БАРИМТ 1
Зуун дамжин эгшиглэсэн ХИТ дуунуудаараа түмэн олондоо хайрлагдан, дархлагдсан Монголын Примадонна - хүчирхэг дуу хоолойн эзэн Гавьяат Жүжигчин, дуучин Төмөрийн Ариунаа Монголын орчин цагийн хөгжмийн урлагт дөрвөн аравны хугацаанд бүтээн туурвиж, өөрийн нэрийг тамгалсан билээ.
БАРИМТ 2
Алаг нүдтэй, алдрайхан насандаа цовоо цойлгон хоолойгоор “Арван зургаан нас”-аа дуулж Монголчуудтай анх танилцаж байсан бол Болгарын Урлагийн консерваторийг мэргэжлийн дуучнаар төгсөн ирэхдээ жинхэнэ харизмтай шинэ цагийн од болон тайзнаа гарч ирсэн билээ.
БАРИМТ 3
Т.Ариунаа, 1983 онд эстрадын дуучдаас анх удаа Монголын радиогийн Алтан фондод дуу хоолойгоо бичүүлж, Улсын филармонийн "Соёл Эрдэнэ" чуулгад дагалдан дуучнаар урлагийн гараагаа эхэлсэн бөгөөд тун удалгүй хамтлагтаа гоцлол дуучны үүргийг гүйцэтгэж эхэлсэн юм
БАРИМТ 4
Хамтлаг дуучдын уран бүтээл бүхэн хатуу чанга хяналтыг дамжин үзэгчдийн сонорт хүрдэг байсан тухайн цаг үед гоцлол дуучин пянзаа гаргана гэдэг бүтэшгүй мөрөөдөл мэт байв. Авьяаслаг залуу дуучны чансаатай уран бүтээлүүдээс бүтсэн “16 нас” пянз Монголын эстрад урлаг дахь анхны бие даасан пянзтай дуучин хэмээх алдрыг түүнд авчирав.
БАРИМТ 5
Төр засаг нь соёл урлагаа дэмждэг цаг үе ард хоцорч, нийгэм солигдох үед дуучны карьераа эхлүүлсэн нь түүний хувьд нэгэн бодлын азгүй ч нөгөө талаар тэмцэж, өөрийгөө уран бүтээлчийн хувьд олоход азтай цаг мөч таарсан байлаа. Тиймээс ч уран бүтээлийн анхны ивээн тэтгэгч нь байсан түүний аав Төмөр 1995 онд “On and Off” продакшны бүтээсэн “Амласан хайр” дууны клипнийх нь 1000 ам.долларын зардлыг эцгийн халуун хайраар охиндоо зориулсан гэдэг.
БАРИМТ 6
Ариунаа бол эрсдэл хийгч, аз туршигч, олон анхдагчийн эзэн ДИВА.
БАРИМТ 7
Гоо зүйн өндөр орчин үеийн хөгжмийн урлагт шинэчлэл хийснийг хэн бүхэн хүлээн зөвшөөрдөг. Үүний ч илрэл нь ерээд оны эстрад урлагийнхны стиль имижийн эрс өөрчлөлтийг тэр үеийн хэвлэлийн хуудаснаас мэдрэмж, тайзны соёлыг хослуулсан эрхэмсэг, эрс шийдэмгий түүний хувцаслалт эргүүлэн харж болно.
БАРИМТ 8
Гоцлол дуучин тайзнаа бүжиглэж, дуулах нүд баясгам үзүүлбэрийг мөн л дуучин Ариунаа анх удаа үзэгчиддээ толилуулж байв. Энэ цагаас хойш бүх тоглолтоо өөрийн гэсэн бүжигчидтэй хамтран тайзны үзүүлбэрээ бэлтгэх жишгийг тогтоосон юм.
БАРИМТ 9
Ариунаагийн галзуу гэмээр эрсдэлтай алхмуудын нэгээр 2000 оны “Чи минь” тоглолтынх нь агаарын үзүүлбэртэй дуулалтыг онцолоход л хангалттай. Байнгын бэлтгэл сургуулилт, нөр их хөдөлмөр нь түүнийг аюулгүйгээр энэ бүхний ард амжилттай гарахад нөлөөлдөг.
БАРИМТ 10
Жинхэнэ уран бүтээлч, олны танил, урлагийн од байхын бас нэгэн шалгуур бол нийгэмдээ үзүүлэх нөлөөлөл. 1997 оноос дуучин Ариунаа нийгмийн хариуцлагатай ажлаа эхлүүлж хөгжлийн бэрхшээлтэй хүүхдүүдэд чиглэсэн “Ариун сэтгэл сан”-гаа байгуулан, хандивын тоглолтоороо амжилттай хөрөнгө босгож, нийгмийн сайн сайханд зориулж эхлэв.
БАРИМТ 11
Хүүхдийн төлөөх нийгмийн ажлаараа Монголоос анх удаа НYБ-ын Хүүхдийн сангийн элчээр сонгогдож, 2005 – 2015 он хүртэл 10 жилийн хугацаанд нэр төртэй ажилласан.
БАРИМТ 12
Түүний дуулсан "Нарны хаан хүүхэд" дуу НҮБ-аас зарласан уралдаанд “Азийн хүүхдийн шилдэг дуу”-гаар шалгарч, Хүүхдийн төлөө ЗА гэж хэлцгээе хэмээх үзэл санааг дэлхий дахинаа тунхаглахад үнэтэй хувь нэмрээ оруулсан юм.
БАРИМТ 13
Дуучин Ариунаа уран бүтээлдээ хэзээ ч ханадаггүй. Өөрийгөө ахин сорих шинэ санаа, өмнөхөө давсан бүтээлүүдийг хийхийг эрмэлздэг аж. Учир нь Ариунааг давсан уран бүтээл хийх өрсөлдөөн бусад уран бүтээлчдэд төрдөг нь үнэндээ урлагийн ертөнц дахь цэвэр их өрсөлдөөний шалтгаан болдог юм.
БАРИМТ 14
Түүний уран бүтээлийн эргэлтийн нэг цэг болсон туульсын агуулга хийцлэлтэй “Би” дууны клипээ бүтээхдээ эх орноо хөндлөн гулд 2000 км замыг туулж, байгалийн гайхамшигт тогтоц газруудад зураг авалтаа хийсэн.
БАРИМТ 15
10 сая хол давсан өртөгтэй бүтсэн, тэр хэрээрээ үнэ цэнтэй бүтээл болж тухайн үедээ шуугиан тарьж, телевизүүдийн оргил цагийн эфирт заавал цацагддаг.
БАРИМТ 16
2005 онд 25 сая төгрөгөөр бүтээсэн “Хөх Монголын үр сад” дууны клипэндээ 800 орчим хүний баг бүрэлдэхүүн оролцуулж, уран сайхны киноны хэмжээнд үнэлэгдэх бүтээл хийсэн юм.
БАРИМТ 17
Ариунаа дараагийн бүтээлүүдээ дандаа давуулан хийхийг эрмэлздэг амбицаараа “Домгийн өглөө” дууны клипээ кино клип жанраар бүтээсэн нь 50 сая төгрөгний өртгөөр хийгджээ. Үзэгчдэд ёстой л юм үзсэн юм шиг мэдрэмж төрүүлсэн энэ бүтээл нь тухайн үедээ дэлгэц, хөгжмийн урлагийн олон шагналуудыг эзэндээ авчирсан билээ.
БАРИМТ 18
Тэрбээр анх 1996 онд ЭРОС№1 цомгоороо түүний ертөнцөөр байнга аялахыг хүсдэг сонсогчиддоо бэлэг барьсан бол “Миний шинэ орон зай”, “Чамтай бас чамгүй” цомгууддаа хамгийн их хөрөнгө буюу 30.0 мянган ам.доллар оруулж, харин “Чи минь” цомог нь түүнд хамгийн өндөр ашиг орлогыг авчирсан байна.
БАРИМТ 19
Түүний хувьд шинэ дуу, шинэ тоглолт хийх төслүүд нь яг адилхан ач холбогдолтой.
БАРИМТ 20
2004 онд “Нэг л үдэш” тоглолтоо Төв цэнгэлдэх хүрээлэнд хийж, 2 өдрийн турш 50.0 үзэгчдэд хүргэсэн бол 2006 оны “Дурлал шиг асна” тоглолтоо 4 өдөр дараалан тоглож, гадаадын хөгжимчид, уран бүтээлчдийг урьж хамтран ажилласнаараа бас л анхдагч болж, үзэгч сонсогчдынхоо сонорыг мялаасан юм.
БАРИМТ 21
2009 оны “Гайхамшигт үдэш” тоглолт нь тухайн үед соло дуучны бие даасан тоглолтын цоо шинэ стандарт, босгыг тогтоосон гэж үздэг. 120 сая гаруй төгрөгөөр бүтсэн уг тоглолтын тасалбарын үнэ 100.000 төгрөгөөр үнэлэгдэж байсан нь соёл урлагийн уран бүтээлчийн үнэмлэмжийг бодитоор үнэлэх алхам болсон юм.
БАРИМТ 22
Үүнээс хойш 10 жил бие даасан тоглолтоо хийгээгүй учир 2019 оны “Тэнгэр шиг бай” тоглолтоо маш том төсөл болгохыг зорьсон нь дуучин Т.Ариунаагийн мөрөөдлийг биелүүлсэн билээ.
БАРИМТ 23
Түүний харизм, хайр сэтгэл, уран бүтээлчийн замналыг илэрхийлсэн амьд найруулга, техникийн шинэлэг шийдэл, хамтрагч уран бүтээлчдийн хамтын хөдөлмөрийн үр дүнд жинхэнэ хайр хүндэтгэл мэдрэгдсэн гайхамшигтай тоглолтыг бүтээж чадсан билээ.
БАРИМТ 24
Тэр мөчөөс хойш 6 жил өнгөрчээ. Тэгвэл одоо Т.Ариунаа уран бүтээлийн “ЗҮРХ АСНА” шинэ төслөө эхлүүлжээ.
