“Бөөгийн домог” роман серб хэлээр хэвлэгджээ. Номын нээлт Белградын Олон улсын Номын Яармагийн гол асар болох “Иво Андричийн танхим”-д энэ сарын 25-нд болсон юм. 

Belgrade Book Fair нь Балканы бүс нутаг дахь хамгийн эртний (67 жилийн уламжлалтай), хамгийн том соёлын арга хэмжээ аж. Серб хэлээр хэвлэгдсэн ном Хорват, Черногор, Босна-Хэрцэговина, Словени, Умард Македон улсуудад буюу 20 сая хүний орон зайд уншигдах боломжтой хэмээн номын яармаг зохион байгуулагчид ярьж байсныг зохиолч цахим хуудаснаа хуваалцав. 

"Бөөгийн домог" романыг Сербийн нэрт орчуулагч Людмила Ёксимович орчуулжээ. Харин орчуулгын редактор Миряна Грбич ажилласан агаад эрдэмтэн, философич Владимир Меденицагийн удирддаг “Логос” хэвлэлийн газар хэвлэжээ. Монголын орчин цагийн утга зохиолыг Сербид таниулахад Серб дэх Монгол Улсын өргөмжит консул Владимир Столович ихээхэн хувь нэмэр оруулсан аж.