УИХ-ын чуулганы үдээс хойшхи хуралдаан эхэллээ. Хуралдаанаар Төсвийн тогтвортой байдлын тухай хуульд өөрчлөлт оруулах хуулийн төслийн эцсийн хэлэлцүүлгийг хийлээ. Ингээд Улсын өрийн хэмжээг ДНБ-ийн 58.3 хувь болгох эсэх асуудлаар санал хураахад гишүүдийн олонх нь дэмжлээ. Ингэснээр өрийн хэмжээг 58.3 хувиар тогтож байна.

Хэлэлцэж буй асуудалтай холбогдуулан УИХ-ын гишүүд саналаа хэлсэн.  Тухайлбал, УИХ-ын гишүүн Ц.Нямдорж “Харамсалтай зүйл болж байна. Ч.Сайханбилэг Ерөнхий сайд болсон даруйдаа чуулганы индэр дээрээс эхчүүд, хүүхдүүдийн мөнгө болон бусад халамжийг танах тухайгаа мэдэгдэж байсан. Яг энэ дагуу төсвийн тодотгол оруулж ирсэн. Гэтэл Засгийн газрыг бүрдүүлж байгаа нам, эвслүүд Ч.Сайханбилэгийн ярьж байсан бүх асуудлыг унагасан.  Үүнээс үзвэл нам, эвслүүд Засгийн газарт итгэх итгэлгүй болсон байна. АН нэг хэсгийг нь унагаж МАН нөгөө хэсгийг нь хүчингүй болгуулах аргам хэмжээ авсан. Ингээд үндсэн хуулийн агуулгаар Ч.Сайханбилэгийн засгийн газарт итгэж болох уу гэдэг асуудал үүсээд байна. 1991 онд  Д.Бямбасүрэн Ардын их хуралд Татварын асуудал оруулж ирэхэд бүгд унасан. Яг үүнтэй адил Ч.Сайханбилэгийн Төсвийн тодотголд оруулж ирсэн саналыг нэг нь ч дэмжсэнгүй. Одоо яахад ингээд өрийг 58.3 хувьд хүргэсэн хэмжээнд нь дэмжээд явъя. Удахгүй “58.3 хувь биш байсан юм байна” гээд өрийн таазыг  70, 80 хувь болгох санал оруулаад ирэх юм биш биз. Ахиж өр нэмэх санал оруулж ирэхгүй биз. Ийм баталгаа авмаар байна” гэлээ

Харин түүний асуултад Төсвийн байнгын хорооны дарга Ц.Болор хариулахдаа “Шийдлийн ЗГ тодорхой саналуудыг оруулж ирсэн боловч УИХ бүрэн эрхийнхээ хүрээнд тодорхой өөрчлөлтүүдийг хийсэн. Бүгдийг нь дэмжээгүй гэсэн зүйл байхгүй” гэсэн юм.