Улаанбаатар хотын банкыг хувьчлах тухай асуудал дахин сөхөгдөж эхэллээ. Дэлхийн томоохон хотууд өөрсдийн санхүүгийн бие даасан ажиллагааг хангах зорилгоор хотын банктай байдаг жишгийг нэвтрүүлж анх Ж.Наранцацралт агсан нийслэлийн засаг дарга байхдаа энэ банкыг байгуулж байсан.

Улаанбаатар хотын банк 2001-2007 онд 613.500.000 төгрөгийн ногдол ашиг хуваарилсан бол 2008-2012 онд 3 тэрбум 660 сая төгрөгийн ногдол ашиг хуримтлуулжээ. Гэтэл өнгөрөгч хугацаанд нийслэл ногдол ашиг авалгүй явж ирсэн. Үүнийгээ хотын зүгээс тус банкинд нэмж хөрөнгө оруулалт хийх боломжгүй явж ирснээс өөрийн ногдол ашгаа банкны дүрмийн санд нэмэрлэж ирсэн гэж тайлбарладаг. Гэтэл дүрмийн санд нь өөрт оногдох ногдол ашгаа нэмэрлэж ирсээр байтал нийслэл тус банкны хувьцагаа нэмэгдүүлэхийн оронд багасгаж ирсэн байгаа юм. Улаанбаатар хотын банкны нийт хувьцааны 80 хувь нь Д.Эрдэнэбилэгийн гарт орсон байдаг. Тэрээр худалдаа хөгжлийн банкны ТУЗ-ын даргаар ажилладаг бөгөөд АН-ын нөлөө бүхий эрхмүүдтэй тун ойр харьцаатай байдаг нэгэн гэнэ.

Монголын банкны салбарын хувьчлал дампуурлын эрмэгт тулахаараа явагддаг. Өөрөөр хэлбэл, ашиггүй ажиллаж буй банкийг аврах эцсийн арга нь хувьчлал болсон туршлага манайд цөөнгүй бий. Харин Улаанбаатар хотын банкны хувь заяа иймдээ тулаагүй. Тус банкийг хувьчлах болсон шалтгааныг нийслэлийн Өмчийн харилцааны газрын орлогч дарга Т.Батдорж “Үнэ цэнэтэй байгаа дээр нь хувьцаагаа зарах хэрэгтэй. Хэдэн хувийн ногдол ашиг харж байхаар үнэ цэнэтэй байгаа дээр нь хувиа зарж, арай том мөнгө босгож нийслэлийн бусад хөрөнгө оруулалт руу мөнгийг нь оруулбал илүү үр дүнтэй” хэмээн тайлбарласан байна.Тэгвэл 50 тэрбум төгрөгийн өөрийн хөрөнгөтэй банкийг анхны дуудах үнэ нь 3 тэрбум төгрөг ажээ. Энгийн амьдралаас жишээ авахад хүн өөрийн 10 сая төгрөгийн үнэтэй машинаа дуудлагаар зарлаа гэхэд 10 саяас эхэлж дуудахаас 1 саяас эхлэхгүй нь ойлгомжтой. Гэтэл Улаанбаатар хотын удирдлагууд ашигтай ажиллаж байгаа 50 тэрбум төгрөгийн хөрөнгөтэй банкаа 3 тэрбумаас дуудаж худалдах гэж байгаа нь туйлын их эргэлзээ төрүүлж байна. Дуудлага худалдааны явцад үнэ өсч эцсийн цэгтээ хүрнэ гэж байгаа ч үнэ цэнэтэй банкыг үнэгүйдүүлэн дуудаж эхлэх нь хэний санаа байсан бэ? гэдэг нь нууц хэвээрээ байна. Нөгөө талаас нийслэлд том мөнгө хэрэгтэй юм бол үнэ цэнэтэй банкаа ингэж хямдхан дуудаж эхлэх ямар шалтгаан байна? зэрэг хардалт дагуулсан олон асуулт урган гарч байгаа юм.

 Чухам яагаад 3 тэрбум төгрөг тавьсан талаар нийслэлийн өмчийн харилцааны газраас лавлахад мэргэжилтнүүд нь “дарга нарын мэдэх асуудал” гэж хаяагаа манасан байна. Эх сурвалжуудын хэлж буйгаар Нийслэлийн банкыг залгих операць тэртээ 2003 оноос эхэлсэн аж. Тодруулбал тэр үеэс нийслэлийн банкны 20 хувийг нийслэлийн сан үлдсэн 80 хувийг хөрөнгө оруулагч буюу Д.Эрдэнэбилэгт эзэмшүүлэх шийдвэр гарсан байна. МАН-ын харьяатнууд хотыг удирдаж байх хугацаанд 20 хувь дээр дэнжигнэж байсан нийтийн өмч АН-ын цаг хугацаанд хувийн өмч болон бялуу хуваах тохироонд орсон байна. Шилэн данс, ухаалаг төр яриад байгаа ардчилагчид маань энэхүү хувьчлалын талаар загас мэт чимээгүй. Хэвлэл  мэдээллийн анхаарлаас холдуулж мартагнуулах санаатай байгаа нь цаанаа учиртай. Ямар сайндаа албаны эх сурвалжаас тодруулах гэтэл “мэдэхгүй” гэж бултаж гүйх вэ дээ. Ийнхүү банк залгиж гаршсан АН-ынхан дахин нэг банкаа зооглохоор хутга сэрээгээ эрлэж суугаа нь өдрөөс өдөрт тодорхой болсоор байна.