Баримт 1
УИХ-ын гишүүн Ням-Осорын Учрал. Тэрбээр 1987 оны нэгдүгээр сарын 2-нд Улаанбаатар хотод төрсөн. УИХ-д хоёр удаа сонгогдсон улстөрч.
Баримт 2
Тэрбээр 2003 онд Их Засаг лицей сургууль, 2007 онд Их Засаг олон улсын их сургуульд суралцсан бөгөөд эрхзүйч мэргэжил эзэмшсэн. Лимкоквин их сургуулийн Англи улсын Лондон хотын салбарт бизнесийн удирдлагын магистр, Монгол улсын Боловсролын их сургуульд түүхийн ухааны магистр, ОХУ-ын Шинжлэх ухааны академийн Сибирийн салбарт түүхийн ухааны докторын зэргээ тус тус хамгаалжээ.
Баримт 3
Сургуулиа төгсөөд 2007 оноос Их засаг олон улсын их сургуулийн ТУЗ-ийн дэд дарга, Рояаль Академи, Рояаль олон улсын дээд сургуулийн үүсгэн байгуулагч, ерөнхий захирал, Нийслэлийн Монгол ардын намын хорооны улс төрийн хэлтсийн дарга, Засгийн газрын Хэрэг эрхлэх газарт Монгол улсын Шадар сайдын ажлын алба, Шадар сайдын олон нийттэй харилцах бодлогын зөвлөх, Улсын Их Хурал дахь Монгол ардын намын бүлгийн зөвлөх, Монголын Франчайзингийн Ассоциацийн ерөнхийлөгч, НАМЗХ-ны дэд ерөнхийлөгч, Монголын залуу багш нарын холбооны ерөнхийлөгчөөр ажилласан.
Баримт 4
Түүний аав Н.Ням-Осор монголын боловсролын салбарт олон жил зүтгэсэн нэгэн бөгөөд ИЗОУИС-ийг үүсгэн байгуулагч, Монгол Улсын гавьяат багш, шинжлэх ухааны доктор, профессор билээ. Харин түүний ээж Ж.Цэцэгмаа багш мэргэжилтэй, түүхийн шинжлэх ухааны доктор нэгэн.
Баримт 5
Н.Учрал багаасаа шүлэг, яруу найарг сонирхдог байсан төдийгүй гуравдугаар ангийн сурагч байхдаа “Аадар бороо” хэмээх шүлгийн жижигхэн номоо гаргаж байжээ. Багаасаа нийгмийн идэвхтэй хүүхэд байсан тэрбээр “Хүрэл тулга” болон “Уран жиргээ” наадмуудад оролцдог байжээ.
Баримт 6
Нэгэн үе Тимон нэрээр уран бүтээл туурвин, хип хоп дуугаараа хүүхэд залуусыг байлдан дагуулж явсан тэрбээр улс төрийн замналаа 2012 онд Нийслэлийн МАН-ын хороонд улс төрийн хэлтсийн даргаар эхэлсэн бол 2015 онд Шадар сайдын зөвлөх болсон юм.
Баримт 7
МАН 2012 оны УИХ-ын сонгуульд ялагдаж, сөрөг хүчний болсны дараа буюу 2015 онд Засгийн газарт богино хугацаанд хамтран ажилласан. Энэ зурвас үед Ерөнхийлөгч У.Хүрэлсүх Шадар сайдын алба хашсан бөгөөд Н.Учрал зөвлөхөөр нь ажилласан байдаг.
Баримт 8
Харин 2016 онд УИХ-ын сонгуулиар Сонгинохайрхан дүүрэгт нэр дэвшин өрсөлдсөнөөр ялалт байгуулж, парламентын гишүүн болсон.
Баримт 9
2020 оны УИХ-ын сонгуульд ч мөн тус дүүрэгт нэр дэвшин өрсөлдсөнөөр хамгийн олон буюу 50 мянга гаруй сонгогчийн саналаар нэгээр гарч байв.
Баримт 10
Н.Учрал бол Засгийн газрын хамгийн залуу гишүүн. Бас хамгийн нэр цэвэр сайдын нэг бөгөөд нүүрс, авлигын нус тоос, элдэв бусармагаас хол нэгэн. Гэсэн ч 2016 онд Жижиг, дунд үйлдвэрлэлийг хөгжүүлэх сангаас хамаарал бүхий компани нь зээл авсан дуулианд нэр холбогдож байсан.
Баримт 11
Авлигатай тэмцэх “Шилэн” ажиллагааны хүрээнд Засгийн газрын тусгай сангуудыг нээж, улстөрчид болоод бизнесмэнүүдийн хулгайг ил тод болгосон сайд бол Н.Учрал юм.
Баримт 12
Түүний багийнхны хийсэн shilen.gov.mn вэб сайт руу нэвтэрснээр Тусгай хамгаалалттай газар нутагт хэн хэдэн га газар эзэмшдэг, Тариалан эрхлэлтийг дэмжих сан, Хөдөлмөр эрхлэлтийг дэмжих сан, Мал аж ахуйг дэмжих сангаас хэн хэчнээн тэрбумын зээл авсанаа төлөөгүй вэ зэрэг мэдээллийг авах боломж бүрдсэн.
Баримт 13
Мөн Улаанбаатар хотын захирагчаар ажиллаж байсан албан тушаалтнуудаас хэн нь хамгийн их газар эзэмших эрхийг бусдад олгов, төрийн өмчит компанийн Төлөөлөн удирдах зөвлөлийн гишүүдээр хэн, хэн ажиллаж, хэдэн төгрөгийн цалин авч байгааг ч мэддэг болсон. Тусгай сангуудын мэдээллийг ил болгосноор түүнийг нам дотроо ч дайсан олонтой болсон гэх нь бий.
Баримт 14
Ерөнхий сайд Л.Оюун-Эрдэнэ 2021 онд танхимаа байгуулсныхаа дараа Цахим хөгжил харилцаа холбооны яамыг байгуулж, Боловсрол, шинжлэх ухааны сайд Л.Энх-Амгалангаар хавсруулж байгаад Н.Учралыг сайдаар нь томилсон.
Баримт 15
Тэрбээр сайдаар томилогдох үедээ төрийн үйлчилгээг хүнээс хамаарал багатай болгоход технологийн дэвшлийг ашиглах болно гэдгээ мэдэгдэж байсан нь эхнээсээ ажил хэрэг болоод буй. Тухайлбал, иргэн хүнсний дэлгүүр, цайны газар, мухлаг, ресторан, супермаркет, зочид буудал, хүнсний зах, худалдааны төвийн үйлчилгээ эрхлэх зөвшөөрлийг хүсэх бол Emongolia, Ebisiness.mn хуудас руу нэвтрэн хүсэлтээ илгээх боломжтой болсон.
Баримт 16
Мөн тэрбээр Хаягжилтыг шийдэх хамгийн хурдан шуурхай арга буюу what3words-ийг нэвтрүүлсэн. Үүнийгээ Emongolia дээр гурван үгт хаяг хайх гээд систем суулгасан юм.
Баримт 17
Түүнчлэн ekids-ыг нэврүүлсэн. ekids платформ нь хүүхдүүд ямар сайт руу орж, ямар төрлийн мэдээлэл аваад байна, насанд хүрэгчдийн контент үзэж байх вий, гэмт хэрэг, зөрчилд уриалан дуудсан контент үзэж байх вий гэдэгт эцэг эхчүүд хяналт тавих боломжийг нээж өгсөн.
Баримт 18
Тэрбээр энэ парламентад ажиллах хугацаандаа Хувийн тэтгэврийн сангийн тухай хуулийг өргөн барьж батлуулсан. Уг хуулийн талаар тэрбээр "Ажил олгогч, нийгмийн даатгалын шимтгэл төлөгч, татаас өгч буй төр гээд бүгд сэтгэл хангалуун бус байдаг. Тиймээс хувийн тэтгэврийн сангийн эрх зүйн орчныг бүрдүүлж төр бодлогоор дэмжих, хөрөнгө оруулагч, хувьцааны зах зээлд томоохон тоглогч болох асуудлыг хуулиар зохицуулж өгнө" гэсэн байдаг.
Баримт 19
Түүний 2022 онд мэдүүлсэн хөрөнгө орлогын мэдүүлэгтээ өөрийн орлого 1 тэрбум, гэр бүлийн орлого 56 сая төгрөг хэмээн мэдүүлжээ.
Баримт 20
Тэрбээр 3 тэрбум төгрөгөөр үнэлэгдэх гурван нийтийн орон сууц, хоёр зуслангийн байшин, нэг үйлчилгээний зориулалттай байшинтай. Мөн 885 сая төгрөгийн үнэ бүхий Mercedes Benz G 500, Lexus 570,С Nissan Tiida, Mercedes Benz S400 автомашинтай.
Баримт 21
150 сая төгрөгийн үнэ бүхий газар эзэмшдэг бөгөөд 31 сая төгрөгөөр үнэлэгдэх малтай аж. Тэрбээр Эрдэнэс таван толгой ХК, Гоц жаалууд цэцэрлэг ХХК, Рояал Академи ХХК, Грийн Ланд групп ХХК, Массив трейд ХХК, Их Засаг олон улсын их сургууль ХХК-д хувьцаа эзэмшдэг.
Баримт 22
Тэрбээр "Хэдэн хүн ээлжилж дарга болдог төрийн албанд салхи оруулах цаг ирсэн" хэмээн байр сууриа илэрхийлж байв. Тухайлбал "Төрийн албаны хуульд салбартаа мэргэшсэн байдал маш чухал. Төрийн албаны өнөөгийн хуулиар Хүнс, хөдөө аж ахуйн яаманд газрын дарга хүн насаараа хийсэн хүн Эрүүл мэндийн яамны төрийн нарийн бичгийн дарга хийж болно. Уг нь бол тэр салбарыг огт мэдэхгүй. Харамсалтай нь мерит зарчим гэдгийг буруу ойлгосноос ийм томилгоонууд хийгдэж байна. Мерит зарчим гэдэг нь шатлан дэвших гэсэн үг биш. Нэг газраа буга чөтгөр шиг байснаараа төрийн албанд дээшилдэг зүйл биш" гэсэн юм.
Баримт 23
Түүний санаачилсан Олон нийтийн сүлжээнд хүний эрхийг хамгаалах тухай хуулийн зарим заалт, олон нийтийн бухимдлыг төрүүлж, улмаар уг хуульд Ерөнхийлөгч У.Хүрэлсүх хориг тавьсан юм. Тухайлбал, уг хуулийг УИХ-д өргөн бариад гуравхан хоногийн дотор батлуулсан. Тэр бяртайдаа, эрх мэдэлтэйдээ бус намын дарга нар санал нэгдэж, чиглэл болгосон учраас л энэ богинохон хугацаанд хуулиа батлуулж чадсан юм.
Баримт 24
Тэрбээр УИХ-ын 2024 оны сонгуульд аравдугаар тойрогт нэр дэвшиж буй.
Сэтгэгдэл (1)