УИХ-ын чуулганы нэгдсэн хуралдаанаар Хөрөнгийн албан татварын тухай хуулийн төслийг хэлэлцэж байгаад завсарлалаа. Хуулийн төслийг дэмжиж байгаа эсэх асуудлаар санал хураах мөчид ирц муу байсан тул үдээс хойшхи хуралдаанаар санал хураахаар боллоо. Уг хуулийн төсөлд дөрвөн төрлийн татвар багтжээ. Тодруулбал, орон сууц, буу, малын хөлийн, автомашины татвар. Орон сууцны татварыг гурав буюу түүнээс дээш байртайд нь ногдуулахаар, татварын хэмжээг аймаг, нийслэлийн ИТХ нь иргэдтэйгээр зөвшилцөж тогтоохоор заажээ.

Бууны татварт одоогийн байдлаар иргэд 4000-6000 төгрөг төлдөг байсан бол шинэ хуулийн төслөөр 50-100 мянган төгрөг болгох санал оруулж ирсэн.

Түүнчлэн шинээр бий болох нийслэлийн татварын хүрээнд бараа, бүтээгдэхүүний худалдан авалтын шат бүрт нэг хувийн татвар тавигдсанаар дөрвөн хувьд хүрэх аж. Тухайлбал, үр тариа борлуулах, үйлдвэрээс талх болоод гарах, хүнсний дэлгүүрт очих гэх мэт шат дамжлага бүрт суутгал тооцогдолгүй тус бүр нэг хувийн татвар авах гэнэ.

Малын хөлийн татварыг тогтоохдоо хонин толгойд шилжүүлж 1000 хүртэлх төгрөгийн татвар ногдуулахаар заасан бол авто машины цилиндрийнх нь багтаамж, мөн харьяалагдах газраас хамааруулж татвар харилцан адилгүй байна. Улаанбаатар хот, Дархан-Уул, Орхон аймгуудад авто машины татвар бусад аймгуудынхаас 20 мянган төгрөгөөр өндөр байх юм.

УИХ-ын гишүүн Д.Сарангэрэл “Засгийн газар хамгийн хялбар арга сонгоод байна. Татвар нэмэхээсээ урьтаад ашиггүй ажиллаж байгаа төрийн өмчит компаниудаа ашигтай ажиллуул. Ажиллаж чадахгүй бол хувьчил” гэсэн бол УИХ-ын гишүүн З.Баянсэлэнгэ “Засгийн газар халамжийг хасч, татвар нэмэгдүүлэхээс өөр зүйл санаачилж чаддаггүй юм уу” гэдэг сөрөг ойлголтыг нийгэмд төрүүлэхээр байна гэсэн юм.

Үдээс хойшхи хуралдаан 14.00 цагаас үргэлжилнэ.