“Монгол Улсад парламентын ардчиллыг хэрэгжүүлэхэд шууд ардчиллыг төлөөллийн ардчилалтай эн тэнцүү хөгжүүлэх шаардлагатай юм. Нутгийн өөрөө удирдах байгууллага болох Иргэдийн төлөөлөгчдийн хурал /ИТХ/-ын төлөөлөгчид бол түүнийг төлөөллөө болгон сонгосон нутгийн иргэдийнхээ дунд ажиллаж, амьдарч байдгын хувьд шууд ардчиллыг хөгжүүлэхэд гол үүргийг гүйцэтгэх ёстой” гэж УИХ-ын Тамгын газрын Ерөнхий нарийн бичгийн дарга Б.Болдбаатар өнөөдөр /2014.03.14/ болсон Хан-Уул дүүргийн ИТХ-ын төлөөлөгчдийг чадавхижуулах сургалтын нээлт дээр хэлсэн юм.Иргэдийн төлөөлөгчдийн хурлын төлөөлөгчид жилдээ нэг хоёрхон удаа цуглаж, засаг даргын тайланг сонсох, төсөв батлахад оролцох төдийгээр ажлаа хязгаарладаг нийтлэг дүр зураг орон даяар хэвшиж, тогтох хандлагатай байсныг өөрчилж, байнгын үйл ажиллагаатай, амьд байгууллага болгох, шийдвэр гаргах түвшинд иргэдийн оролцоог хангах үүргээ биелүүлж, ИТХ-ын төлөөлөгчид хариуцлагатай, санаачлагатай ажилладаг болоход аймгаас аймаг, дүүргээс дүүрэг дамжин жилийн туршид зохион байгуулагдсаар байгаа энэхүү сургалт чухал үүрэгтэй байгааг мөн тэрээр онцолж байв.
Иргэдийн төлөөлөгчдийн хурлын төлөөлөгчдийг чадавхижуулах сургалтыг УИХ-ын Тамгын газар, Швейцарын Хөгжлийн агентлаг, НҮБ-ын Хөгжлийн хөтөлбөрийн хамтран хэрэгжүүлж байгаа “Нутгийн өөрөө удирдах байгууллагын чадавхийг бэхжүүлэх нь” төслийн хүрээнд ийнхүү зохион явуулж байгаа бөгөөд нийт 8000 гаруй төлөөлөгчдийг хамруулах сургалтын ажиллагаа энэ оны 3,4 дүгээр сард явагдаж дуусна.
Сургалтыг зөвхөн төслийн хүрээнд нэг удаа хийгээд өнгөрөх биш цаашид дараа дараагийн ИТХ-ын үйл ажиллагааг дэмжих бэлэн боловсрогдсон хөтөлбөр бүхий тасралтгүй сургалтын механизм болгон хөгжүүлэх эхлэлийг тавьж байгаад “Нутгийн өөрөө удирдах байгууллагын чадавхийг бэхжүүлэх нь” төслийн бас нэг ач холбогдол оршиж байгаа аж. Мөн УИХ-ын Тамгын газар, НҮБХХ-өөс “Иргэдийн оролцоотой хууль тогтоох ажиллагааг дэмжих нь” төслийн үйл ажиллагааг дээрхи төсөлтэй зэрэгцүүлэн хэрэгжүүлж байгаа нь Монгол Улсад парламентын ардчиллыг хэрэгжүүлэх талаар төрөөс баримталж байгаа бодлого бодит биелэлээ олоход томоохон түлхэц болох юм.
Нутгийн өөрөө удирдах байгууллага болох ИТХ нь хяналтын чиг үүргээ жинхэнэ утгаар нь биелүүлэхэд ИТХ-ын төлөөлөгчдийн мэдлэг, чадвар өндөр байх шаардлага зүй ёсоор тавигддаг. Хэдийгээр өнөөдөр орон нутгийн ИТХ-ын төлөөлөгчид харьцангуй шинэ тутам бүрэлдхүүнтэй ажиллаж байгаа ч гэсэн төрөөс ийнхүү чадавхижуулах, бэхжүүлэх арга хэмжээг шат дараатай авч хэрэгжүүлсээр байна. Тухайлбал, энэ сургалтын сургагч багш нарыг аймаг, дүүрэг бүрээс сонгон бэлтгэж, сургагч багш нар өөр, өөр орон нутагт очин сургалтыг удирдан явуулж байгаа нь тэднийг улам чадавхижуулахад сайн нөлөөтэй. Өнөөдөр Хан-Уулын дүүргийн ИТХ-ын төлөөлөгчдөд Орхон аймгийн ИТХ-ын дарга, гавъяат хуульч С.Цэгмэд хичээл зааж байна. Түүнчлэн төслийн хүрээнд дараагийн ээлжинд ИТХ-ын эмэгтэй төлөөлөгчдийн манлайллын сургалтыг зохион байгуулахаар төлөвлөөд байгаа ба нийт Монгол Улсын хэмжээнд ИТХ-ын төлөөлөгчөөр сонгогдсон 2200 гаруй эмэгтэй ажиллаж байгаа билээ.
УИХ-ын Тамгын газрын Ерөнхий нарийн бичгийн дарга Б.Болдбаатар сургалтын нээлт дээр үг хэлэхдээ, ИТХ-ын үйл ажиллагааг дэмжих зорилгоор бүх аймаг, дүүргийг холбосон нэгдсэн портал сайт үүсгэн ажлын уялдааг сайжруулах, мөн иргэдэд бодлого шийдвэрийг шуурхай хүргэх улмаар эргэх холбоо үүсгэж, иргэдийг хууль тогтоох үйл явцад оролцоотой байлгах боломжийг нэмэгдүүлэхийн тулд хүмүүсийн өдөр тутмын хэрэглээ болсон ухаалаг утас, хөдөлгөөнт төхөөрөмжүүдийг өргөн ашиглах техник, технологийн ажлууд хийгдсээр байгаа талаар мэдээллээ. Ингэснээр жишээ нь, Хан-Уулын иргэн өөрийн дүүргийн ИТХ-ын шийдвэрийг гар утсаараа татан авч танилцах, онлайнаар саналаа хэлэх боломж удахгүй бий болно хэмээн тайлбарласан юм гэж УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
