БАРИМТ 1
Ailee 1989 оны тавдугаар сарын 30-нд АНУ-ын Колорадо мужийн Денвер хотод төржээ. Одоо 36 настай.
БАРИМТ 2
Ailee-ийн жинхэнэ нэрийг нь Ame Lee гэдэг. Харин солонгос нэрийг нь Lee Ye Jin гэнэ.
БАРИМТ 3
АНУ-д төрж өссөн тэрээр Нью Йорк хотод “Muzo Entertainment”-д гэрээ байгуулж байжээ. Энэ үедээ “A.Leean” гэх тайзны нэрээр “Fall Back” гэх анхны дуугаа гаргасан. Гэсэн ч төдийлөн амжилттай байгаагүй тул агентлагаасаа гарч, 2010 онд шалгаруулалт өгөхөөр Солонгос улсад нүүж очсон байна. Ингээд YMC энтертайнментад элсэж, “Heaven” дуугаараа амжилттай дэбют хийсэн байдаг.
БАРИМТ 4
Ailee-ийн “I Will Show You”, “U & I”, “Don’t Touch Me”, “Singing Got Better” зэрэг олон дуунууд нь алдартай. Түүний анхны тоглолт 2012 оны долоодугаар сард тоглогдож байжээ. Үүнээс хойш гаргасан дуу бүр нь хит болж, шилдэг эмэгтэй дуучин шагналыг гурван жил дараалан хүртсэн юм.
БАРИМТ 5
Түүний эхний аялан тоглолт нь 2015 оны долоодугаар сард болж байсан бол удаах нь 2018 оны арваннэгдүгээр сард болж, тоглолтоо хийж байжээ.
БАРИМТ 6
2012 онд “Dream High” цувралын хоёрдугаар ангид Ailee тоглож байжээ.
БАРИМТ 7
Түүнийг солонгосчууд “Korean Beyonce” хэмээн хочилдог. Учир нь Ailee 2011 онд MBC телевизийн “Singer and Trainee” тусгай дугаарт Wheesung-тай хамт оролцохдоо Beyonce-ийн “Halo” дууг дуулж байсан юм. Түүний хүчирхэг хоолой, тайзны гайхалтай үзүүлбэр нь яг л дэлхийн алдарт дуучин Beyonce шиг санагддаг учир ийнхүү хочилжээ.
БАРИМТ 8
Тэрбээр “Goblin”, “Doom At Your Service”, “Goodbye My Love”, “Alchemy of Souls” зэрэг бидний сайн мэдэх олон киноны дууг дуулж байсан. Түүний фенүүдийг “Aileeans” хэмээн нэрлэдэг аж.
БАРИМТ 9
Ailee энэ оны дөрөвдүгээр сарын 20-ны өдөр Choi Si Hun-тэй хуримаа хийсэн. Choi Si Hun-ийг бид “Single Inferno” болзооны шоунд оролцож байсан гэдгээр нь мэдэх биз ээ.
БАРИМТ 10
Тэрбээр зургаадугаар сарын 21-нд Улаанбаатар хотод болох SUPER CONCERT 2025-д оролцохоор тун удахгүй Монголд ирнэ.
