ЭШЛЭЛ 1
Ардчилсан намын бүлгийн дарга О.Цогтгэрэл: Ардчилсан нам төр иргэндээ эдийн засгийн боломжийг авчрах, төрийн дарамтыг бууруулах ёстой гэх үзэл баримтлалтай. Өнөөдөр 320 мянган иргэн, аж ахуй нэгжийн 6.5 их наядын татварын өр, татварын хүү, алданги хуримтлагдсан байна. Өнгөрсөн жил 3.5 их наядын татварын өртэй иргэн, аж ахуй нэгж байсан бол нэг жилийн дотор 6.5 их наядын татварын өр, хүү болон торгууль төлбөр хуримтлагдсан байна.
ЭШЛЭЛ 2
Би Эдийн засгийн эрх чөлөөний тухай хуулийн төслийг боловсруулж байгаа. Энэ хүрээнд татварын өршөөлийн асуудлыг ярих цаг нь болсон гэж үзэж байна. Улс орнуудын хувьд 10 жилийн давтамжтай өршөөлийн асуудлыг эргэж хардаг практик хүртэл байдаг. Татварын өршөөлд аж ахуй нэгжийг 100 хувь хамруулахаар татвараа төлсөн компани нь хохирдог тал бий. Хуулиа хэрэгжүүлсэн аж ахуй нэгж сэтгэл дундуур үлдэх нөхцөл байдал үүсдэг. Тэгэхээр 100 хувь биш хуримтлагдсан татварынх нь 10-30 хувийг нь өршөөх байдлаар зохицуулалт хийх боломж бий. Татварын өршөөл үзүүлэх хэрэгтэй гэдэг бодлого барьж ажиллаж байна.
ЭШЛЭЛ 3
Тамхины хяналтын тухай хуульд өөрчлөлт оруулах хуулийн төслийг энэ долоо хоногт УИХ-аар хэлэлцэж эхэлнэ. Нэг хайрцаг янжуур тамхинд 800 орчим төгрөгийн Онцгой албан татвар төлдөг юм байна. Тав орчим жилийн хугацаанд Онцгой албан татварыг үе шаттай нэмэгдүүлснээр тамхинд ногдуулах Онцгой албан татвар 10 мянган төгрөг болж нэмэгдэхээр байна. Нэг хайрцаг тамхи 4000-5000 төгрөгөөр худалдаалж байгаа бол ирэх жилээс 10-20 мянган төгрөг болохоор байна.
ЭШЛЭЛ 4
Ардчилсан намын бүлгийн дэд дарга Б.Жаргалан: Ардчилсан нам татварын өр төлбөр, татварын дарамтыг хэрхэн бууруулах дээр Засгийн газраас бодлого шийдвэрийг шаардаж ажиллаж байна. Харамсалтай нь сая 2026 оны төсөв өргөн барихдаа шинэ Засгийн газар татварын хууль тогтоомжид шинэчлэлийг огт хийсэнгүй. Ганц яригдсан нь НӨАТ-ын буцаан олголтыг нэмэгдүүлэх тухай байсан ч ирэх оны аравдугаар сар хүртэл хойшлуулсан.
ЭШЛЭЛ 5
Татвар төлөгч иргэд, аж ахуй нэгждээ ойрхон, татвар төлөгч иргэдийн эрх ашгийг хамгаалсан бодлогыг Засгийн газар хэрэгжүүлэх ёстой байтал төсвийн орлого нь төрийн өмчит компаниас хамаарсан, уул уурхайд суурилсан компаниас хамааралтай болсон учраас эдгээр аж ахуй нэгждээ үйлчлэх жишиг рүү орж байна. Энийг халахгүй бол цаашид ардчилал эрх чөлөөнөөс ухрах ухралт зогсохгүй байна. Цаашид Монголын эдийн засгийн эрх чөлөөг бэхжүүлэхийн тулд татварын дарамтыг багасгах, төрийн өмчит компани болон томоохон аж ахуйн нэгжээс хамааралтай бодлогыг сааруулах бодлого хэрэгжүүлэх ёстой гэж үзэж байна.
Сэтгэгдэл (6)