БАРИМТ 1
Бурхан багшийн Их дүйчин өдрийг зуны тэргүүн сарын шинийн 15-нд тэмдэглэдэг билээ.
БАРИМТ 2
Бурхан багшийн Их дүйчин өдөр бурхан багшийн лагшин мэндэлж, төгс гэгээрлийн хутгийг олж, нирваан дүрийг үзүүлсэн гурван үйл зохиол давхацсанаараа бусад дүйчин өдрөөс онцлогтой гэж үздэг.
БАРИМТ 3
1999 онд НҮБ-ын Ерөнхий ассамблейгаас Бурхан багшийн Их дүйчин өдрийг олон улсын хэмжээнд тэмдэглэн өнгөрүүлж байхаар шийдвэрлэсэн байдаг.
БАРИМТ 4
Бурхан багшийн Их дүйчин өдрийг тэмдэглэх үйл хэсэг хугацаанд тасарсан ч 1990 оноос энэ өдрийг энэрэл нигүүлслийг дэгжээх, эрдэм мэдлэгийг эрхэмлэх, ёс заншил, өв соёлоо өвлүүлэх сэдэв агуулга дор өргөн тэмдэглэх болжээ.
БАРИМТ 5
Энэ өдөр үйлдсэн буян бум, живаа, сая, дүнчүүр тоонд хүрч арвидахыг сударт зарлигласан байдаг гэнэ.
БАРИМТ 6
Дүйчин өдөр бие, хэл, сэтгэл явдал мөрөө ариунаар сахиж, ном буяны цагаан зүгт шамдахыг номлодог.
БАРИМТ 7
Бурхан багшийн Их дүйчин өдрийг Азийн бурхны шашинтай орнууд 2000 жилийн тэртээгээс тэмдэглэн ирсэн түүхтэй аж. Эл өдрийг тэмдэглэн өнгөрүүлдэг ихэнх улс орон бүх нийтээр амардаг байна. Түүнчлэн Азийн зарим орнуудад энэ өдрийг архи дарс худалдахгүй, зугаа цэнгээний газар ажиллуулахгүй байх зэрэг шийдвэр гаргаж, үндэсний хүчирхийлэлгүй өдөр болгон тэмдэглэдэг ажээ.
БАРИМТ 8
Манай улс 2019 оноос Бурхан багшийн Их дүйчин өдөр буюу зуны тэргүүн сарын 15-ныг нийтээр тэмдэглэх баярын өдөр болгон бүх нийтээр амардаг байхаар хуульчилсан.
БАРИМТ 9
Бурхан багшийн Их дүйчин өдрийг бүх нийтээр тэмдэглэх баярын өдөр болгох хуулийн төслийг 2019 онд тухайн үеийн УИХ-ын гишүүн Д.Оюунхорол, Н.Амарзаяа, Б.Бат-Эрдэнэ, Д.Лүндээжанцан, Ж.Мөнхбат, Г.Мөнхцэцэг, Х.Нямбаатар, Ш.Раднаасэд, Д.Тогтохсүрэн, Д.Тэрбишдагва нар санаачлан боловсруулж байжээ.
БАРИМТ 10
Бурхан багшийн Их дүйчин өдөр арван хар нүглийг тэвчиж, арван цагаан буяныг туурвих учиртай. Бие, хэл, сэтгэл гурвын буруу явдлаас болж л жаргалтай амьдралынхаа төлөв түвшин байдлыг алддаг хэмээхүй.
БАРИМТ 11
Арван хар нүгэл дотор, уур омог, хүсэл тачаал тэргүүтэй маш олон үйл багтдаг байна. Тухайн өдөр хэрүүл тэмцэл хийх, хулгай хийх, амьтны амь таслах, өс хонзон санах, бусдыг доромжлон гүтгэх, өгөөгүйг авах зэрэг үйлийг цээрлэдэг.
БАРИМТ 12
XVI зуунд Бурханы шашин монгол орноо гурвантаа дэлгэрэх үест Цаст төвөдийн орноос Эрдэнэ Зуу хийдэд “Бурхан багшийн ринсрэл”-ийг нандин шүтээн болгон залж байжээ. Энэхүү ринсрэл эдүгээ Богд Хааны Ордон музейн сан хөмрөгт хадгалагдаж байна. Жил бүр Бурхан багшийн их дүйчин өдрөөр их эрдэнийн ринсрэл "Цахиур эрдэнэ"-ийг үзэсгэлэнд дэлгэн үзүүлдэг.
БАРИМТ 13
Бурхан багшийн Их дүйчин өдөр махыг тэвчиж, цагаан хоол идвэл сайн гэж үздэг.
БАРИМТ 14
БНСУ, Тайланд, Шри Ланк, Сингапур, Япон, Энэтхэг, Вьетнам, Мъянмар зэрэг бурхны шашинт орнуудад Бурхан багшийн мэндэлсэн, гэгээрсэн, нирваан дүр үзүүлсэн Их дүйчин өдрийг олон нийтийн баяр, амралтын өдөр тэмдэглэж, түүгээрээ ард түмнийхээ язгуур эрх ашиг, эв нэгдэл, сүшиг бишрэлийг хүндэтгэн дээдэлж, хойч үедээ хүнлэг энэрэнгүй, ёс зүйтэй, төлөвшсөн нийгмийг уламжлуулахыг эрхэм зорилгоо болгодог байна.
БАРИМТ 15
Бурхан багшийн их дүйчин өдөр энэ жил “Амар амгаланг хамтдаа түгээе” уриан дор болно.
