Хууль зүйн сайд Х.Тэмүүжин, Цагдаагийн Ерөнхий газрын дарга Б.Билэгт нарын дажин түмний нүдэнд ил болсон. Сайдтайгаа арсалддаг цагдаагийн даргыг бид анх удаа л харж байна. Цагдаагийн “вант улсыг” шинэчлэх бодлогыг дэмжинэ, хамтарч ажиллана гэж ирсэн Б.Билэгт харин ч эсрэгээрээ өөрийн хүрээллийг бүрдүүлж хуучин муу арга барилыг нь улам лавшруулж өөртөө ашигтай байдал үүсгэж байгаа гэх шүүмжлэлийг Х.Тэмүүжин сайд ил цагаан зарлаж, Б.Билэгтийн томилгоо алдаа гэж хэлсэн. Түүгээр ч үл барам сайд дээрээ гүйцэтгэх ажиллагаа явуулж байгаа гэж маш ноцтой мэдэгдлийг хийгээд авсан. Түүний дараахнаас хар тамхины хэрэгт холбогдсон нэгэн охин “Х.Тэмүүжинрүү утсаар ярьсан, мессежээр харилцсан, удалгүй суллагдсан” зэрэг бор шувуу хэвлэлийн хуудсаар үзэгдэх болсон. Харин үүнд Х.Тэмүүжин “Хүүхдийн маань халаасанд хар тамхи хийчихээд хүн гүтгэж байж ч мэдэх үл бүтэх нөхдүүд, цаашаа өчнөөн гүтгэлэг дайралт ирнэ” гэсэн утгатай тайлбар хийсэн билээ. Тэдний энэ зөрчил гэнэт үүсчихсэн биш. Нэлээд эртнээс улбаатай бөгөөд Б.Билэгт нь Ерөнхийлөгч Ц.Элбэгдоржтой тун ойрын хүн, МоАХ-ны “партизан” гэдгээр нь хүмүүс маш сайн мэддэг. Салбарын сайдынхаа бодлогыг дэмжихгүй зөрчилдөөд байгаа түүнд Ерөнхийлөгч Ц.Элбэгдорж “Сайдтайгаа ойлголцоод ажилла. Үгүй бол ажлаа өг” гэсэн хатуухан үгийг хэлсэн гэж ойрын эх сурвалжууд нь мэдээллэдэг. Гэвч түүний даалгасан ёсоор Б.Билэгт сайдтайгаа учраа ололгүй харин ч байдлыг улам хурцатгаж, Х.Тэмүүжингийн эсрэг ашиглах баримт, мэдээллийн хойноос хөөцөлдөх болсон гэнэ.Ийнхүү сайдтайгаа учраа олохгүй байгаа түүнийг ажлаас чөлөөлөх нь тодорхой болж хууль зүйн сайд Х.Тэмүүжин түүний асуудлыг Засгийн газар дээр ярина гэдгээ хэвлэлээр мэдэгдсэн. Харин оронд нь хэнийг тавих “хөзрөө” сайд өдий хүртэл дэлгээгүй. Тэгвэл зарим эх сурвалжийн мэдээлж буйгаар ЦЕГ-ын даргын албан тушаалд нэр яригдаж байгаа хамгийн өндөр магадлалтай хоёр хүн байгаа аж.

Хууль зүйн яамны бодлогын хэрэгжилтийг зохицуулах газрын даргаар ажиллаж байсан тэр гэнэт өөрийн хүсэлтээр ажлаа өгч “багш” сайдынхаа зөвлөхөөр ажиллах болсон. 2008 оны долдугаар сарын 01-ний хэргээр Цагдаагийн экс дарга нарыг шүүх ажиллагаанд О.Алтангэрэл өмгөөлөгчөөр оролцсон бол, Х.Тэмүүжин тэдэнд хариуцлага хүлээлгэх тал дээр хатуу байр суурьтай ярилцлага, мэдэгдлүүдийг хийж явсан. Үүнээс тэднийг хоорондоо зөрчилтэй гэж өнгөц ойлгосон хүн олон. Гэвч тэд нэлээд эртнээс сайн харилцаатай бөгөөд О.Алтангэрэл нь өөрийн багш Х.Тэмүүжингийн хууль зүйн салбарын шинэчлэлийн бодлогыг маш идэвхтэй дэмждэг гэдэг. Монголдоо дээгүүрт ордог сайн өмгөөлөгч гэж үнэлэгдэж ирсэн тэрээр шүүхийн ерөнхий зөвлөлийн ёс зүйн хорооны даргаар ажиллаж байсан. Гэвч энэ ажлаа ч мөн хүлээлгэж өгсөн байдаг. Ийнхүү ачаагаа хөнгөлж, сайдынхаа зөвлөхөөр ажиллаж байгаа түүнийг том шинэчлэлийн түчээг атгахад бэлэн байхыг сануулж, бэлтгэл хангуулж эхэлсэн гэх яриа салбарынханы дунд хүчтэй яригдах аж. “Цагдааг цэрэгжсэн цолтой хүн удирдахгүй, иргэний цагдаатай болохын тулд иргэнээр удирдуулна” гэсэн Х.Тэмүүжин сайдын байр суурь ёсоор түүнийг эл албан тушаалд тэнцэх хүн гэж хуулийн салбарынхан нь хүлээн зөвшөөрдөг гэнэ. Гэвч “цагдаагийн шинэчлэлийг цагдаа дотроос хийхгүй бол явахгүй, ямар ч зоригтой, боловсролтой хүн ирсэн хүлээж авахгүй. Тиймээс цагдаа дотор байдаг томоохон фракц бүлэглэлийн хүрээнээс томилгоо хийх ёстой” гэсэн өөр нэгэн өнцгөөс асуудал яригдаж байгааг ч эх сурвалж онцолсон юм.

Баянгол дүүргийн Цагдаагийн хэлтсийн дарга, хурандаа Н.Амарзаяаг хөрөнгө орлогын мэдүүлэгтээ алдаа гаргасан гэдэг үндэслэлээр Б.Билэгт үүрэгт ажлаас нь чөлөөлсөн байдаг. Гэвч шүүхийн шийдвэр гарч түүнийг эргэн ажилд нь авахыг даалгасан билээ. Олон жил хэлтсийн дарга явсан Н.Амарзаяа нь олон таван үггүй, шулуун зантай, цагдаа дотроо нэлээд нэр хүндтэй нэгэн гэдэг. Хуучин сайд Ц.Нямдорж ч түүнийг ихэд үнэлдэг байсан бөгөөд Баянгол дүүргийн цагдаагийн хэлтэс ажлын үзүүлэлтээрээ тогтмол тэргүүлдэг байсан юм байна. Салбарын хурал зөвлөгөөнд түүний үгийг сайд даргагүй анхааралтай сонсдог, товчхондоо л өөрийн хүрээ, нөлөөгөөрөө хүлээн зөвшөөрөгдсөн нэгэн ажээ. Цагдаа дотроос дэмжлэг багатай болсон Х.Тэмүүжинд тусалж, шинэчлэлийн бодлогыг нь дэмжиж хамтарч ажиллах болсон түүнийг О.Алтангэрэлийн оронд хууль зүйн яамны бодлогын хэрэгжилтийг зохицуулах газрын даргаар томилсон нь учиртай.

Өдрөөс өдөрт өөрийн тойрон хүрээлэгчдийг цагдаа дотроо бэлтгэж, сайдтайгаа үзэлцэх болсон Б.Билэгтийг дарахад Н.Амарзаяагийн нөлөө, хийж чадах зүйл их ажээ. Тэр ч бүү хэл цагдаагийн экс дарга нарыг хугацаанаас нь өмнө суллах болсонд ч түүний нөлөө бий гэж үзэх хүмүүс их байна. Учир нь экс дарга нар нь хоригдсон ч тэдний бүрдүүлсэн бүлэглэл, цагдаа дотроо хүчтэй хэвээрээ байгаа гэнэ. Ингээд цагдаагийн нөлөө бүхий дарга нарыг талдаа татаж Н.Амарзаяаг ЦЕГ-ын даргаар томилбол шинэчлэлийн бодлогоо хэрэгжүүлэх хөрс суурь сая нэг бүрдэнэ гэж үзэх хандлага ч салбарынханы дунд их яригдаж болжээ. Тахарын албаны даргад очиж магадгүй гэж нэлээд яригдаж, дараа нь Х.Тэмүүжингийн ойрын шадар хүнээр тодроод байгаа Н.Амарзаяаг ЦЕГ-ын даргаар тавихад хүлээн зөвшөөрөхгүй хүн дотроосоо гарч ирэхгүй сөргөлдөж, сүлбэлдэх явдал гарахгүй гэсэн гаргалгааг ч зарим нэг нь хийж байна.

Ямартай ч энэ бямба гарагийн Засгийн газрын ээлжит хуралдаанаар ЦЕГ-ын даргын томилгооны асуудал яригдана гэдгийг эх сурвалж хэлж байгаа. Харин Х.Тэмүүжин сайд энэ хоёр хөзрийнхөө алийг дэлгэх вэ? Эсвэл бүр тэс өөр “мод” гаргаж тавих уу гэдэг чухам тэр үеэс л тодорхой болох биз ээ.