Дорноговь аймгийн Улаанбадрах суманд уран олборлосноос болж хоёр толгой хурга, эрүүгүй ишиг, сохор ботго, явж чадахгүй төл гарч байгаа талаар тус сумын малчид ярьж байгаа. Цаашлаад  мал үрэгдэх, малчдын эрүүл мэнд доройтох, байгаль орчин бохирдох сүйдэх зэргээр төрөл бүрийн хохирол гарч эхэлжээ. Малчид энэ бүх хохирлыг нутагт нь үйл ажиллагаа явуулдаг Францын "Арева" группийн охин компани “Кожеговь”-той холбон тайлбарлаж байгаа юм. Тус компани л уран олборлосноос болж энэ бүх хохирол гарч, бид айдас хүйдэс дунд амьдарч  байна хэмээн малчид учирлаж байгаа юм.

    Гэсэн ч  Улаанбадрах сумын малчид энэхүү хүнд бэрх байдлыг эс хүлцэн, ураны хайгуулыг цуцлан зогсоож өгөөч гэж удаа дараалан зохих байгууллагуудад хандсан ч шийдвэр бүр "Кожегоби" компанийн талд гарсан. Бүр Ерөнхий сайд Н.Алтанхуягийн захирамжаар Дорноговь аймгийн хэд хэдэн суманд 14 мэргэжлийн байгууллагын хамтарсан  шалгалт, шинжилгээ хийхэд мөн л ураны нөлөөллөөс болоогүй байна гэсэн хариу гарсан юм.

    Тиймээс тус компани одоо ч ураны олборлолт, хайгуулаа Дорноговь аймагт үргэлжлүүлэн хийж байгаа аж.

     Гэвч нутгийн малчид шударга шаардлагаа үргэлжлүүлэн тависаар байна. Өдгөө Улаанбадрах сумын малчид санаа нэгдэн эсэргүүцэж 319 өрхийн гомдлыг цуглуулж төрийн гурван өндөрлөгт өргөх бичиг барьж байгаа юм. Тэнд зөвхөн малчин Норсүрэнгийн өрхөд бус, бусад бүр өрх айлд ураны хайгуултай холбоотой хохирол гарсан байна. Ер нь бүх айлд 2011 оноос ураны хайгуултай холбоотой байх өндөр магадлалтай байдлаар зарим айлд 30 гаруй мал хорогдсон байх аж.  Хохирол гарсан байдал хүрээ хэмжээгээ тэлсээр байгаа учир Улаанбадрахын иргэдтэй цөмийн эсрэг тэмцэгчид нэгдэж эсэргүүцлээ илэрхийлж байгаа юм. 
    Тус суманд Д.Норовсүрэнгийн арван үхрээс гадна, 3 багийн иргэдийн нийт 1000 гаруй мал учир битүүлгээр үрэгдсэн.  Мөн  2010 оны 12 дугаар сараас 2011 оны 5 дугаар сар хүртэлх хугацаанд  туршилтын олборлолт явуулснаас хойш 21 айл өрхөд гажигтай төл гарч, мал зүй бусаар хоргодсон байна. Ингээд Улаанбадрахын үнэн төрхийг доорх зургуудаас үзнэ үү?