Өнгөрсөн амралтын өдрүүдэд, Чингэлтэй, Сонгинохайрхан, Дархан-Уул, Баянгол зэрэг дүүргүүдэд АН-ын нөхөн сонгууль явагдаж үүнээс үүдсэн маргаан дэгдсэн билээ. Тодруулбал, дүүргийн АН-ын гишүүдээс төрийн албанд шилжсэн болон шилжилт хөдөлгөөнтэй холбогдуулан нөхөн сонгууль явуулсан юм. Харин энэ нь дүрмийн бус хууль зөрчсөн хэмээн гишүүд үзэж улмаар жагсаал хийсэн.

Тэгвэл уг маргааны гол буруутан нь Ерөнхий нарийн бичгийн даргын үүрэг гүйцэтгэгч Л.Эрхэмбаярыг гэж намын гишүүд нь үзэж байгаа аж. Тиймээс намынхаа үнэт зүйл, эв нэгдлийг бусниулсан гэх Л.Эрхэмбаярыг эсэргүүцэж, АН-ын анхан, дунд шатны гишүүд дэмжигчид жагсаал хийхээр нэгдээд байгаа юм байна.

Тэд энэ талаар “Л.Эрхэмбаяр нь нэг ч удаа сонгуульд ялж үзээгүй, нэг ч удаа  албан тушаалд хариуцлага үүрч үзээгүй мөртлөө өөрийгөө улс төрч гэдэг. Л.Эрхэмбаяр нь АН-ынхаа генсекийн суудалд түр морилох зуураа өөрийг нь улстөрд өнөөг хүртэл хөтөлж явсан намынхаа тогоо руу нулимж эхэллээ” гэв.

Учир нь Л.Эрхэмбаяр амралтын өдрүүдээр Сонгинохайрхан дүүргийн АН-ын хурлыг зарлан хуралдуулахдаа дүрмийн бусаар явуулж, хамаатан садан, танил тал нөхдөө оруулан санал хурааж, өөрийнхөө гар хөл болсон Ш.Одгэрэл, Н.Чинболд нарыг даргаар томилжээ. Тиймээс хууль бусаар томилогдсон дээрх хүмүүсийг эргүүлэн татах ёстой гэж үзэж байгаа аж.

Уг нь Сонгинохайрхан дүүргийн АН-аас Л.Эрхэмбаярт цөөнгүй удаа боломж олгосон. Тэрээр намынхаа нөхдийн итгэлийг хугалж, удаа дараагийн сонгуулиудад өвдөг шороодсон. Гэвч намын нөхдийнхөө дэмжлэгтэйгээр жаахан эрх мэдэл ахих тусам өөрийг нь хамгийн их дэмжиж, тэтгэж явсан журмын нөхөд рүүгээ өс хонзон өвөрлөж,  ийнхүү шороо цацаж эхэллээ. Намын генсекийнхээ албыг хүлээж аваад гуравхан хоногийн дотор өс хонзон өвөрлөн, өмнөх хүслээ гүйцээж байгаа нь Л.Эрхэмбаярыг ямар жижигхэн улстөрч гэдгийг бэлхнээ харуулж байна. Уг нь намын ерөнхий нарийн бичгийн дарга хүн намынхаа эв нэгдэл, хөгжил дэвшлийн төлөө дуугарах байтал захын нэг дүүрэгт зодоон цохион үүсгэж байгаа нь өрөвдөлтэй гэж тус намын зарим гишүүд ярьж байна.