БАРИМТ 1
Мариинскийн театрын гоцлол дуучин Ганбаатарын Ариунбаатар ОХУ-ын "Каста Дива"-гийн нэрэмжит дуурийн шагналын "Оны шилдэг дуучин" номинацийн эзэн болжээ. Түүнд энэхүү шагналыг Мариинский театрт хэд хэдэн гол дүрийг бүтээхээс гадна ОХУ- ын Большой театрт Ж.Вердигийн "Риголетто" дуурийн шинэ хувилбарын нээлтэд тоглосных нь төлөө шагнасан гэдгийг онцолсон байна.
БАРИМТ 2
Г.Ариунбаатар нь Төв аймгийн Баян-Өнжүүл суманд 1988 онд төржээ. Гурван хүүхэдтэй айлын дундах нь. Нэг ахтай, нэг эмэгтэй дүүтэй.
БАРИМТ 3
Тэрбээр хөдөө талд хурга, тугалтай хөөцөлдөж өссөн гэдэг нь гадаадынхны анхаарлыг зүй ёсоор татдаг аж.
БАРИМТ 4
Г.Ариунбаатар Зуунмод хотын Хүмүүн цогцолбор сургуулийг 2005 онд төгсч, Улаанбаатар хотод оюутан болж ирсэн ч сургалтын төлбөрөө төлж чадаагүй учраас хоёр жилийн дараа их сургуулиа орхиход хүрчээ.
БАРИМТ 5
Харин дараа нь Цагдаагийн “Сүлд” чуулгад элсэж, Соёл Урлагийн Их Сургуульдаа эргэн орж, дуурийн дуулаач мэргэжлээр төгсчээ. Энэ үеэс түүнд ОХУ, Европын дуурийн их театрын тайзнаа хөл тавих боломж нээгдсэн аж.
БАРИМТ 6
Өдгөө тэрбээр ОХУ-ын Санкт-Петербург хотын Мариинский театрт, Буриадын Дуурь, бүжгийн эрдмийн театрын гоцлол дуучнаар ажиллаж байна.
БАРИМТ 7
Г.Ариунбаатар 2011 онд 23 настайдаа Монгол Улсын Гавьяат жүжигчин хэмээх нэр хүндтэй цол хүртсэн. Төрийн шагнал дэмжлэгт урамшсан тэрбээр 2015 онд анх удаа Оросын суут хөгжмийн зохиолч П.И.Чайковскийн тэмцээний эрэгтэй гоцлол дуучны шагналыг хүртсэн байв. Үүнээс гадна дуурийн нэр хүндтэй олон улсын олон тэмцээнээс шагнал хүртжээ.
БАРИМТ 8
Түүний хоолойг салхи шиг намуухан тэгснээ гэнэт хүчирхэг бүргэд далавчаараа агаар зүсэх мэт хэмээн зүйрлэдэг аж.
БАРИМТ 9
Дэлхийн соёл урлагийн тавцанд Монгол Улсын нэрийг гаргаж, таниулахад онцгой үүрэг гүйцэтгэж буйг нь үнэлж, 2016 онд Г.Ариунбаатарыг Монгол Улсын төрийн дээд шагнал-тэргүүн зэргийн одон “Чингис хаан” одонгоор шагнасан юм. Мөн Би-Би-Си Кардифф Дэлхийн шилдэг дуучин шалгаруулах уралдааны шилдэг дуучин /Россини, Верди, Чайковский болон Б. Шаравын "Монголын тал нутаг"-ийг"/ дуулсан юм.
БАРИМТ 10
ОХУ-ын сонгодог урлагийн "Каста Дива" шагналыг жил бүр дуурийн урлагт гарсан гарамгай амжилтыг үнэлдэг бөгөөд шүүгчдийн бүрэлдэхүүнд нэрт хөгжмийн шүүмжлэгчид багтдаг аж.
Сэтгэгдэл (16)