Ерөнхийлөгчийн нэрэмжит цомын төлөөх барилдаанд хоёр дахь удаагаа түрүүлсэн Улсын аварга С.Мөнхбатад үүрд хадгалах цом гардуулав.
           Монголын ард түмэн үндэсний эрх чөлөө, тусгаар тогтнолоо сэргээн мандуулсны 103 жилийн ойд зориулсан Ерөнхийлөгчийн  нэрэмжит цомын төлөөх чансаа өндөр, шигшмэл 128 бөхийн барилдаан өнгөрсөн 2014 оны 12 дугаар сарын 29-нд  болсон. Дөрөв дэх жилдээ болж буй шигшмэл хүчит бөхийн барилдаанд Увс аймгийн Баруунтуруун сумын харьяат "Хилчин" спорт хороо, "Увс нуур" дэвжээ, “Монголросцветмет” нэгдлийн бөх Улсын аварга С.Мөнхбат хоёр дахь удаагаа түрүүлж, Ерөнхийлөгчийн цомыг гардан авсан юм. Тэрээр 2011 онд Үндэсний эрх чөлөө, тусгаар тогтнолоо сэргээн мандуулсны 100 жилийн ойгоор Ерөнхийлөгчийн цомын төлөөх барилдаанд түрүүлж анхны цомоо гардаж байв. Монгол Улсын Ерөнхийлөгчийн нэрэмжит цомын төлөөх барилдаанд хоёр дахь удаагаа түрүүлсэн Улсын аварга С.Мөнхбатад өнөөдөр Ерөнхийлөгчийн Тамгын газрын дарга П.Цагаан үүрд хадгалах цом гардуулав.                     
                    Цом гардуулах үеэр ЕТГ-ын дарга П.Цагаан хэлсэн үгэндээ “Монголчуудад дэлхийг эзэгнэж байсан цаг бий. Мөн хоорондоо эвдрэлцэж, эв түнжин хагарсны балгаар бусдын боол, босгоны зарц болсон гунигтай түүх бий. Тэр гунигтай түүхээс салсан цаг бол 1911 оны цагаагчин гахай жилийн хувьсгал юм. Уг хувьсгалын ойг тэмдэглэдэг болсон үеэс хойших чансаа өндөр, шигшмэл бөхийн барилдаанд хоёр дахь удаагаа түрүүлж түмэн олноо баясгасан Монгол Улсын аварга танд баярлалаа. Улсад дахин түрүүлэхийг ерөөж үүрд хадгалагдах хоёр дахь цомыг гардуулъя” гэлээ.
               Улсын аварга С.Мөнхбатад мөн цомын батламж олгож , Монгол Улсын Ерөнхийлөгчийн санаачилга, ЕТГ-ын дэмжлэгтэйгээр хэвлүүлсэн “Монголын эх түүх” 6 боть номыг дурсгал болгон өгөв.