Шинэ оны эхэнд дуулгах таатай мэдээ бол Тавантолгойн хөрөнгө оруулагчид тодорхой болсон явдал юм. Хөрөнгө оруулагчдыг тодруулах асуудал гурван жил дамнан яригдсаны эцэст Хятадын Хятадын  төрийн өмчит  “Чайна Шэнхуа Энержи”, Японы “Сумитомо” корпораци болон Монголын “Энержи Ресурс” хамтарсан түншлэлийг тодруулжээ. Тэдэнтэй цаашид хэрхэн хамтарч ажиллахаа Засгийн Газар ирэх даваа гаригт тохиролцох юм байна.

Хөрөнгө оруулагчдаас уул уурхайн салбарт 4 тэрбум доллар орж ирнэ гэсэн урьдчилсан тооцоо байгаа ажээ. Коксжсон нүүрсний чанараараа дэлхийд тэргүүлэгч Тавантолгойн ордыг эргэлтэд оруулсанаар эдийн засагт эерэг нөлөө үзүүлнэ гэж шинжээчид үздэг.

    Ажлын хэсгийн гишүүд “Орд газар Монгол төрийн өмчлөлд байх, Төслийн бүхий л хугацаанд үндэсний компани олонхи байх, бүтээгдэхүүнийг Япон болон бусад зах зээлд борлуулах бололцоотой байх, орон нутгийн хөгжилд хувь нэмэр оруулах болон Монголын уламжлалт соёл иргэншлийг хүндэтгэн хөгжүүлэхэд туслах, байгаль орчинд халгүй байх” зэрэг хэлэлцээрт баримтлах шалгуур баримтлалаа тохирсон аж.

Хөрөнгө оруулагчдын зах зээлийн үнэ цэнийг нь сонирхуулахад, Чайна Шэнхуа Энержи групп нь 60 тэрбум ам.долларын үнэтэй бол Сумитомо корпорацийн зах зээлийн үнэлгээ нь 13 тэрбум ам.доллараар хэмжигдэж  байна. Харин “Энержи ресурс” компани 500 сая ам.доллараар үнэлэгдэж байгаа аж. Бүгд Хөрөнгийн биржид бүртгэлтэй.