Монголчууд бид аливаа зүйлийн голыг олоод хэлчихсэн байдаг адтай улс юм. Халуун намраас хойш үргэлжилсэн улс төрийн үйл явц өнгөрсөн оны сүүлээр Засгийн газрыг унагаж дууссан. “Нураах” болсон шалтгаан нь товч тодорхой. Нэгдүгээрт эдийн засгийг хямралд оруулсан. Хоёрдугаарт улс орныг түүхэнд байгаагүй хэмжэний өрөнд оруулсан. Гуравдугаарт төрийн албыг данхайлгасан. Адаг сүүлд нь хууль бус улс төрийн томилгоо хийсэн. Ердөө эдгээр хэдэн шалтгаан л Н.Алтанхуягаар толгойлуулсан “Шинэчлэлийн” гэх тодотголтой засгийг “хүзүүг ороосон”.
                    Ардчилсан намаас шинэ Ерөнхий сайд гарч ирээд “Бүх намуудтай хамтарч ажиллана. Улс орон маань үнэхээр хямралд орчихсон байна шүү дээ. Төрийн албаны бүтцийг багасах цаг болов. Эдийн засгийг сайжруулахын тулд өр нэмж авахгүй” гээд л ярьсан. Энэ бүх амлалтууд эргэлзээтэй байсан ч Монгол хүн бүр итгэхийг хүссэн. Тийм ч учраас Ч.Сайханбилэг Ерөнхий сайдыг хэрхэн ажиллахыг харж байлаа. Гэвч Ерөнхий сайд маань сайд дарга нарынхаа томилгоог хийхээсээ авахуулаад л үнэн царайгаа харуулж эхлэв. Хямралаас гарахын тулд Төрийн албан хаагчдын 15 хувийг цомхтгох шийдвэр гаргах гэж буйгаа УИХ-ын өндөр индэр дээрээс сонордуулсан. Харин тэрээр жирийн албан хаагчдыг халаад, сайд дарга нарын тоог нэмж “бялуу хуваах” үйл явцаа шившигтэйгээр харуулсан юм. Түүний хийсэн томилгооноос хамгийн инээдтэй нь дэд сайдуудын томилгоо.
                  Засгийн газрын хурлаар 15 яаманд нийт 17 дэд сайдыг томилж, Боловсрол, соёл шинжлэх ухааны  яаманд хоёр дэд сайд, Эрүүл мэнд, спортын яамыг мөн хоёр дэд сайдтай болгов. Оноогдсон эрхийнхээ дагуу МАН-ынхан хотын гэдэг фракцидаа түлхүү анхаарсан бол Ардчилсан намынхан хуучин дэдүүддээ итгэл хүлээлгэсэн юм. МАХН гурав, ИЗНН нэг гэсэн зарчмаар дэд сайдуудаа зөөлөн суудалд нь "заллаа".
                Нэг яаманд хоёр дэд сайд, “цүнх барьсан” Монгол Улсын сайд гэх мэтээр нэмэлт урд нь хэзээ ч байгаагүй албан тушаалыг бий болгож түүндээ эрх мэдэлтэнгүүдийг толгой дараалан томилж орхив. Эдийн засгийн хямралтай байдлаас болж иргэд цаана чинь хоногийн хоол, хоёр зүсэм талхны ч мөнгөгүй байна. Гэтэл тэнд ямар нэгэн намыг гомдоохгүй тулд хэрэгтэй, хэрэггүй сандал ширээ урлан байж “бялуу” хуваах юм.
                 Энэ талаар чуулган дээр маш олон гишүүн шүүмжилсэн ч Ерөнхий сайд “цээжээрээ” хамгаалсаар өдийг хүрлээ. Өчигдөр дэд сайдуудыг цөөлж болох хамгийн сүүлийн найдвар байнгын хорооны хурал дээр үгүй болов. Нэр бүх гишүүдээс дэд сайдыг цөөлөх асуудлыг авч хэлэлцэх нь зүйтэй гэсэн ч олонхоороо уг саналыг хэлэлцэхгүй гэж шийдчихлээ. Чуулганаар үргэлжлүүлэн хэлэлцээд дэд сайдуудыг ганцхан хүний саналаар чөлөөлөх болсон. Гэвч өнөөдөр өглөө Төрийн байгуулалтын байнгын хороо хуралдаж хууль зөрчих тул чуулганаар хэлэлцэх асуудлаас хасах нь зүйтэй гэж шийдвэрлэв. Харамсалтай байна Ерөнхий сайдаа. Нэдэр дээр дороо ажиллаж байгаа хүмүүсээ ч бүрэн танихгүй, ажлаа мэддэггүй энэ олон дэд сайд нар ямар ч хэрэггүй шүү дээ. Нарийн ярьвал дэд сайд гэдэг зүйлийн оронд Төрийн нарийн гэдэг л албан тушаал байхад болно. Ямар ч эрх мэдэлгүй. Сандал ширээний бөглөөс дэд сайдуудаа цомхтгоод өгөөч. Түүнийхээ оронд цалингааc цалингийн хооронд бор хоног шар нарыг туулж яваа жирийн төрийн албан хаагчийг ажилд нь үлдээгээд өгөөч. Ялангуяа нэг газарт хоёр, гурваар нь томилсон дэдээ цөөрүүлэх хэрэгтэй. Зуун ямаанд 60 ухна хэрэгтэй байдаг юм уу.