УИХ-ын чуулганы нэгдсэн хуралдаанаар Засгийн газрын тухай хуулийн төслийг хэлэлцэж дэд сайд нарыг албан тушаалд нь хэвээр үлдээв.

Хэлэлцэж буй асуудалтай холбогдуулан УИХ-ын гишүүн О.Баасанхүү “Дэд сайд нарыг цомхотгосон нөхцөлд хэдэн төгрөг хэмнэх боломжтой. Төсөв хэлэлцэх явцад гүйцэтгэх засаглалын хэвийн үйл ажиллагаанд нөлөөлөх шийдвэрийг гаргасан нь УИХ-ын Төрийн байгуулалтын байнгын хороотой холбоотой биш үү” гэлээ.

УИХ-ын Төрийн байгуулалтын байнгын хорооны дарга А.Бакей “Дэд сайдын нэг жилийн зардал 34.7 сая, 17 сайдынх 590 сая төгрөг болно. Байнгын хороогоор асуудлыг хэлэлцэх үед гишүүд “Засгийн газраа шинээр бүрдүүлээд ажил эхэлж байтал төсөв хэлэлцэх явцад гэнэт санал оруулж ирээд гүйцэтгэх засаглалын хэвийн үйл ажиллагаанд нөлөөлөх нь хэр зохистой вэ” гэдэг асуудлыг хөндсөн. Санал нь өөрөө хоёр хэсэгтэй байсан” гэсэн гэлээ.

Мөн УИХ-ын гишүүн Л.Цог буцаах боломжгүй болсон 2015 оны төсвийн хуулийн хоёрдугаар хэлэлцүүлгийн үеэр дэд сайд нарын төсвийг хассан. Одоо түүнийг буцаах боломжгүй. Тиймээс дэд сайд нарыг чөлөөлье гэдгээр саналаа хураагаад, шаардлагатай гэж үзвэл дэд сайд нарыг дахин УИХ-д оруулж болох юм гэв.

Ингээд УИХ-ын гишүүн С.Ганбаатар нарын дэд сайд нарыг чөлөөлье гэсэн саналыг дэмжих боломжгүй гэдгээр санал хураалгаж, гишүүдийн 60 гаруй хувийн саналаар баталлаа. Харин УИХ-ын гишүүн С.Ганбаатар үүнд эгдүүцэн А.Бакейг Үндсэн хуулийн цэцэд өгнө. Цэц дээр уулзъя гэсэн юм.

Харин А.Бакей “Би бол хууль зөрчөөгүй, хуулийн дагуу явж байгаа. Хуулиа уншаагүй байж хүн рүү дайрч болохгүй, цэцэд очиж болно. Бид ч очиж болно, сонгогчдод таалагдах гэж телевизийн өмнө өөрийнхөө мэдэхгүй хуулиар тайлбар хийх нь буруу шүү” гэв.