Улсын Их Хурлын чуулганы өнөөдрийн /2015.01.09/ үдээс хойших нэгдсэн хуралдаанд Монгол Улсын Ерөнхийлөгч Ц.Элбэгдорж үг хэллээ.

Монгол Улсын Үндсэн хуулийн 33 дугаар зүйлийн 3-т зааснаар Ерөнхийлөгч Улсын Их Хуралд болон ард түмэндээ хандан илгээлт гаргаж, чуулганд өөрийн тааллаар оролцон улс орны дотоод, гадаад байдлын нэн чухал асуудлаар мэдээлж, саналаа оруулах эрхтэй байдаг.

Монгол Улсын Ерөнхийлөгч үгийнхээ эхэнд өнгөрсөн жилийн ажлыг товч дүгнэж хэлэхдээ, “Манай малчид нэгдэл хувьчлагдсанаас хойш мал, сүргийнхээ тоог хоёр нугалж өсгөлөө. Тариаланчид, ногоочид бахдам сайхан амжилт гаргалаа, Сүүлийн 17 жилд байгаагүй арвин ургац хурааж авлаа. Манай улсын худалдааны тэнцэл эерэг гарлаа. Үүнд эдийн засгийн агшилт, хөрөнгө оруулалтын бууралт нөлөөлсөн тал бий. Гэвч бид дотооддоо илүүтэй хийж, бүтээж, үйлдвэрлэж эхэллээ. Эдийн засгийн хямралт байдлыг сөрж, монголдоо хийж бүтээж, үйлдвэрлэж болох юм байна гэсэн итгэл манай иргэд, бизнес эрхлэгчдэд бий болж байна гэлээ. Мөн тэрээр цааш нь хэлэхдээ, эвлүүлэх хэцүү, эвдрэлцэх амархан болохыг бид хангалттай үзлээ. Бүтээх бүр хэцүү, нураах, зогсоох хичнээн хялбар, бас хорлонтой болохыг, түүний горыг амсахаараа нэг болж байна. Шийдэх бүтээх гэсэн нь буруутдаг, бүтээлгэхгүй нураах гэсэн нь зөвтдөг ёрын хандлагыг газар авахуулж болохгүй. Бид бүгд үүнд дүгнэлт хийх ёстой. Учир нь ийм хандлага Монголыг мохоох хандлага. Бид Монголын зовлонг нимгэлэхийн төлөө зүтгэх ёстой болохоос нэмэх ёсгүй. Ялангуяа улс орны хувь заяанд нөлөөлөхүйц шийдвэр гаргах эрхтэй, хариуцлага хүлээсэн, үүрэг хүлээсэн хүмүүс ийм буруу хандлага, явцгүй ёс зүйд донтож, автаж болохгүй. Ийм байдлыг харсан ч хараагүй юм шиг өөгшүүлж болохгүй. Надаас холуур юм гэж хойш суух эрх бидэнд байхгүй. Учир нь ийм байдлаас Монгол Улс хохирдог. Тэр хохирлын төлбөрийг монгол хүн бүр төлдөг юм. Асуудлыг шийдсэний хариуцлага, буруу зөвийг хэзээ ч нэхэж болно.  Харин асуудлыг шийдүүлээгүйн хариуцлагыг яах вэ. Учир нь тэр боломж, цаг хугацаа алдагдсан,байхгүй болсон. Энэ тухай ярих хэрэгтэй. Хариуцлага нэхэх хэрэгтэй. Ингэж чадвал бидний улс бүтээгч, хариуцлагатай улс болно. Бүтээлч, хариуцлагатай чанарыг дэмждэг нийгмийн зөв хандлага бүрэлдэнэ. Бид алдсан цаг хугацаанаасаа, алдсан боломжоосоо сургамж авч байна гэсэн үг” гэлээ.
Улсын Их Хурлын чуулганы нэгдсэн хуралдаанд Монгол Улсын Ерөнхийлөгч үг хэлэхтэй холбогдуулан Засгийн газрын гишүүд, Улсын Их Хурлын харьяа байгууллагын удирдлага, Ерөнхийлөгчийн Тамгын газар, Үндэсний Аюулгүй Байдлын Зөвлөлийн холбогдох ажилтан, зарим агентлагийн дарга нар чуулганы нэгдсэн хуралдаанд оролцлоо.

Монгол Улсын Ерөнхийлөгч Ц.Элбэгдоржийн хэлсэн үгийг open.parliament.mn, parliament.mn цахим сайтад бүрэн эхээр нь удахгүй нийтлэх болно. Чуулганы хуралдаан үргэлжилж байна хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.