БАРИМТ 1
Энхтүвшингийн Батмагнай нь 2001 оны нэгдүгээр сарын 12-нд Баянхонгор аймгийн Жинст суманд Лонжийн Энхтүвшин, С.Болормаа нарын 3 дахь хүүхэд болон мэндэлсэн. Луу жилтэй.
БАРИМТ 2
Нэг ах, нэг эгчтэй. Айлын отгон хүүхэд.
БАРИМТ 3
Тэрбээр 2007 онд Баянхонгор аймагтаа Номун далай дунд сургуульд элсэн орж 2018 онд төгссөн. 2020 онд Их засаг дээд сургуульд элсэн орж 2024 онд төгссөн.
БАРИМТ 4
Анх 11 настайгаасаа эхлэн үндэсний бөх болон чөлөөт бөхийн спортоор хичээллэж эхлэсэн. Түүнд хамгийн анх бөхийн эрдэм заасан багш нь "Байдрагийн хүчтэн" чөлөөт бөхийн холбооны дасгалжуулагч С.Мөнхдуулах юм.
БАРИМТ 5
Биеийн жин 134 кг, биеийн өндөр 186 см.
БАРИМТ 6
"Алдар" спорт хороо, Нэг Монгол ХХК, Хос Хаш Оюу ХХК, Гал Хонгор ХХК, Тэргүүн Богд дэвжээний бөх.
БАРИМТ 7
Тэрбээр 18 насандаа Баянхонгор аймгийн баяр наадамд тав даван шөвгөрч аймгийн начин цол хүртэж байв. Үүнээс нэг жилийн дараа буюу 2020 онд Баянхонгор аймгийн баяр наадамд долоо давж үзүүрлэн Аймгийн заан цол хүртжээ.
БАРИМТ 8
Улмаар 2022 оны Ардын хувьсгалын 100, 101 жилийн ойн их баяр наадмын 1024 бөх барилдсан түүхт барилдаанд улсын наадмын тавын даваанд тунан барилдаж, Улсын начин цолыг хүртсэн юм. Энэ нь түүний анхны улсын наадмын дэвжээ байлаа. Тэгэхдээ тэр нэгийн даваанд Багануур дүүргийн харьяат аймгийн начин Дэлгэрийн Түмэнжаргал, хоёрын даваанд Говь-Алтай аймгийн Цээл сумын харьяат аймгийн хурц арслан Дамбын Тангад, гурвын даваанд Увс аймгийн Малчин сумын харьяат Аймгийн нэмэх начин байсан Тоочингийн Батсүрэн, дөрвийн даваанд Архангай аймгийн Цэнхэр сумын харьяат улсын гарьд Мягмарын Бадарч, тавын даваанд Өвөрхангай аймгийн Хархорин сумын харьяат аймгийн хурц арслан байсан Оюунгэрэлийн Наранбаатар нарыг тус тус өвдөг шороодуулжээ.
БАРИМТ 9
Э.Батмагнай бөхийн өргөөнд хамгийн анх 2020 онд бүх цэргийн наадмаар зодоглож, хоёрын даваанд тухайн үед аймгийн арслан цолтой байсан өдгөө улсын начин Ц.Сандагдоржид өвдөг шороодож байжээ.
БАРИМТ 10
Э.Батмагнай нь Баянхонгор аймгийн Баацагаан сумын харьяат Улсын начин П.Нямжанцангийн удмын бөх юм. Пүрэвжавын Нямжанцан нь 1956 онд аймагтаа түрүүлж Аймгийн арслан болсон. 1959, 1961 онуудын улсын баяр наадамд тав давж, цолоо баталж явсан хүчтэн.
БАРИМТ 11
Тэрбээр үндэсний бөхийн өсвөр үеийн УАШТ-д 16, 17, 18 насанд гурван жил дараалан түрүүлсэн ховор амжилтын эзэн. Тухайлбал, 2017 онд 16 насны ангилалд түрүүлэхдээ 29 барилдаж 27 давсан бол, 2018 онд 17 насны ангилалд түрүүлэхдээ 29 барилдаж 28 давж байсан шилдэг хүчтэн.
БАРИМТ 12
Чөлөөт бөхийн төрлөөр чамлахааргүй амжилт гаргаж, өсвөр, залуучууд, ази, армийн дэлхийн аваргын тавцанд зогссон нэгэн.
БАРИМТ 13
2017 онд 16 насандаа Өсвөр үеийн УАШТ болон “Монгол туургатан” хүүхдийн спортын наадмаас алт медаль хүртсэн байдаг.
БАРИМТ 14
2018 онд Роман Дмитриевийн нэрэмжит залуучуудын олон улсын тэмцээнээс хүрэл, Өсвөр үеийн УАШТ болон Залуучуудын УАШТ-ээс алт, Борис Будаевын нэрэмжит залуучуудын олон улсын тэмцээнээс мөнгөн медаль хүртэж байв.
БАРИМТ 15
2019 онд Роман Дмитриевийн нэрэмжит залуучуудын олон улсын тэмцээн болон “Монголиа Опен” тэмцээнээс хүрэл, мөн Залуучуудын УАШТ-ий алт, 2020 онд Залуучуудын УАШТ-ий алт, О.Пүрэвбаатарын нэрэмжит тэмцээний алт, 2021 онд Залуучуудын УАШТ-ий алтан медаль хүртсэн.
БАРИМТ 16
2022 онд Азийн АШТ-ээс хүрэл, УАШТ-ээс мөнгөн медаль хүртжээ. Харин энэ онд чөлөөт бөхийн 37 дахь удаагийн цэрэг, армийн дэлхийн аварга шалгаруулах тэмцээний 125 кг-ийн жинд алтан медаль хүртсэн юм. Мөн УАШТ-ээс хүрэл медаль хүртээд байна.
БАРИМТ 17
Тэрбээр 21 насандаа Улсын начин 24 насандаа Улсын арслан цолсон гурван бөх байдгийн нэг юм. Тодруулбал, Дархан аварга Б.Бат-Эрдэнэ, улсын арслан Б.Орхонбаяр нар уг амжилтыг гаргаж байсан.
БАРИМТ 18
Тэрбээр Бөхийн өргөөнд дөрөв түрүүлж, зургаа үзүүрлэсэн.
БАРИМТ 19
Монгол улсад нисэх хүчин үүсэж хөгжсөний 100 жилийн ойд зориулсан, Дархан аварга цолны хүндэтгэлийн барилдаан , Баянхонгор аймгийн нэгдсэн золголтод зориулсан барилдаан, Үндэсний эрх чөлөө, тусгаар тогтнолоо сэргээн мандуулсны 113 жилийн ойд зориулсан, Ерөнхийлөгчийн цомын төлөөх барилдаан, Булган аймгийн Орхон сумын харьяат, улсын заан Магсарын Гомбодоржийн нэрэмжит барилдаанд тус тус түрүүлжээ.
БАРИМТ 20
Ховд аймгийн Чандмань сумын 100 жилийн ойд зориулсан, улсын начин Идэшийн Мөнхбаатарын нэрэмжит барилдаан, Чингэлтэй хайрханы хишиг барилдаан, Бест Буйдан ХХК-ийн нэрэмжит сугалаат барилдаан, Баянхонгор аймгийн Богд сумын 100 жилийн ойд зориулсан, Монгол Улсын улам нэмэх начин Чулууны Баасанхүүгийн нэрэмжит барилдаан, Баянхонгор аймгийн Баян-Өндөр, Бөмбөгөр, Галуут, Хүрээмарал, Эрдэнэцогт сумдын 100 жилийн ойд зориулсан барилдаан, Ардчиллын төлөөх намуудын баярт зориулсан барилдаанд үзүүрлэж байв.
БАРИМТ 21
Тэрбээр Бөхийн өргөөний сумын цолтой болон залуу бөхчүүдийн барилдаанд барилдаж байгаагүй.
БАРИМТ 22
Харин аймаг цэргийн цолтны барилдаанд цөөхөн барилдахдаа хоёр удаа гурав, нэг удаа дөрөв, нэг удаа тав давж байжээ. Тодруулбал, тэр 2022 оны гуравдугаар сард болсон Завхан аймгийн Шилүүстэй сумын харьяат, аймгийн арслан Жамбажамцын Сүхбатын нэрэмжит барилдаанд тав давсан.
БАРИМТ 23
Тэрбээр Улсын аварга Ч.Санжаадамбыг Цэргийн арслан цолтой байхаас дэмжсэн гэдэг. "Унахад нь өөрөө унасан юм шиг бухимддаг байсан" хэмээн тэр дурсаж байлаа.
БАРИМТ 24
Э.Батмагнай "Хонгор нутаг" дууг дуулсан Э.Энх-Эрдэнийн хамаатан ажээ.
Сэтгэгдэл (16)