МХЕГ-аас "Ионсей" эмнэлгийн мэс заслын болон дурангийн үзлэг, оношилгооны тусламж үйлчилгээг өнгөрсөн арванхоёрдугаар сарын 23-ны өдрөөс эхлэн бүр мөсөн хаасан юм.
   
Улмаар  эмнэлгийн зөрчил дутагдлыг бүрэн арилгах хүртэл хугацаагаар үйл ажиллагааг нь түр зогсоохоор шийдвэрлэсэн. Тэгвэл тус эмнэлэг зөрчилөө арилгаж, буцаж хэвийн байдалд орсон эсэхийг МХЕГ-ын холбогдох албаны хүнээс тодруулахад "МХЕГ-ын улсын ахлах байцаагчдын актаар Сүхбаатар дүүргийн нэгдүгээр хороонд байрлах "Ионсей-Найрамдал" эмнэлгийн үйл ажиллагааг 2013 оны 12 дугаар сарын 23-ний өдрөөс эхлэн түр хугацаагаар зогсоосон. Улмаар тус эмнэлгийнхэн актийн хэрэгжилтийг 90.9 хувьтай биелүүлээд, энэ хугацаанд МХЕГ-ын Эрүүл мэндийн хяналтын байцаагчид гүйцэтгэлийн хяналт шалгалтыг удаа дараа явуулж, зөрчил дутагдлыг арилгуулсан. Тиймээс уг эмнэлгийн хүүхдийн өвчний үзлэг, оношлогоо болон сэргээн засах тусламж үйлчилгээний чиглэлээр үйл ажиллагаагаа үргэлжлүүлэх эрхийг нь энэ сарын 21-нээс нээсэн" гэв.

Тэгэхээр "Ионсей" эмнэлэг мэс засал дахин огт хийхгүй болсон гэсэн үг. Учир нь Дурангийн мэс заслын тусламж үйлчилгээний стандарт, удирдамж батлуулах, эмнэлзүйн туршилт явуулах зөвшөөрлийг Эрүүл мэндийн асуудал эрхэлсэн төрийн захиргааны төв байгууллага болон анагаах ухааны ёс зүйн хороонд хандаж аваагүй байсан юм.  Мөн дурангийн багажийг угааж халдваргүйтгэх, ариутгахдаа хэрэглэх арга, аюулгүй ажиллагааны баталгаажсан зааврын дагуу тусдаа өрөөнд угааж, ариутгах шаардлага хангаагүй байсан. Түүнчлэн,  ариутгалын тасаг нь эрүүл ахуй, халдвар хамгааллын шаардлага хангаагүй, эмнэлгийн тоног төхөөрөмжийн шинэчлэл хийгээгүй, хангамж хүрэлцээгүй, орон тооны инженер, техникчгүй, мэс заслын тусламжийг үзүүлэхтэй холбогдуулан мэс засалд бэлтгэсэн байдал, мэс заслын явц, өвчтөнг эрчимт эмчилгээ, мэдээгүйжүүлгийн эмчийн, мэс засалчийн болон хүүхдийн эмчийн хяналтгүй орхисон зэрэг олон зөрчлүүд илэрсэн юм.