УИХ-ын нэгдсэн чуулганы хуралдаанаар эдийн засгийг эрчимжүүлэх хөтөлбөрийг хэлэлцэж байна. Засгийн газар эдийн засгийг эрчимжүүлэх чиглэлээр 100 өдөрт 23 чиглэлийн арга хэмжээ авах ёстой гэсэн ч сөрөг хүчний зүгээс хэлэлцэж буй асуудалтай холбогдуулж маш олон зүйлийг шүүмжилж байна. Тухайлбал төмөр зам баригдаагүйгээс эдийн засагт маш том боломж алдсан тухай асуудлыг сөхсөн байна. Харин эдийн засгийн хөгжлийн сайд Н.Батбаяр "Төмөр замын асуудал Засгийн газар дээр шийдэгдсэн, ойрын үед УИХ-д орж ирнэ. Тавантолгой- Гашуунсухайт чиглэлд нарийн тэнхлэгийн төмөр зам барихаар болсон" гэв. Зам тээврийн сайд А.Гансүх "царигийн асуудлаар Засгийн газар шийдвэр гаргаагүй байна" гэж мэдэгдэж байсан. Тэрээр олон жилийн турш тавантолгой-гашуунсухайтын чиглэлд өргөн царигтай төмөр зам барина гэдэг асуудлаар уг төслийг гацаасан гол буруутнуудын нэгээр яригдах болсон.  Тэгвэл эдийн засгийн хөгжлийн сайд Н.Батбаяр уг чиглэлд нарийн царигтай зам барих Засгийн газрын чиглэл гарсныг ийнхүү ил болголоо. Харин төмөр замын сансарын мөрөөдөл тээж, Оросууд ч өөрсдөө ашиггүй гэж үзсэн чиглэлд тэдний газар нутгаар олон мянган км төмөр зам тавина гэж урд чиглэлийн төмөр замын төслийг гацаасан, хувийн хэвшил өөрийнхөө хөрөнгөөр эхлүүлсэн ажлыг нь гацааж улсыг их хэмжээний нөхөн төлбөрийн өрөнд оруулсан хүмүүстэй хариуцлага яригдах уу? гэдэг нь асуулт хэвээрээ үлдэж байна. Ташрамд сонирхуулахад Энержи Ресурс компани төмөр замын төслийг 500 сая долларт багтаан хэрэгжүүлэхээр ажлаа эхлээд байсан ч үүнийг АН-ын Засгийн газар зогсоож нөхөн төлбөрт нь 80 тэрбум төгрөг олгосон  билээ. Цаашлаад төмөр замын төсөлд 900 сая доллар хэрэгцээтэй гэсэн ТЗҮ гарсан бөгөөд Чингэс бондоос 400 сая доллар зарцуулах шийдвэр гарчихаад байгаа билээ.