Томоохон хэргүүдийн мөрдөн байцаалтын явц, шийдвэрлэлт хийгээд өнгөрсөн долоо хоногийн гэмт хэргийн тоймыг хүргэж байна.

З.Баянсэлэнгийн гар хөл бологсод 5 сар хоригдсондоо бухимдаж явна

МАХН-аас нэр дэвшигч Н.Хишигсүрэн, түүний туслах Б.Гал-Эрдэнэ, Г.Сүхбаатар, Ш.Гантулга, МАН-аас нэр дэвшигч Ц.Бугасүрэн, түүний менежер Ч.Батманлай нар хоёр сая 460 мянган төгрөгийг иргэдэд тарааж, МАН-аас нэр дэвшигч Т.Ганболдын болон тус хорооны иргэдийн сонгох, сонгогдох эрхээ хэрэгжүүлэхэд санаатай саад хийсэн гэмт хэрэг үйлдсэн болох нь мөрдөн байцаалтын явцад тогтоогдсон байдаг.  Улмаар тэдэнд шүүхээс тус, тусын ялыг оноосон. Тодруулбал, МАН-аас нэр дэвшигч, хэргийн захиалагч, зохион байгуулагч Ц.Бугасүрэн болон түүний менежер Ч.Батманлай нарт  шүүхээс таван сарын ял оноож,  МАХН-аас нэр дэвшигч Н.Хишигсүрэнд дөрвөн сарын ял, бусдад нь гурван сар 10 хоногийн ял тус тус оноосон бол  МАХН-аас нэр дэвшигч Н.Хишигсүрэнд дөрвөн сарын ял, бусдад нь гурван сар 10 хоногийн ял тус тус оноосон юм. Тэгвэл тэд Дээд шүүхэд гомдол гаргасан бөгөөд Дээд шүүхээс уг хэргийг нэмэлт мөрдөн байцаалтад буцаасан. Улмаар өчигдөр Баянзүрх дүүргийн шүүхэд хэргийг хэлэлцэх байсан ч өмгөөлөгч давхардсан гэх шалтгаанаар хойшиллоо.

Харин шүүгдэгчдээс шүүх хурлын талаар тодруулах гэсэн боловч "Өмгөөлөгч давхардсан гэх шалтгаанаар хойшиллоо. Ялаа аваад эдэлчихсэн хүмүүстэй одоо юу ярихав дээ" хэмээн цааргалсан юм.

Ц.Мөнхбаяр нарт нэмж хэрэг үүсгэсэн ч тэд давж заалдлаа

 “Гал үндэстэн” холбооны тэргүүн Ц.Мөнхбаяр нар Дүүргийн эрүүгийн хэргийн давж заалдах шатны 10 дугаар шүүхэд   өнгөрсөн сарын 27-ны өдөр гомдол гаргажээ. Ийнхүү Ц.Мөнхбаяр нар нь давж заалдах шатны шүүхэд гомдол гаргаснаар Дүүргийн эрүүгийн хэргийн давж заалдах шатны 10 дугаар шүүхээс хурлын товыг хуульд заасан хугацаа буюу 30 хоногийн дотор товлож шүүх хурлыг хийх юм байна.

Түүнчлэн Ц.Мөнхбаяр нарын зэвсэг авсан иргэнийг саатуулаад байгаа. Тиймээс Ц.Мөнхбаяр нарт зэвсгийн хэргээх дахин шинэ хэрэг үүсгээд байгаа юм.

Өмгөөлөгч аваагүй Дамбын Хишгээгийн хүүгийн шүүх хурал ирэх долоо хоногт болно

Дамбын Хишгээгийн хүү  Х.Энхжин “Эра” төвийн багш Д.Солонгыг зодож, биед нь хүнд гэмтэл учруулсан хэрэг өнгөрсөн есдүгээр сард гарсан. Үүний улмаас Д.Солонгын нүүрний зөөлөн эдүүд бяцарч, эрүү нь хугарсан мөн биеийн бусад хэсгүүд гэмтсэн байдаг.

Д.Солонго Х.Энхжинд хандан “Аавынхаа нөмөр нөөлөгт юу ч хийж чадахгүй” гэж хэлснийхээ хариуд зодуулсан гэж эх сурвалжууд хэлж байгаа юм. Тэгвэл тус хэргийг Хан-Уул дүүргийн шүүхэд өнгөрсөн долоо хоногт шүүх байсан ч хойшиллоо. Чухам ямар учраас хойшилсоныг нь албаны эх сурвалжаас тодруулахад "  Х.Энхжинд холбогдох хэрэг  өмгөөлөгч байхгүй гэсэн шалтгаанаар ирэх сарын 14 болтол хойшлогдсон.  Тэрбээр өөрөө өмгөөлөгч аваагүй учир шүүх хуралдааныг хойшлуулахыг хүссэн" гэв.

Хоёр жил шахуу шалгасны эцэст найруулагч Г.Бадамрагчаа нарыг гэм буруугүй гэж үзлээ

Төрийн эрхийг хууль бусаар авахыг санаархсан гэх үндэслэлээр хоёр жил гаруй хугацаанд шалгагдаж байгаа Г.Бадамрагчаагийн хэргийг өнгөрсөн долоо хоногт  Дүүргийн эрүүгийн хэргийн анхан шатны II шүүхэд хянан хэлэлцсэн. Шүүх хуралд Ерөнхий шүүгчээр Ё.Цогтзандан, шүүхийн бүрэлдэхүүнд А.Алтанхуяг, С.Батгэрэл нар оролцсон байдаг.

Шүүх бүрэлдэхүүн О.Цэнгэл, Г.Бадамрагчаа нарын гурван хүнд холбогдох хэргийг авч хэлэлцээд гэмт хэргийн бүрэлдэхүүнгүй гэж үзэж, хэрэгсэхгүй болгосон юм.

Кино найруулагч Г.Бадамрагчааг “Цагдаагийн тангараг” киногоороо дамжуулж төрийн эрхийг санаатайгаар булааж авахыг оролдсон, залуусыг тусгайлан бэлтгэсэн гэж Тагнуулын ерөнхий газраас сэжигтнээр тооцон шалгагдсан юм.

Г.Алтанхүү талийгаачийг зодсон нь мөрдөн байцаалтаар нотлогдлоо

 Найз залуудаа 48 цагийн турш зодуулж амиа алдсан гэх талийгаач Цэдэн-Ишийг архины гүн хордлогоор амиа алдсан хэмээн шүүх эмнэлгийн дүгнэлт гарсан. Энэ талаар Нийслэлийн прокурорын газрын орлогч Ц.Батболдоос тодруулахад “Г.Алтанхүү түүний үхэлд нөлөөтэй эсэхийг шалгаж байна. Гэхдээ мөрдөн байцаалтын явцад Г.Алтанхүү талийгаачийг хоёр удаа зодож биед нь гэмтэл учруулж байсан нь тогтоогдсон. Тиймээс Г.Алтанхүү нь түүний үхэлд нөлөөгүй байлаа ч зодож гэмтэл учруулсан хэргээр хэрэг үүсгэх байх. Юутай ч мөрдөн байцаалтын ажиллагаа дуусахаар шийдэгдэнэ” гэлээ.
 
Баттай сурвалжийн мэдээлснээр, талийгаач эмэгтэй амиа алдахаасаа өмнө гурав хоногийн турш архи уусан байна. Энэ нь түүний үхэлд нөлөөлсөн байж болзошгүй хэмээн хэргийг үргэлжлүүлэн шалгаж байгаа аж.  Улмаар Шүүх эмнэлгийн гурван удаагийн дүгнэлтээр талийгаачийн үхлийн шалтгааныг архитай холбоотой гэж гаргажээ.

Гэвч Г.Алтанхүү зодсон нь батлагдсан учир хүнийг үхэлд хүрэхэд нөлөөлсөн, биед нь санаатайгаар гэмтэл учруулсан гэдгээр яллагдах юм.

Ч.Баттуулын 23 жилийн ялыг хэвээр үлдээв

 АНУ-ын иргэн Жон Мартин Кийнийг хөнөөсөн  гэх Ч.Баттуул өдгөө Цагдан хорих 461 дүгээр ангид хоригдож байгаа. Түүнд шүүхээс 23 жилийн ял оноосон. Тэгвэл Ч.Баттуул болон ар гэрийнхэн нь Давж заалдах шатны шүүхэд гомдол гаргасан байдаг. Шүүх хурал сар шинийн өмнө болох байсан ч өмгөөлөгч нь осолд орсон учир хойшилсон. Улмаар өнгөрсөн долоо хоногт дахин хурал зарлагдсан ч мөн л өмгөөлөгч нар өөр хуралтай гэсэн шалтгаанаар хойшилсон. Тиймээс Нийслэлийн давж заалдах шүүхээр  Ч.Баттуулын хэргийг өнгөрсөн долоо хоногт хэлэлцсэн юм. Улмаар анхан шүүхийн шийдвэрийг хэвээр үлдээлээ.  Тодруулбал, анхан шатны шүүхээс Ч.Баттуулд холбогдох хэрэгт 23 жилийн ял оноосныг хэвээр үлдээсэн юм.