Иргэн Б.Энхбаяр, Т.Сайнжаргал нарыг Монгол Улсын Ерөнхий сайдыг хардаж, хууль хяналтын байгууллагаар шалгуулсаны төлөө цагдаагийн газарт хандаж эрүүгийн хэрэг үүсгээд байгаа билээ. Тэд Монгол Улсын Ерөнхий сайд 500 гаруй сая төгрөгийг хууль бусаар зарцуулан байж болзошгүй гэсэн үндэслэл бүхий 40 хуудас материалыг хууль хяналтын байгууллагад шалгуулахаар өгсөн боловч АТГ-аас Ерөнхий сайдад хэрэг үүсгэхээс татгалзсан. Харин үүнийг Ерөнхий сайд өөрийг нь гэм буруугүйд тооцоож байна гэж үзсэн тул нэр бүхий иргэд намайг гүтгэсэн гэж өргөдөл өгснөөр тэдний хоорондын зөрчил олон хүний сонирхлыг татаад байгаа. Бусдыг санаатайгаар гүтгэн доромжлох, үг хэлэх хэвлэл нийтлэх эрх чөлөөгөөр дамжуулж хардах, түүнийгээ хууль хяналтын байгууллагаар шалгуулах нь тусдаа ойлголт. Тэгээд ч шүүхээс бусдын гэм буруугүйг тогтоодог болохоос хуулийн байгууллага хэрэг үүсгэхээс татгалзсан нь асуудлыг шийдсэн гэсэн үг биш гэдгийг хуульч мэргэжилтэй Б.Энхбаяр тайлбарлаж байна. Тэрээр "Ерөнхий сайдад хэрэг үүсгэхээс татгалзсан үндэсллээ оюуны өмчтэй зүйлд тендер зарладаггүй гэж тайлбарласан. Гэтэл оюуны өмчийн гэрчилгээ гарахаас өмнө Ерөнхий сайд энэ мөнгийг шилжүүлэх захирамж гаргасан байсан. Энэ тодорхой баримтыг л шалгах ёстой, харамсалтай нь бидэнд хариу ирүүлсэн хууль хяналтын байгууллагынхан шинжээч томилоогүй, хуулийнх нь дагуу шалгаж, дүгнэлт гаргасангүй. Бидний өгсөн баримтуудыг худал зохиомол зүйл биш, үнэн зөв баримт гэдгийг АТГ, Прокурорынхон дурьдсан байгаа юм. Тэгсэн атлаа шалгахаас татгалзаж байна гэсэн ганцхан өгүүлбэртэй. Ямар үндэсллээр яагаад шалгахаас татгалзсан талаар тодорхой юм нэг ч байхгүй, Хэрэв оюуны өмчтэй зүйлд тендер зарладаггүй гэж байгаа юм бол ядаж ямар хуульд ийм заалт байдгийг бичих хэрэгтэй" гэж байр сууриа илэрхийлжээ.