Баянхонгор аймагт сувилагчийн буруутай үйл ажиллагаанаас болж түлэгдсэн охины биеийн байдлын талаар эрүүл мэндийн сайд Н.Удвал болон ГССҮТ, ЭХЭМҮТ-өөс эмч мэргэжилтнүүд өнөөдөр хэвлэлийн хурал хийсэн. Тэдний яриаг хүргэж байна.

Н.Удвал: Салбарынхаа нэрийн өмнөөс уучлалт хүсч байна.

Баянхонгор аймгийн нэгдсэн эмнэлэгт эрүүл саруул төрсөн хүүхэд сувилагчийн хариуцлаггүй байдлаас болж түлэгдэж эрүүл мэндээрээ хохироод эмчилгээ хийлгэж байгаа хүүхдийн ар гэрийнхнээс салбарынхаа нэрийн өмнөөс уучлалт гуйж байна.

Би сайд болохдоо хэлж байсан. Эрүүл мэндийн байгууллага эмнэлэгийн ажилчдын буруутай үйл ажиллагаанаас нэг ч монгол хүний эрүүл мэнд, амь нас хохирох ёсгүй.

Баянхонгор аймагт эмнэлэг нь байна. Төрөх тасаг нь байна. Эмч сувилагч нар нь байна. Тэнд хэрэгтэй багаж тоног төхөөрөмж бүгд байна. Төрөөд дөрвөн хоног болсон нярайг 2013 оны нэгдүгээр сарын 1-нд нийслэлд авч ирэн ГССҮТ-ийн хүлээн авах яаралтай тусламжийн тасагт 14.10 цагт үзүүлсэн.



ГССҮТ-ийн эмчилгээ эрхэлсэн орлогч дарга Б.Баттөгс: Нярайн биеийн байдал маш хүнд ирсэн.


-Нярайн ууц, өгзөг, салтаа, гуя, шилбэ, хөлийн тавхай гээд биеийн 55 хувь буюу гуравдугаар зэргийн түлэгдэлттэй байсан. Нярай түлэгдэлтийн улмаас шоконд орж, хордлогын байдалтай, биеийн байдал маш хүнд ирсэн.

ГССҮТ-өөс тухайн өдөр нь яаралтай хордлого тайлах, халдварын эсрэг зэрэг эмчилгээний арга хэмжээг авч, улмаар нэгдүгээр сарын 2-ны өдөр эмч нарын хамтарсан үзлэгийг нярайн эмчийн хамтаар хийлээ.

Өнөө өглөө нярайг 10.00 цагт ЭХЭМҮТ-ийн нярайн тасагт шилжүүлсэн. Гэхдээ манай эмнэлэгийн эмч нар хамтарч ажилласаар байх болно гэсэн юм.


ЭХЭМҮТ-ийн Хүүхдийн эмнэлэгийн нярайн эмгэг судлалын тасгийн эмч н.Энхтуяа: Охин орчиндоо харьцаатай, уйлах дуу чангатай, хөхөө хөхөж байгаа.

-Нэгдүгээр сарын 03-ны 10.00 цагт зургаан хоногтой, эмэгтэй хүүхэд шилжиж ирсэн. Хүүхдийн биеийн байдал хүнд байна. Гэхдээ хүүхэд орчиндоо харьцаатай, уйлах дуу чангатай, хөхөө хөхөж байгаа. Ер нь эмнэлэгийн стандартад хүүхдийг усанд оруулах тодорхой батлагдсан стандарт байдаг. Гэтэл энэ стандартыг зөрчсөн тохиолдол ингэж гарсан байна. Цаашдаа түлэгдэлтийн үед нярайд гардаг олон хүндрэлүүд байдаг. Одоогоор нярайн түлэгдсэн биеийн хэсэг их тул хүүхдийн цусанд үрэвслийн өөрчлөлт гарсан тийм учраас халдвараас сэргийлэх эмчилгээ хийж байна. Мөн шингэн алдалт, бөөрний үйл ажиллагаа алдагдах, цусархаг хам шинж зэрэг хүндрэлүүд түлэгдэлтийн үед гардаг. Цусархаг хам шинж хүүхдэд илэрч, шилбэний жижиг судсуудаас цус шүүрэх байдал нэлээн байна. Манай эмнэлэг шаардлагатай бүх эмчилгээг хийж байна гэлээ.

Хүүхэд усанд оруулах үйл явцыг сувилагч хариуцан хийх учиртай бөгөөд ингэхдээ усны халууныг термометрээр үзэх эсвэл сувилагч гарын тохойг урьдчилан дүрж үзэх ёстой. Гэтэл тухайн үед нярайг усанд оруулсан сувилагч н.Цэрэнлхам гэгч нь усыг огт шалгалгүйгээр хүүхдийг түлжээ. Сувилагчийг шинэ жилээ тэмдэглээд согтуу байсан талаарх мэдээлэл тархаж байгаа ч үүнийг одоогоор батлах боломжгүй гэдгийг ЭМ-ийн сайд хэлж байлаа. Юутай ч Баянхонгор аймгийн цагдаагийн газарт сувилагчид эрүүгийн хэрэг үүсгэн шалгаж байгаа ажээ.

Мөн Баянхонгор аймгийн засаг дарга хэргийн талаар тайлан бичиж байгаа тул тун удахгүй энэ үйл явдлын талаарх тодорхой баримт олонд дэлгэгдэнэ гэдгийг ЭМ-ийн сайд хэллээ.