Нийслэлийн зарим дүүргийн оюутан залуус нэгдэж МАХН-ыг дэмжих хөдөлгөөн бий болгож, тус намын дэргэдэх АШЁМОХ-нд нэгдэж байгаагаа илэрхийллээ. Тэд өнөөдөр хэвлэлийн хурал хийсэн бөгөөд энэ талаар МАХН-ын дэргэдэх Шударга ёсны хувьсгалт Үндэсний нэгдсэн оюутны холбооны тэргүүн Д.Мөнхтөрөөс зарим зүйлийг тодрууллаа.

-МАХН-ыг дэмжих хөдөлгөөний талаар танилцуулахгүй юу?
-Хан-Уул, Баянзүрх, Сүхбаатар, Чингэлтэй дүүргийн оюутны холбоо, зөвлөлийн дарга нар манай холбоонд санал тавьсан. Тэд цаашид МАХН болон манай холбоог дэмжиж ажиллах хүсэлтэй байгаагаа илэрхийлсэн. Тиймээс бид хүсэлтийг нь хүлээн авч хөдөлгөөн байгуулж байгаагаа өнөөдөр олон нийтэд мэдээллээ.

-Хөдөлгөөний цаашдын зорилго юу вэ?
-Хөдөлгөөн нь нийгэмд шударга ёсыг түгээн дэлгэрүүлэхийг зорьж ажиллаж байгаа МАХН-ын үзэл бодол, үйл хэргийг дэмжиж ажиллах зорилготой. Зорилгодоо нэгдсэн олон залуучууд дээрх дүүргүүдийн оюутны холбоо болон зөвлөлүүдийн дарга нараа дагаж гишүүн болон ирж байгааг хэлэхэд таатай байна.

-Хэдэн хүн гишүүнээр элсэж байгаа вэ?
-Ирэх долоо хоногт 150 гаруй хүн МАХН-д гишүүнээр элсэн батлахаа гардан авахаар боллоо.

-МОХ оюутнуудад олгодог 70200 төгрөгөөс татгалзах шийдвэрийг гаргаж байсан. Танай холбоо энэ тал дээр ямар байр суурьтай байгаа вэ?
-Өнгөрсөн долоо хоногт МОХ хэвлэлийн хурал хийж оюутны 70200 төгрөгөөс татгалзаж байгаагаа илэрхийлсэн. Манай холбоо үүний эсрэг байр суурьтай байгаа. Нэгдүгээрт, МОХ-ын энэ байр суурь нь эдийн засгийн хямралаар далимдуулж Ерөнхий сайд Ч.Сайханбилэгт таалагдах гэсэн явуургүй  санаа гэж үзэж байна. Хоёрдугаарт,  энэ асуудлыг шийдэхийн тулд эхлээд оюутнуудын дунд санал асуулга явуулах ёстой байсан. Хэн нэгэн тэдний өмнөөс шийдвэр гаргах нь буруу. Монголын нийт оюутнуудын төлөөлөл, дуу хоолой, эрх ашгийг нь хамгаалах цорын ганц холбоо нь МОХ. Гэтэл өөрсдийнхөө эрх ашигт нийцүүлэн өмнөөс нь шийдвэр гаргаж байгаа нь хууль бус. Тиймээс манай холбоо бүх оюутнуудад мөнгийг өгөх ёстой гэсэн байр суурьтай байгаа. Ерөнхийлөгч Ц.Элбэгдорж амалсан. Тиймээс амлалтаа замын дундаас цуцлах ёсгүй. Эдийн засгийн хямралаас гарахын тулд жирийн иргэд, оюутан залуусаас таналт хийх нь зөв шийдэл биш.