БАРИМТ 1
Баянзүрх дүүрэг 1965 оны дөрөвдүгээр сарын 14-нд Найрамдалын район нэртэйгээр байгуулагдаж байв. Тухайн үед Баянзүрх дүүрэг 65 мянган га нутаг дэвсгэр, 7,309 өрхийн 39,375 хүнтэй байжээ.
БАРИМТ 2
Үүнээс нэг жилийн дараа буюу 1966 онд үйлчилгээ олон нийтийн иж бүрэн гурван барилга, зургаан орон сууцад 500 орчим айл оршин суух болсноор анхны орон сууц хороолол сүндэрлэжээ.
БАРИМТ 3
Харин 1976 онд Улаанбаатар хотыг хөгжүүлэх III ерөнхий төлөвлөгөө батлагдаж хотыг үндсэн гурван бүс, 21 хороолол болгон хөгжүүлэхээр тусгасаны дагуу Найрамдлын районд XVI хороолол ашиглалтад оржээ.
БАРИМТ 4
1986 оны үед Нийслэл хотын хүн ам хурдацтай өссөнтэй холбогдуулан 3.5 мянга, 1987 онд 3.6 мянган айлын орон сууцны барилга ашиглалтад оржээ. Үүнээс Баянзүрх дүүрэгт 50 мянган м.кв бүхий XIIIхорооллыг ЗХУ-ын тусламжтайгаар барьсан аж.
БАРИМТ 5
1992 оны наймдугаар сарын 18-ны өдрийн УИХ-ын 18 дугаар тогтоолын дагуу Баянзүрх хайрханаараа овоглон "Баянзүрх дүүрэг" хэмэээ нэрлэх болжээ. Үүнээс өмнө Найрамдалын район нэртэйгээр 27 жил болсон байна.
БАРИМТ 6
Баянзүрх хайрхан бол Улаанбаатар хотын зүүн биед орших тахилга сүлдэт уул юм. 1997 оны долоодугаар сарын 23-ны 50 дугаар тогтоолоор Баянзүрх уулыг нийслэлийн тусгай хамгаалалтад авч, байгалийн цогцолбор газар болгосон. Эл оны долоодугаар сарын 26, 27-нд Баянзүрх хайрхан уулыг тахих ёслол болж байжээ.
БАРИМТ 7
Баянзүрх дүүрэг нь Туул, Улиастай, Сэлбэ голын сав дагуу оршдог бөгөөд эртнээс улбаатай нийслэлийн хамгийн их архелогийн дурсгалтай нутаг юм. Ардын армийн Жанжин Сүхбаатарын өлгий нутаг гэдгийг түүхийн шарласан хуудаснаа цохон тэмдэглэсэн байдаг.
БАРИМТ 8
Баянзүрх дүүрэг бол аж үйлдвэрийн ажилчдын хороолол, цэргийн район гэдгээрээ нийслэлдээ онцлог бүхий дүүрэг байв.
БАРИМТ 9
Харин 1990-ээд оны шилжилтийн үед Баянзүрх дүүрэг Улаанбаатар хотын хамгийн том захууд, үйлчилгээний төвүүд төвлөрсөн бүс болон хувирсан аж.
БАРИМТ 10
2002 онд Нийслэл Улаанбаатар хотыг хөгжүүлэх V ерөнхий төлөвлөгөөг боловсруулахдаа өмнөх IVерөнхий төлөвлөгөөний хэрэгжилтэд дүгнэлт хийн, ололттой талуудыг уламжлан бататгаж, хот байгуулалтын үндсэн чиг хандлагыг тодорхойлжээ.
БАРИМТ 11
Баянзүрх дүүргийн өндөрлөг хөшөөг анх 2011 онд байгуулжээ. Тухайлбал, Баянзүрх дүүргийн ИТХ-ын 2005 оны наймдугаар сарын 12-ны өдрийн IVхуралдааны 13 дугаар тогтоолоор баталсан аж. Тус хөшөөг Баянзүрх дүүргийн шүтээн арслан, Баянзүрх хайрханы савдаг нохойг үнэнч сахиус асар, басар хоёр нохойгоор дүрслэн, өндөрлөгийн байршлыг гурван замын сүлжээ цэгт өнгөрсөн, одоо, ирээдүйг бэлгэдэж 2011 оны 12 дугаар сард босгожээ.
БАРИМТ 12
Баянзүрх дүүргийн Засаг даргын Тамгын газар Нийслэл хотоо хөгжүүлэх үйлсэд идэвх санаачилга, үр бүтээл гарган ажиллаж, цэцэрлэг сургуулийн хүртээмжийг нэмэгдүүлсэн зэрэг бүхий л үйл ажиллагаанд манлайлж, 2014, 2015 онд хоёр жил дараалан нийслэлдээ тэргүүлсэн юм.
БАРИМТ 13
Харин 2021 оны 12 сарын 24-ны НИТХ-ын ээлжит XII хуралдаанаар Баянзүрх дүүргийн 28 хорооноос 17 хороог хувааж, шинээр 15 хороо байгуулж байв.
БАРИМТ 14
Анх 30 мянган хүн ам, 20 хороотой эхэлж байсан Баянзүрх дүүрэг өнөөдөр 450 мянган иргэнтэй, 43 хороо, 122 мянган га газар нутгийг хамарсан нийслэлийн хамгийн том дүүрэг болон хөгжжээ.
БАРИМТ 15
Одоогоос гурван жилийн өмнө буюу 2022 онд “Баянзүрх дүүргийн хөгжлийн зураглал-2030” бодлогын баримт бичгийг баталжээ. Тус баримт бичиг нь хүний хөгжил, үр ашигтай эдийн засаг, тогтвортой ногоон хөгжил, цогц төлөвлөлттэй хотжилт, хариуцлагатай засаглал гэсэн 5 үзэл баримтлалын хүрээнд 2030 он гэхэд 36 зорилтыг хэрэгжүүлэхээр төлөвлөжээ.
БАРИМТ 16
Уг баримт бичиг нь Монгол Улсын урт хугацааны хөгжлийн бодлогын баримт бичиг болох “Алсын хараа-2050”, Нийслэл Улаанбаатар хотыг 2040 он хүртэл хөгжүүлэх хөгжлийн үзэл баримтлал зэрэг бодлогын баримт бичгүүдтэй уялдаж байгаагаараа онцлогтой юм.
БАРИМТ 17
Үүнээс гадна дүүргийн эрүүл мэндийн салбар, боловсролын салбар, нийгмийн хамгааллын салбарт олон зорилтот ажлууд сүүлийн жилүүдэд хийгджээ.
БАРИМТ 18
Тухайлбал, 100 ортой Дарь-Эх нэгдсэн эмнэлэг, хүүхдийн сэргээн засах төв, 12 ӨЭМТ шинээр байгуулж, автомашин, тоног төхөөрөмжөөр бүрэн хангасанаар эрүүл мэндийн анхан шатны тусламж, үйлчилгээг нэмэгдүүлжээ.
БАРИМТ 19
Боловсролын чанар хүртээмжийн хүрээнд 11 сургууль шинээр ашиглалтад орсноор анги танхимын ачааллыг буурчээ. Мөн Түрээсийн 35 барилгыг цэцэрлэг, сургуулийн зориулалтаар ашиглажээ.
БАРИМТ 20
Хүүхдэд зориулсан бодлогын хүрээнд “Хөдөлмөр” зусланг байгуулж хүүхдүүдийг чөлөөт цагаа зөв боловсон өнгөрүүлэх нөхцөл, боломжийг бүрдүүлсэн байна. Мөн Зорилтот бүлгийн хүүхдүүд түр хамгаалах байргүй байсан бол өнөөдөр “Хүүхэд хамгааллын байр”-тай болсон нь Баянзүрх дүүргийн томоохон дэвшилт байв.
БАРИМТ 21
Харин дэд бүтэц, тохижилтын ажлын хүрээнд 66 км авто зам, 14,500 гэрэлтүүлэг, 535 ухаалаг камер, 13.6 км дугуйн зам, хүүхдийн тоглоомын талбай, амралтын талбай, 3х3 спорт талбай, цэцэрлэгт хүрээлэн зэрэг 106 шинэ талбайн бүтээн байгуулалт хийнджээ.
БАРИМТ 22
Улаанбаатар хот нь агаарын бохирдолгүй, түгжрэлгүй нийслэл болохын төлөө 24 мега төсөл хэрэгжүүлэхээр төлөвлөсөн. Үүнээс таван төсөл нь Баянзүрх дүүрэгт хэрэгжинэ. Тухайлбал, Улаанбаатар метро, Тойрог зам, Туулын хурдны зам, Хог шатааж эрчим хүч үйлдвэрлэх төсөл, Тархмал эх үүсвэр төсөлүүд юм.
БАРИМТ 23
Дүүргийн түүхт 60н жилийн ойн онцлох бүтээн байгуулалтуудыг дурдвал “Олон улсын эко цэцэрлэгт хүрээлэн”, 42 га талбайд иж бүрэн спорт, ногоон байгууламжтай бүс болох “Дарь-Эх цогцолбор”, “Экстрем талбай”, “Бидний гудамж”, “Кино урлагийн гудамж” зэрэг залуус, гэр бүлд чиглэсэн бүтээлч орчин бий болгох талаар дүүргийн удирдлагууд дурдсан юм.
БАРИМТ 24
Ийнхүү Баянзүрх дүүрэг өнгөрсөн 60 жилийн хугацаанд хөгжлийн тулгуур бүс нутаг болж, иргэдийнхээ эрх ашгийг дээдэлсэн, төрийн үйлчилгээ тэгш, хүртээмжтэй, төр хувийн хэвшлийн түншлэл, хариуцлагыг эрчимжүүлэн хөгжжээ.
Сэтгэгдэл (7)