Төсвийн байнгын хорооны өнөөдрийн хуралдаанаар Төсвийн тогтвортой байдлын тухай хуульд нэмэлт, өөрчлөлт оруулах тухай хуулийг төслийг хэлэлцэх  байсан ч МАН-ын бүлэг ажлын тав хоногийн завсарлага авлаа. Уг хуулийн төслийн гол агуулга нь Өрийн хэмжээг нэмэгдүүлж ДНБ-ний 60 хувьд хүргэх тухай юм. Харин байнгын хорооны зарим гишүүд үүнийг эсэргүүцэж саналаа хэлж байлаа. Тэр дундаа МАН-ын бүлгийн гишүүд Төсвийн тогтвортой байдлын хуульд өрийн таазыг 40 хувьд барина гэж заасныг 2018 он  хүртэл үйлчлэхгүй байхаар оруулж ирсэн нь асуудлыг эргэж харахад хүргэлээ. Мөн үйлчлэх хугацааны талаар маргаантай асуудлууд, ойлголтын зөрүү бий болоод байна.

Тиймээс Төсвийн тогтвортой байдлын тухай хуульд нэмэлт, өөрчлөлт оруулах тухай болон Монгол Улсын нэгдсэн төсвийн 2015 оны төсвийн хүрээний мэдэгдэл, 2016-2017 оны төсвийн төсөөллийн тухай хуульд өөрчлөлт оруулах тухай, Төсвийн тухай хуульд нэмэлт оруулах тухай хуулийн төслүүдээр ажлын 5 хоног хүртэл хугацааны завсарлага авч нэгдсэн шийдвэрт хүрсний дараа дахин хэлэлцэх шаардлагатай байгаа тухай мэдэгдсэнээр өнөөдрийн хуралдаан өндөрлөлөө.

Ерөнхий сайд болон Сангийн сайдын хэлснээр  өрийн таазыг 60 хувьд хүргэсэн ч нэмж зээл авахгүй, бонд босгохгүй, Засгийн газрын баталгаа гаргахгүй гэж буй юм.