УИХ-ын чуулган өнөөдөр 09.00 цагаас хуралдана. Өчигдрийн чуулганаар Нийслэл хотын албан татварын тухай хуулийн төслийг хэлэлцэх эсэх талаар хуралдаж гишүүд хуулийн төсөлтэй холбоотой зарим нэг саналаа хэлж байгаад завсарласан юм.
             Харин өнөөдөр уг хуулийн төслийг үргэлжлүүлэн хэлэлцэнэ. Мөн өчигдөр Монгол Улсын Ерөнхийлөгч Ц.Элбэгдорж өчигдөр чуулган дээр хэлсэн үгэндээ гишүүдийг хариуцлагатай байж чуулгандаа сууж байхыг сануулсан. Үүнтэй холбогдуулан их хурлын дарга З.Энхболд гишүүдэд хандаж өнөөдрийн чуулганд хоцрохгүй байхыг сануулсан юм. Тэрээр "Өглөө 09.00 цагт ирсэн гишүүдийг камераар нэг нэгээр нь харуулж, хоцорч ирсэн гишүүдийг ч бас нэг бүрчлэн камераар харуулж, олон нийтэд үзүүлнэ" гэсэн юм.

Чуулганаар хэлэлцэх асуудлууд:

    Нийслэл хотын албан татварын тухай хуулийн төсөл /Засгийн газар 2014.12.30-ны өдөр өргөн мэдүүлсэн, хэлэлцэх эсэх үргэлжилнэ/
    Хөрөнгийн албан татварын тухай болон холбогдох бусад хуулийн төслүүд /Засгийн газар 2014.12.30-ны өдөр өргөн мэдүүлсэн, хэлэлцэх эсэх/
    Хүний хөгжил сангийн 2015 оны төсвийн тухай хуульд өөрлөлт оруулах тухай хуулийн төслийн хамт өргөн мэдүүлсэн Хүний хөгжил сангаас Монгол Улсын иргэнд 2015 онд хүртээх хишиг, хувийн хэмжээг тогтоох тухай, Засгийн газрын үнэт цаас гаргахыг зөвшөөрөх тухай Монгол Улсын Их Хурлын тогтоолын төслүүд /Засгийн газар 2014.12.30-ны өдөр өргөн мэдүүлсэн, хэлэлцэх эсэх/
    Онцгой албан татварын тухай болон Ашигт малтмалын тухай хуульд өөрчлөлт оруулах тухай хуулийн төслүүд /Засгийн газар 2014.10.15-ны өдөр өргөн мэдүүлсэн, доллараар тогтоосон татварыг төгрөгт шилжүүлэх тухай, хэлэлцэх эсэх/
    Үндсэн хуулийн цэцийн 2014 оны 08 дугаар дүгнэлтийг танилцуулах
    Хуулийн этгээдийн улсын бүртгэлийн тухай /шинэчилсэн найруулга/ болон холбогдох бусад хуулийн төслүүд/Засгийн газар 2014.06.09-ний өдөр өргөн мэдүүлсэн, эцсийн хэлэлцүүлэг/
    Тамхины хяналтын тухай хуульд нэмэлт, өөрчлөлт оруулах тухай хуулийн төсөл /Улсын Их Хурлын гишүүн Д.Эрдэнэбат 2014.06.11-ний өдөр өргөн мэдүүлсэн, утаат тамхи татах цэгийг тодорхойлж, байгуулах тухай, эцсийн хэлэлцүүлэг/
    Хүүхэд харах үйлчилгээний тухай, Аж ахуйн үйл ажиллагааны тусгай зөвшөөрлийн тухай хуульд нэмэлт, өөрчлөлт оруулах тухай хуулийн төслүүд /Монгол Улсын Ерөнхийлөгч 2014.10.31-ний өдөр өргөн мэдүүлсэн, анхны хэлэлцүүлэг/
    Хөгжлийн бодлого, төлөвлөлтийн тухай болон холбогдох бусад хуулийн төслүүд /Засгийн газар 2014.10.01-ний өдөр өргөн мэдүүлсэн, хэлэлцэх эсэх/
    Монгол Улсын Хүний эрхийн Үндэсний Комиссын тухай хуульд нэмэлт, өөрчлөлт оруулах тухай хуулийн төсөл /Улсын Их Хурлын гишүүн С.Дэмбэрэл нарын 23 гишүүн 2014.11.25-ны өдөр өргөн мэдүүлсэн, хэлэлцэх эсэх/
    Барьцаалан зээлдэх журмаар зээл олгох үйл ажиллагааны тухай болон холбогдох бусад хуулийн төслүүд/Улсын Их Хурлын гишүүн Г.Уянга 2014.11.04-ний өдөр өргөн мэдүүлсэн, хэлэлцэх эсэх/