БАРИМТ 1
1989 оны 12 дугаар сарын 21-нд Ховд аймгийн Чандмань суманд мэндэлжээ.
БАРИМТ 2
"Ховд" дэвжээ, "Хилчин" спорт хороо, "Нью Прогресс" групп, "Хос Алтайн Хүчтэн" ХХК, ХЦ-0108 дугаар ангийн бөх.
БАРИМТ 3
Биеийн өндөр 178 см, биеийн жин 125 кг.
БАРИМТ 4
Улсын заан Б.Пүрэвсайхан 2009 онд 20 насандаа Аймгийн заан, дараа жил нь 21 насандаа Аймгийн арслан болжээ.
БАРИМТ 5
Улмаар тэр 23 настайдаа Улсын начин, 25 насандаа Улсын харцага, 27 насандаа Улсын заан цолонд хүрсэн.
БАРИМТ 6
Түүний шинжилгээнээс допингийн төрлийн бодис илэрснээр 2018 оны хоёрдугаар сарын 01-нээс эхлэн бүтэн хоёр жил огт барилдаагүй.
БАРИМТ 7
Хамгийн анх 2011 онд Улсын баяр наадамд Аймгийн арслан цолтой барилдаж тухайн үед Аймгийн заан цолтой байсан Улсын начин Лутын Батзориг гурвын даваанд унаж байв.
БАРИМТ 8
Бөхийн өргөөнд зургаан удаа түрүүлсэн. Үүний хоёр нь чансаа өндөр Ерөнхийлөгчийн цомын төлөөх барилдаан юм. Тэр уг барилдаанд 2013, 2015 онуудад түрүүлжээ.
БАРИМТ 9
Тэрбээр мөн Бөхийн өргөөнд 13 удаа үзүүр булаасан.
БАРИМТ 10
Барилдах эрхээ хасуулсан байхдаа тэрбээр 2019 оны наадмын сорилго барилдаанд зодоглохоо мэдэгдсэн. Учир нь МҮБХ-ны тэргүүлэгчид түүний барилдах эрхийг шийтгэлийн хугацаанаас нь өмнө сэргээхээр шийдвэрлэсэн. Гэвч яг барилдааны өмнө бөхчүүдийн эсэргүүцэлтэй нүүр тулсан учир үзэгчдээсээ уучлал хүсэн толгой бөхийлгөөд бөхийн өргөөг орхиж байв.
БАРИМТ 11
Допингийн шийтгэлээ дуусгаад 2020 оны наадмаар эргэн ирж, шууд долоо даван Улсын заан цолоо баталсан. Уг наадамд тэрбээр их шөвөгт улсын аварга П.Бүрэнтөгсийг арслан цолтой түрүүлэхэд өвдөг шороодсон юм.
БАРИМТ 12
Түүний бөийн дэвжээнд хамгийн чухал өрсөлдөгч нь Улсын арслан Ц.Содномдорж гэлтэй. Б.Пүрэвсайхан харцага, заан цолонд хүрэхдээ Ц.Содномдорж арслантай тунаж байв. 2014 оны наадмаар тавын даваанд тунахад Б.Пүрэвсайхан анх удаа Ц.Содномдоржийг давж, тухайн жилээ улсын харцага цол хүртсэн. Хоёр жилийн дараа улсын наадмын долоогийн даваанд ахин тунахад Б.Пүрэвсайхан давж, улсын заан цолонд хүрсэн билээ.
БАРИМТ 13
Тэрбээр өнгөрөгч 2024 оны наадмаар тавын даваанд зүлэг дээр халтиран хүнд гэмтсэн.
БАРИМТ 14
Гэмтэл авсан Б.Пүрэвсайхан заан учраа бөхөө давсан. Гэвч тэр өрсөлдөгч бөх болох Өмнөговь аймгийн хурц арслан М.Буяндэлгэрт тахимаа өгч давуулсан. Удалгүй бөхийн комисс Б.Пүрэвсайхан зааны давааг эргүүлэн өгсөн юм.
БАРИМТ 15
Гэмтсэн учир барилдах боломжгүй болсон түүнийг зургаагийн даваанд эл наадмын түрүү бөх Дархан аварга Н.Батсуурь амлаж хий давсан.
БАРИМТ 16
Гэмтлээ эдгээх гэж бүтэн жил барилдаагүй тэрбээр 2025 оны Улсын баяр наадмаар үзүүр бөх Аймгийн хурц арслан Н.Өсөхбаярт долоогийн даваанд унасан.
БАРИМТ 17
Гэвч Н.Өсөхбаяраас допинг илэрсэн тул түүнийг долоо давсанд тооцож чимэг олгохоор болоод байна. Өөрөөр хэлбэл тэр Улсын баяр наадамд гурван удаа долоо давсан эрэмбэ өндөр заан билээ.
БАРИМТ 18
2012 онд Аймгийн арслан цолтойдоо Бүх цэргийн баяр наадамд Увс аймгийн Тэс сумын уугуул Цэргийн арслан Б.Ганзоригт унаж үзүүр булаасан.
БАРИМТ 19
Тэрбээр Сар шинийн баярт зориулсан 2022, 2024 онуудад үзүүр булаажээ.
БАРИМТ 20
Тэр бол Улсын заан Ч.Батзоригийн хамаатан билээ. Анх ах Батзориг нь түүнийг хөдөө гэртээ байхад нь бөх болгохоор Улаанбаатарт авчирсан байна. Улсын начин болтлоо тэр Батзориг ахындаа амьдарсан.
БАРИМТ 21
Тэрбээр Улсын заан Д.Бумбаярын хүргэн.
БАРИМТ 22
Ховд аймгийн Мөст сумын уугуул Аймгийн арслан Ц.Төмөрцоож түүний хүргэн юм. Дүүтэй нь гэр бүл болжээ.
БАРИМТ 23
Тэрбээр Аварга биеийн тамирын дээд сургуулийг төгссөн.
БАРИМТ 24
Хэрвээ бөх болоогүй бол нягтлан болох байсан тухайгаа тэр "Хачиртай бантан" подкастын үеэр ярьж байв.
