5 сая ам доллар. Мөн тэрбээр гэр бүлийнхээ мэдээллийг олон нийтэд зарлаад байдаггүй ба нэг охин, нэг хүүтэй.
Сэтгэгдэл (2)