БАРИМТ 1

Жамбын Батмөнх нь 1926 оны гуравдугаа сарын 10-нд төрсөн.

БАРИМТ 2

Монголын сүүлчийн коммунист удирдагч юм.

БАРИМТ 3

Тэрбээр Монголын төрийн зүтгэлтэн засгийн газрын тэргүүний алба хашиж байсан эрдэмтэн, профессор хүн юм.

БАРИМТ 4

БНМАУ-ын төрийн тэргүүн (1984-90), засгийн газрын тэргүүн (1974-84), эрх баригч МАХН-ын удирдагч (1984-90)

БАРИМТ 5

Тэрээр Увс аймгийн Хяргас суманд төрсөн Баяд ястан юм.

БАРИМТ 6

1939-1951 онд Хяргас сумын бага сургууль, Улаангом хотын дунд сургуулийг төгссөн. 

БАРИМТ 7

МУИС-ийг тус тус төгсөж эдийн засагч мэргэжил эзэмшжээ. 1958-1961 онд ЗХУКН-ын дэргэдэх Нийгмийн ухааны акедемид суралцан эдийн засгийн ухааны дэд эрдэмтний зэрэг хамгаалжээ.

БАРИМТ 8

1948 онд МАХН-ын гишүүнээр элссэн.

БАРИМТ 9

1951-1958 онд МУИС, УБДС, НДС-д багш, тэнхимийн эрхлэгч, орлогч захирал, 1962 оноос ЭЗДС-ийн захирал, 1967-1972 онуудад МУИС-ийн проректор, ректороор ажиллажээ.

БАРИМТ 10

Мэргэжилтэй боловсон хүчин бэлтгэхэд гаргасан зүтгэлийг нь үнэлж профессор цол олгожээ.

БАРИМТ 11

1973 онд МАХН-ын Төв Хорооны Шинжлэх ухаан, боловсролын хэлтсийн эрхлэгчээр томилогдон ажиллаад, 1974 онд БНМАУ-ын Сайд нарын Зөвлөлийн орлогч дарга, мөн оны 6 сард БНМАУ-ын Сайд нарын Зөвлөлийн дарга буюу ерөнхий сайдаар томилогдсон. 1984 он хүртэл БНМАУ-ын 13 дахь ерөнхий сайдаар, 1984-1990 онд АИХ-ын Тэргүүлэгчдийн даргаар буюу төрийн тэргүүнээр ажиллажээ.

БАРИМТ 12

БАРИМТ 13

1971-1990 онд МАХН-ын Төв Хорооны гишүүн, 1974-1990 онд МАХН-ын Төв Хорооны Улс төрийн товчооны гишүүн, 1984-1990 онд МАХН-ын Төв Хорооны Ерөнхий нарийн бичгийн дарга буюу намын тэргүүнээр сонгогдон ажилласан.

БАРИМТ 14

1990 оны 3 сард Ардчилсан Холбоо байгуулагдаж, Ж.Батмөнхөөр удирдуулсан Улс төрийн товчоог огцрохыг шаардсан өлсгөлөн зарлажээ. Ж.Батмөнх Монголд ардчиллыг хөгжүүлэх, улс орныг зах зээлийн харилцаа, олон намын тогтолцоонд шилжүүлэх явдалд эрх баригч намын болон төрийн тэргүүний ухаалаг бодлого явуулсан бөгөөд үүнийг нь ардчиллын алтан хараацайнууд ихээхэн үнэлж дурсдаг.

БАРИМТ 15

1997 оны тавдугаар сарын 14-нд насан эцэслэсэн.

БАРИМТ 16

Ардчилсан нийгэм эхлэж, 1997 онд насан эцэслэх хүртлээ Улаанбаатарт эгэл жирийн амьдарсан.

БАРИМТ 17

Түүнийг нас барсны дараа МУИС-ийн ЭЗДС-ийн өмнөх талбайг түүний нэрэмжит болгож, гэрэлт хөшөөг нь босгож мөнхжүүлжээ.

БАРИМТ 18

Мөн төрсөн нутаг Хяргас сумын төвд нь 2009 онд гантиг чулуун дээр дүрийг нь сийлсэн гэрэлт хөшөөг нутгийнхны хөрөнгөөр босгожээ. 

БАРИМТ 19

Тэрбээр 1986 онд 60 насныхаа ойгоор Сүхбаатарын одон, ЗСБНХУ-аас Лениний одонгоор шагнагдсан.

БАРИМТ 20

Тэрээр өөрчлөлт, шинэтгэлийг аажим алгуурхнаар хийхийг зорьж байсан ч хэт хаширласан, шинэтгэлийн программ байхгүй зэргээс түүний сэдэж байсан ажил хэрэг амжилтад хүрээгүй юм.

БАРИМТ 21

Өөрчлөлт, шинэчлэлийг түргэтгэх шаардлага тавьж гарч ирсэн Монголын Ардчилсан Холбоо жагсаал, цуглаан зохион байгуулж, сүүлдээ тэмцлийн хурц хэлбэр - улс төрийн өлсгөлөнг сонгон авсан байна. Улс төрийн нөхцөл байдал нэн хурцадсан тэр үед Батмөнх "хүч хэрэглэж хэрхэвч болохгүй" гэсэн хатуу байр суурь баримталж, улмаар Улс Төрийн Товчоо бүрэн бүрэлдэхүүнээрээ огцрох шаардлагыг хүлээн авч улс төрийг орхижээ. Түүний шийдвэр нь ардчилсан хувьсгал тайван замаар үргэлжлэх түүхэн боломжийг нээн өгсөн билээ.

БАРИМТ 22

Түүний гэргийг Авирмэдийн Дариймаа гэдэг. 

БАРИМТ 23 

Түүний эхнэр Дариймаа гуай ярихдаа "Ийш тийшээ хэлэлцээр, уулзалтаар гадаад улс уруу явахдаа намайг орхиж явдаг байсан би хамт явъя гэж гуйхад улсын мөнгөөр явж байгаа болхоор хэрэггүй ээ гэж хэлдэг байсан" гэдэг.

БАРИМТ 24

Тэрбээр засгийн газрын тэргүүний албаа Юмжаагийн Цэдэнбалаас залгамжилж, Думаагийн Содномд хүлээлгэн өгсөн. Харин Ардын Их Хурлын Тэргүүлэгчдийн даргын үүрэг ажлаа Нямын Жагваралаас залгамжилж Пунсалмаагийн Очирбатад хүлээлгэн өгсөн.

1926 оны яг энэ өдөр Монгол орны баруун хязгаар нутагт хожмоо Монголын төрийг олон он удирдах хүү Жамба гэх айлынд мэндэлжээ. Өнөөдөр тэрхүү хүмүүний 100 насны ой тохиож байна. Ингээд бид та бүхэнд Ж.Батмөнх агсны тухай сонирхолтой 24 баримтыг онцолж байна.