Сүүлийн үед гэр бүлийн хүчирхийллийн гэмт хэргүүд нийгэмд мэдээлэгдэх нь нэмэгдэж, энэ хирээр бидэнд хандсан хохирогчдын амь нас, эрүүл мэнд, аюулгүй байдлыг нэн даруй хамгаалах үйлчилгээний ачаалал өсөн нэмэгдэж байна.

Хүчирхийллийн эсрэг үндэсний төвд хандсан хохирогчдын дийлэнх нь хүчирхийлэл үйлдэгчээсээ эдийн засгийн хувьд хараат, төлбөрийн чадваргүй байдаг онцлогийг харгалзан тэд хохирогчдод хууль зүйн зөвлөгөөг үнэ төлбөргүй үзүүлдэг байна.

Харин хохирогч хуулийн байгууллагад хандаж асуудлаа шийдвэрлүүлэх зайлшгүй шаардлага гарахад тэднийг үнэ төлбөргүй өмгөөлөгчөөр хангах зардал, санхүүжилт Хүчирхийллийн эсрэг төвд байдаггүй бөгөөд энэ асуудлыг шийдвэрлүүлэхээр төрийн зохих байгууллагуудад удаа дараа хандсан боловч өнөөгийн хууль, эрх зүйн зохицуулалтын хүрээнд шийдвэрлэх боломжгүй гэсэн хариу өгсөөр ирсэн гэнэ.

Хууль зүйн туслалцаа үзүүлэх зардлыг олох зорилгоор Хүчирхийллийн эсрэг үндэсний төв төрийн болон олон улсын байгууллагуудад төсөл бичих замаар ханддаг ч 2012-2013 онд Хууль зүйн яамнаас бэлгийн хүчирхийллийн 20 хэргийн хохирогчдод эрх зүйн туслалцаа, өмгөөллийн үйлчилгээ үзүүлэх зардлыг санхүүжүүлж байсныг эс тооцвол нааштайгаар шийдвэрлэгдэх нь ховор байдаг байна.

Одоогийн байдлаар тус байгууллагаар үйлчлүүлж байгаа гэр бүлийн болон бэлгийн хүчирхийлэлд өртсөн хүүхэд, эмэгтэйчүүд, ахмад настан зэрэг 10 гаруй хохирогч үнэ төлбөргүй өмгөөлөгчөөр хангаж өгөхийг хүсч байгаа боловч өмгөөллийн зардлын асуудлыг шийдвэрлэж чадахгүй мухардалд ороод байгаа аж.