Төрийн албан хаагчид энэ сараас  цалингаа авч чадахгүй хүндхэн байдалтай байна.  Хэд, хэдхэн байгууллага биш улс даяар бүхий л яам агентлагууд  ажилчдынхаа цалинг өгч чадахгүй байгаа юм.

Эх сурвалжийн хэлж буйгаар энэ сард тэдний цалинг өгч чадахгүй бололтой.

Харин Засгийн болоод УИХ-ын гишүүд төсөв хэлэлцсэний дараа буюу төсөвт тодотгол хийсний дараа  төрийн байгууллагуудын санхүүжилтийг шийдэж өгөхөөр ярьж байгаа гэдгийг эх сурвалжууд мэдээллээд байгаа. 
Гэтэл  Сангийн яамны эх сурвалжийн хэлж буйгаар төсөв хэлэлцээд дууссанч цалин тавих мөнгө байхгүй гэдгийг онцоллоо.

 Ийм л хүнд нөхцөл  байдал манай нийгэмд бий болоод байгаа юм.  Төсвийн байгууллагууд цалингаа тавьж чадахгүй байгаагаас нийгэмд худалдан авалт ч буурч байна.  Хүнсний сүлжээ дэлгүүрүүдээс  эхлээд баар, ресторан, цайны газрууд ч хаалгаа барихад хүрээд байгаа аж. 

 Ер нь Монгол Улс 2000 оноос хойш түүхэндээ  цалингаа тавьж чадахгүй ийм хүнд байдалд орж байгаагүйг учир мэдэх хүмүүс онцолж байна. Нэн ялангуй нэг салбар, нэг төсвийн тодотголтой байгууллага биш бүхэл бүтэн улсаараа цалингаа тавьж чадахгүй байдал сүүлийн 15 жилд тохиож байгаагүй ажээ.

Энд хэн хариуцлага хүлээх ёстой вэ?. Уг нь АН, МАН хоёр хамтарч улс орныхоо нийгэм, эдийн засгийг сайжруулж их зүйл хийхээ мэдэгдэж байсан. Гэвч энэ засгийн үед ийм хүнд болж байгааг юу гэж ойлгох вэ?

Сангийн яамны зүгээс мөнгө байхгүй шалтгаанаа компаниудын татвартай холбон тайлбарлаж байгаа. Бүр тодруулбал, оны эхэнд учир компаниуд татвараа төлөхгүй байна. Мөнгө цугласан ч бага байна. Цаашлаад Өршөөлийн хуульд хамрагдана гээд компаниуд татвараа төлөхгүй болсон.

Өөрөөр хэлбэл, Өршөөлийн хууль батлагдвал татвар төлөөгүй зэрэг компаниуд хариуцлагаас нэг удаадаа мултрах боломжтой болж байгаа. Тиймээс түүнд найдаж татвараа төлөхгүй байгааг Сангийн яамны эх сурвалж хэлээд байгаа юм.

Магадгүй ирэх сар гарахаас өмнө төсвийн байгууллагуудын цалин мөнгөний асуудлыг шийдэж өгөхгүй бол хоёрдугаар сараас жагсаал, цуглаан улам даамжрах нь тодорхой байна.

Саяхан эмнэлгийн салбарынхан хийгээд багш сурган хүмүүжүүлэгчдээс эхлээд жагсаал, цуглаан зохион байгуулсаныг санаж байгаа биз ээ. Тэгвэл энэ байдал ирэх сараас улам ширүүсч мэдэхийг ажиглагчид онцолж эхэллээ.

Монголчуудын уламжлалт баяр болох Цагаан сар дөхөж байгаа энэ үед улс нийгмийн амьдрал их л  эвгүй байдалтай байна. Мөн Шийдлийн Засгийн газар байгуулагдсанаас хойш цалин мөнгөтэй холбоотой жагсаал цуглаан улам хүчээ авч магадгүй байдал үүсээд байгаа юм.