БАРИМТ 1
Тэр архитектурч мэргэжилтэй. Гэхдээ хэзээ ч мэргэжлээрээ ажиллаж байгаагүй, цаашид ч ажиллахгүй. Мэргэжил сонгох үед шугам зураг, физик гэсэн хичээлдээ сайн байсан учраас сайн бодолгүйгээр сонгочихсон хэрэг.
БАРИМТ 2
Удалгүй сонгосон мэргэжил нь тохирохгүй гэдгийг ухаарчээ. Тэр үед "Soul-o" болон "HYP" продакшнтай хамтарч, хөгжим хийхэд цагаа зарцуулж эхэлсэн гэдэг.
БАРИМТ 3
Хөгжим, уран бүтээл хийж, өнгөрүүлэх цаг хугацаа түүнд хамгийн үнэ цэнтэй, бүтээлч, сайхан мэдрэмжүүдийг өгсөн гэдэг. Дуу зохиох авьяастайгаа мэдсэнээс хойш илүү хөгжүүлж явахыг амьдралынхаа нэг зорилго болгосон.
БАРИМТ 4
Тэр дуу хийхдээ нэлээн няхуур ханддаг. Энгийн биш үг бүрийнх нь цаана утга агуулдаг байхыг зорьдог гэнэ.
БАРИМТ 5
"1 2 3 ий, 1 2 3 ий" гээд л гитартай дуулж байхыг нь та харсан л байх. Тэгвэл тэр уг дуугаа гэртээ сууж байхдаа гитар дээр шууд зохиож байжээ.
БАРИМТ 6
Түүний цомгоос сэдэвлэн, түүнд зориулсан Намуухан хэмээн уран сайхны кино 2019 онд нээлтээ хийж байсан бөгөөд өөрөө гол дүрийг нь бүтээж байсан юм.
БАРИМТ 7
“2 odds" дуугаа тэр цар тахлын хөл хорионы үеэр найзуудтай нууцаар уулзаж байсан үеэсээ санаа авч зохиосон гэнэ. Зохиосон үеэсээ хоёр жилийн дараа сонсогчдод хүргэсэн нь 2023 он.
БАРИМТ 8
Тэр "Намуухан" цомгоос хойш хэсэг компаниудын захиалгат дуун дээр ажилласан.
БАРИМТ 9
Гэтэл амьдралд нь томхон эргэлтийн цэг гарч ирсэн нь зүүн, баруун чих дараалан сонсох чадвараа алдсан явдал байлаа. Хамгийн сайн хийж чаддаг дуу хөгжмөө дахиж хийж чадахгүй болов вий гэхээс тэр үнэхээр их айсан. Хэдэн сар эмчилгээ хийлгэснийхээ дараа дахин уран бүтээлийнхээ ажилдаа орохдоо захилгын дуу бус өөрийн уран бүтээл дээр түлхүү ажиллахаар шийдсэн ажээ.
БАРИМТ 10
"Дууныхаа үгийг зохиох нь сэтгэлд илүү хүрдэг. Шинэ дуу зохиох нь миний хувьд шинэ сорилт шиг л байдаг. Би сорилт, өрсөлдөөнд их дуртай. Сорилтыг хүлээж аваад ялсан ч, хожигдсон ч нэг шинэ зүйл сурна, эсвэл дутуугаа нөхдөг. Миний дуу зохиох арга барил жил бүр өөрчлөгдөж хувьсаж байгаа" хэмээн хэвлэлд ярьж байв.
БАРИМТ 11
Сонирхлынхоо дагуу тэр гар урлал, гоо сайхны салбарт гарааны бизнес эхлүүлжээ. Тэр гоё хувцаслаж, шин содон зүйлс турших дуртай учир дөрвөн ажилтантай "Namuxan_knitwear" нэртэй сүлжмэл эдлэлийн дэлгүүрийг нээсэн байна.
БАРИМТ 12
Харин гоо сайхны салбарт тэрбээр One nail salon салоныг хоёр найзтайгаа нийлэн ажиллуулж байна. Энгийн бус содон, чадвар шаардсан будалтад дуртай залуус тэднийг салоныг түлхүү сонирхдог.
БАРИМТ 13
Тэр дуу зохиодог шигээ, бичих авьяастай нэгэн. Тийм дээ ч хүүхдийн уран зохиолын салбарт орох хүсэлтэй явдаг.
БАРИМТ 14
Тэрбээр 25 настай.
БАРИМТ 15
Түүнийг анх уран бүтээлч болно гэхэд гэр бүлийнхэн нь хүлээн зөвшөөрдөггүй байж. Саяхнаас л хүлээн зөвшөөрч эхэлжээ.
Сэтгэгдэл (4)