ЭШЛЭЛ 1

13-17 настай сурагч тутмын нэг нь янжуур, дөрвөн хүүхдийн нэг нь электрон тамхи хэрэглэж байна.

ЭШЛЭЛ 2

Электрон тамхи ба уламжлалт янжуур гэж ялгалгүйгээр, ижил хуулийн зохицуулалтад оруулахыг эрмэлзсэн нь хуулийн төслийн нэг чухал зорилт.

ЭШЛЭЛ 3

Тамхи татах нь хувь хүний сонголт ч үр дагаврыг нийтээрээ амсдаг тул нийгмийн эрүүл мэндийг төрийн бодлогоор хамгаалж, зохицуулах шаардлагатай.

ЭШЛЭЛ 4

Тамхины онцгой албан татварыг хүүхэд залуусын хөгжил, тамхины эсрэг тэмцэлд зориулна.

ЭШЛЭЛ 5

Тамхи татах нь хувь хүний сонголт гэж бид ярьдаг. Гэвч хувь хүн болж төлөвшиж амжаагүй хүүхэд, өсвөр үеэ бид хувь хүний сонголт нэрийн дор орхигдуулж байна.

ЭШЛЭЛ 6

Хүүхэд ордог хүнсний дэлгүүр тамхи сурталчилдаг үзэсгэлэн биш.

ЭШЛЭЛ 7

Олон арван мянган эцэг эх, эмч, багш нар Тамхины хяналтын тухай хуулийг батлагдахыг итгэл тавин хүлээж байна.

ЭШЛЭЛ 8

Тамхины лоббины мөнгө нь ирээдүй хойч үеийнхээ эрүүл мэнд, амь насыг золиослож олсон мөнгө гэдгийг анхааруулах нь зүйтэй.

ЭШЛЭЛ 9

Нийгмийн эрүүл мэнд бол нэг хэсгийн бизнесийн орлогоос эрхэм зүйл.

ЭШЛЭЛ 10

Янжуур тамхины татварыг нэмэгдүүлэхгүй байх нь жилд 4,300 хүн буюу бүхэл бүтэн нэгээс хоёр сумын иргэдээ үхэл рүү түлхэж байгаатай яг адил зүйл юм.

ЭШЛЭЛ 11

Электрон тамхийг хуулиар зохицуулахгүй байх нь хүүхэд залуусаа бүх төрлийн хорт зуршилд донтох эрсдэл рүү бид сайн дураараа хөтөлж байгаатай ижил.

ЭШЛЭЛ 12

Ямар ч төрлийн тамхи хортой нь үнэн. Хортой бүтээгдэхүүн зохицуулалттай байх ёстой нь ч үнэн. Харин тамхины эсрэг тэмцлийг бид хожимдож эхлүүлж байна.

ЭШЛЭЛ 13

2020 онд 47 мянган ширхэг электрон тамхи хилээр орж ирсэн бол энэ тоо 2024 онд 8.2 сая ширхэг болж, 175 дахин өсжээ.

ЭШЛЭЛ 14

Хор багатай гэх ташаа ойлголт нь элдэв төрлийн амт, үнэртэй хослохоороо 10 настай балчруудыг хүртэл электрон тамхины хэрэглэгч болгож байгаа сэтгэл эмзэглүүлэм баримтуудыг багш, аав, ээжүүд ярьж байна.

ЭШЛЭЛ 15

Тамхи бол жимсний амттай зайрмаг биш. Тамхи бол эрүүл мэндэд хортой бүтээгдэхүүн.

ЭШЛЭЛ 16

Тамхи татагчдын 90% нь 18 наснаасаа өмнө, 99% нь 26 наснаасаа өмнө татаж эхэлсэн байдаг. Тиймээс л өсвөр насныхнаа тамхидалтаас хамгаалах нь хамгийн оновчтой бодлого.

ЭШЛЭЛ 17

Гэхдээ үүнийг засаж, залруулах арга хэмжээ авах нь улс үндэстэн, үр хүүхдийнхээ өмнө хүлээсэн, ард иргэдийн төлөөлөл болсон та бидний үүрэг юм.

ЭШЛЭЛ 18

Тамхийг гудамж, талбайд алхангаа ил татахыг хориглож дам тамхидалтын хор хөнөөлөөс иргэдээ хамгаална.

УИХ-ын гишүүн О.Номинчимэг тамхины хяналтын тухай хуулийн нэмэлт өөрчлөлт оруулах тухай хуулийн төслийг УИХ-ын чуулганд танилцууллаа. Түүний хэлсэн үгнээс бид онцох эшлэлүүдийг хүргэж байна.