БАРИМТ 1
Тэрбээр он гараад 30 нас хүрсэн.1996 оны гуравдугаар сарын 16-нд төрсөн.
БАРИМТ 2
Баянхонгор аймгийн Хүрээмарал сумын уугуул.
БАРИМТ 3
Тэрбээр бага насандаа бөх болох сонирхолтой, хөдөлгөөнтэй хүүхэд байв. Анх 12 настайдаа үндэсний бөхийн барилдаанд бүртгүүлэхээр очиход нь Гавьяат дасгалжуулагч Ц.Шийрэв түүнийг Спортын төв ордонд ирэхийг урьж, улмаар өнөөдрий цуут бөх ийн мэндэлжээ.
БАРИМТ 4
Хожим нь Ц.Цогтбаатар манай сайтад өгсөн ярилцлагадаа “Намайг 12-той байхад Монгол бөхийн өргөөнд бага насны хүүхдүүдийн үндэсний бөхийн “хуурнин шуугигч” гэдэг барилдаан болох зар дуулаад аавтайгаа эртлэн босч бүртгүүлэхээр таксидаад иртэл бүртгэлийн хураамжны төлбөр дутчихсан. Тэгээд аав маань ээжид мөнгө захиад ирэх зуур бүртгэлийн хугацаа дуусчихав. Барилдааны бүртгэлд хамрагдаж чадаагүйдээ харамсч, хор шар их хөдөлж Монгол бөхийн өргөөний хүйтэн шалан дээр уйлж суухад аав, ээж хоёр минь хүүгээ өрөвдсөн үү, тэр өдөртөө Ц.Шийрэв багштай уулзаад шавь оруулж билээ. Тэр өдрөөс өнөөдрийг хүртэл жүдогоороо барилдаж явна” хэмээсэн байдаг.
БАРИМТ 5
Олуулаа өссөн түүнд бэлтгэлийн кимоно авах мөнгө байгаагүй тул тэеквондогийн кимонотой бэлтгэлдээ очдог байжээ.
БАРИМТ 6
Тэрбээр энэ талаараа “Бага зэрэг том кимоно байсан болохоор хоёр талаас нь ханзлаад, эмжээрийг нь багасгаж өөртөө тааруулж өмсч байлаа. Аав цагаан даавуун материалаар бүс хийж өгсөн дөө. Тэгэхэд шигшээгийн ах эгч нар сүрдмээр гоё харагдана. Хэзээ энэ хүмүүс шиг сайн жүдоч болох бол гэж битүүхэн мөрөөддөг байв. Аз авчирч, амжилт дагуулах кимоно байж л дээ” хэмээн ярьсан.
БАРИМТ 7
Ц.Цогтбаатар нь жүдо бөхийн -73 кг жинд ДЭЛХИЙН БӨХ болтлоо өөрийгөө бэлдсэн. Хэвлэлд өгсөн нэгэн ярилцлагадаа “Багш надад бэлтгэлдээ ир, бэлтгэлээ битгий тасал гэж нэг удаа ч хэлэх шаардлага гардаггүй байлаа. Би бэлтгэлээсээ хоцрохоороо бараг өөрөө уйлчихдаг байсан. Хоцрох угийн дургүй. Хоцорсон юм нэг цаагуураа л бүтэмж муутай байдаг шиг санагдаад байдаг юм. Бэлтгэл эхлэхээс хамгийн доод талдаа 30 минутын өмнө ирээд хувцсаа өмсөөд тэрүүгээр ганцаараа гүйж харайж тоглоод халаад байж байна” хэмээн ярьжээ.
БАРИМТ 8
Ц.Цогтбаатар “Рио 2016” олимпын наадмын гуравдугаар тойрогт БНСУ-ын жүдоч Ким Вон Жинд вазари үнэлгээгээр ялагдаж байв. Тэмцээний дараа толгой гудайлган сууж байсан Ц.Цогтбаатар таван жилийн дараа “Токио 2020” олимпийн наадмаас хүрэл медаль хүртэж Монгол Улсдаа дахин нэг олимпын медаль авч ирсэн юм.
БАРИМТ 9
Монголын спортын салбарын шилдгүүдийг тодруулдаг “Бөртэ чоно” наадмын шилдгийн шилдэг эрэгтэй тамирчнаар тодорч байсан.
БАРИМТ 10
2022 оны жүдо бөхийн насанд хүрэгчдийн ДАШТ-д тэрбээр алтан медалийн төлөө Японы Соичи Хашимототой барилдаж, ялснаар дэлхийн аварга болсон.
БАРИМТ 11
Түүнийг дэлхийн аварга болсны дараа Дэлхийн жүдо бөхийн холбоо “Ц.Цогтбаатар бол Монголын эрдэнэ. Тэр дараагийн удаа Монголын төрийн дууллыг дэлхийд цээжлүүлэх байх” хэмээн онцолсон.
БАРИМТ 12
Тэрбээр Гавьяат дасгалжуулагч Ц.Шийрэв, Л.Алтанзул, Ш.Чинсанаа нарын шавь аж.
БАРИМТ 13
Ц.Цогтбаатарын эхнэр О.Энхжин мөн жүдо бөхийн тамирчин. Тэд бэлтгэл дээр танилцаж байжээ.
БАРИМТ 14
Ц.Цогтбаатарыг “Токио 2020” олимпын наадамд явахаас хоёр сарын өмнө тэдний хүү мэндэлсэн.
БАРИМТ 15
Ц.Цогтбаатар 2013 онд АНУ-ын Майами хотод зохиогдсон өсвөрийн жүдо бөхийн ДАШТ-ээс хүрэл медаль хүртсэн. Уг амжилтыг үзүүлсэн анхны Монгол хүн болсноор бөх сонирхогчдын анхааралд өртөж эхэлсэн юм.
БАРИМТ 17
Түүний дараа залуучуудын дэлхийн аварга шалгаруулах тэмцээнээс мөнгөн медаль хүртсэн. Тэр цагаас хойш түүний амжилтын буухиа тасарсангүй явсаар 2016 онд Азийн аварга шалгаруулах тэмцээнээс хүрэл медаль хүртсэн.
БАРИМТ 18
МУГТ Ц.Цогтбаатарын амжилтаас дурдвал, Залуучуудын ДАШТ-ий хошой мөнгө, Азийн аваргын алт, хүрэл медаль, Мастерс, Их дуулга, Гранпри тэмцээний гурван алт, хоёр мөнгө, долоон хүрэл медаль, дөрвөн удаагийн улсын аварга, Олимпын хүрэл медаль, Дэлхийн аварга шалгаруулах тэмцээний алтан медаль хүртжээ.
БАРИМТ 18
Өнгөрсөн 2021 онд Ц.Цогтбаатарыг Монгол Улсын Ерөнхийлөгчийн зарлигаар “Сүхбаатарын одон”-гоор шагнасан.
БАРИМТ 19
Харин 2022 онд Монгол Улсын гавьяат тамирчин цол хүртсэн юм.
БАРИМТ 20
Тэрбээр хамгийн сүүлд 2023 оны есдүгээр сард Азийн наадмаас хүрэл медаль хүртсэн. Улмаар дараа жилийн хавар нь хүнд бэртэл авч их спортоо 2 жил орчим хугацаанд орхиод байлаа.
