ОХУ-ын Сибирь болон Алс Дорнодын бүс нутагт баавгай хүн рүү халдах тохиолдол эрс нэмэгдэж, зөвхөн есдүгээр сард дор хаяж 16 хүн амиа алдсан талаар CNN мэдээллээ. Тус улсын Байгалийн нөөц, экологийн яамны мэдээллээр ОХУ-д жилд дунджаар 20-30 удаа баавгай хүн рүү халддаг байна. Харин энэ онд баавгай 40 гаруй бүс нутагт суурьшлын бүсэд нэвтэрч, иргэдэд аюул учруулах болжээ.
Нөхцөл байдал ялангуяа Сибирийн Красноярскийн хязгаарт хүнд байгаа аж. Тус бүс нутагт долоон хүн баавгайн халдлагын улмаас амиа алдсан байна. Тухайлбал, өнгөрсөн долоо хоногт 51 настай эмэгтэй гэрээсээ гарч явахдаа баавгайд дайруулж, амь насаа алджээ.
Мэргэжилтнүүдийн үзэж буйгаар энэ жилийн байгаль, цаг уурын нөхцөл байдал баавгай хүн рүү ойртох шалтгаануудын нэг байж болзошгүй байна. Хуурай, эрт эхэлсэн хаврын улмаас зарим бүс нутагт жимс, ургамлын гарц багассан нь баавгайг хоол хүнс хайж суурьшлын бүс рүү ойртоход хүргэсэн байж болох аж.
Мөн хүмүүсийн ил задгай хаясан хүнсний хог хаягдал баавгайг суурин газар руу татах нэг хүчин зүйл болж байна. Сүүлийн хоёр сарын хугацаанд Сибирь болон Алс Дорнодын дор хаяж 10 бүс нутагт баавгайн идэвхжил нэмэгдсэнтэй холбоотойгоор иргэдэд сэрэмжлүүлэг хүргүүлжээ. Зарим бүс нутагт шөнийн цагаар зорчих хөдөлгөөнийг хязгаарлаж, аялал жуулчлалын газруудыг түр хаасан байна.
Красноярскийн эрх баригчид баавгайн халдлагаас сэргийлэх зорилгоор жуулчдын ихээр зорьдог Красноярскийн багануудын үндэсний цэцэрлэгт хүрээлэн болон Торгашинскийн давааг түр хугацаагаар хаажээ.
ОХУ-ын Засгийн газар баавгайн халдлага нэмэгдэж байгаатай холбоотойгоор тоо толгойг зохицуулах арга хэмжээ боловсруулж эхэлсэн байна. Үүнд агнуурын квотыг нэмэгдүүлэх, бүс нутаг бүрт баавгайн тоо толгойн дээд хязгаар тогтоох зэрэг санал багтжээ.
Л.Баяр
