Өнгөрсөн долоо хоног Монгол улс бүхлээрээ төсвийн тодотголоор амьсгалсан өдрүүд байлаа. Тодруулбал өнгөрсөн баасан гарагийн орой УИХ-ын чуулган цаг сунгаж Монгол Улсын 2015 оны төсвийн тухай хуульд нэмэлт, өөрчлөлт оруулах тухай хуулийг хэлэлцэж баталлаа. Цалин тэтгэвэр, нийгмийн халамжаас авахуулаад нийгэмд нэлээдгүй хүлээлт үүсгэсэн хууль ямар ч байсан нэг мөр болов. Мөн төсвийн тодотголтой хамт өргөн мэдүүлэгдсэн 2015 оны Нийгмийн даатгалын сангийн тухай хуульд өөрчлөлт оруулах тухай хуулийн төслийг ч бас олонхоороо баталсан юм. Эдгээр хуулиуд нь өнөөдрөөс хүчин төгөлдөр мөрдөгдөж эхлээд байна.

1.    2015 онд Монгол Улсын нэгдсэн төсвийн нийт орлого 6 их наяд 632 тэрбум 600 сая төгрөг буюу дотоодын нийт бүтээгдэхүүний 27.6 хувь байна.
2.    Нэгдсэн төсвийн нийт зардал 7 их наяд 837 тэрбум 400 сая төгрөг буюу дотоодын нийт бүтээгдэхүүний 32.7 хувь болохоор байна.
3.    Нэгдсэн төсвийн нийт алдагдал 1 их наяд 204 тэрбум 800 сая төгрөг буюу дотоодын нийт бүтээгдэхүүний 5 хувьтай тэнцэхээр байна.
4.    Монгол Улсын нэгдсэн төсвийн орлого талд автобензин, дизелийн түлшний онцгой албан татварыг 228 тэрбум төгрөгөөр нэмэгдүүлэв.
5.    Төсвийн тодотголын хоёр дахь хэлэлцүүлгийн үеэр 17 дэд сайд золтой л ажилгүй болчихоогүй. Учир нь УИХ-ын гишүүн С.Ганбаатарын санаачилыг хэдийгээр байнгын хороо дэмжээгүй ч чуулганаар дэмжсэн.
6.    Чуулганы хуралдаанаар төсвийн тодотголыг тусгай дэгээр хэлэлцэх ёстой учраас дэд сайд нарын асуудлыг Төрийн байгуулалтын байнгын хорооны ээлжит бус хурлыг хуралдуулан байж авч үлдсэн.
7.    Төсвийн тодотгоыг хэлэлцэх үеэр нэлээдгүй маргаан гарч байлаа. Жишээлбэл А.Бакейг үндсэн хуулийн цэцэд өгөхөө УИХ-ын гишүүн С.Ганбаатар мэдэгдсэн. Тэрээр А.Бакейг хууль зөрчсөн гэж үзэж байгаа.
8.    Төсвийн тогтвортой байдлын тухай хуулийг баталж, өрийн дээд хязгаарыг ДНБ-ний 58.3 хувиас хэтрүүлэхгүй байхаар шийдвэрлэлээ.
9.    Өрийн хэмжээг 58.3 хувиар баталсан нь хууль зөрчсөн үйлдэл гэж учир мэдэх зарим хүмүүс хэлж байна. Хуулиараа өрийн дээд хязгаарыг ДНБ-ний 40 хувиас хэтрүүлэхгүй байхаар заасан байдаг.
10.    Төсвийн тодотголоор хамгийн чухал нь орлогыг нэмэгдүүлэх байсан. Тиймээс Эрдэнэт үйлдвэрээс энэ жил авах ногдол ашгаа 30 сая төгрөгөөр нэмэгдүүлнэ.
11.    Монгол улсын төсвийн тухай хуулиндаа төсвийн алдагдлыг хоёр хувиас хэтрүүлэхгүй байх ёстой хэмээн заасан боловч энэ удаагийн төсвийн тодотгол таван хувиар тогтоолоо.
12.    Аж ахуйн нэгжийн орлогын албан татварын орлогыг 60 тэрбумаар нэмсэн.
13.    Өмч хувьчлалын орлогыг 17.9 тэрбумаар өсгөв.
14.    Хувь хүний орлогын албан татварын орлогыг 7.3 тэрбум төгрөгөөр нэмэгдүүлэв.
15.    Улсын төсвийн урсгал зардалд “Алдарт эх”-ийн одонтой эхэд олгох тэтгэмжийг одоо хүчин төгөлдөр мөрдөгдөж буй хуулийн дагуу бүх одонтой эхчүүдэд олгохоор тооцон 19.4 тэрбум төгрөг төсөвлөв.
16.    Нийгмийн халамжийн сангаас олгох жирэмсэн болон нярай, хөхүүл хүүхэдтэй хийн тэтгэмжийг Нийгмийн даатгалын сангаас тэтгэмж авдаг эсэхээс үл хамааран бүх эхчүүдэд олгохтой холбогдуулан орон нутгийн нийгмийн халамжийн сангийн зардалд 9.1 тэрбум төгрөг тусгав.
17.    Нийгмийн даатгалын сангаас олгох тэтгэврийг нэмэгдүүлж байгаатай холбоотойгоор Нийгмийн даатгалын санд улсаас олгох татаасыг 13 тэрбум төгрөгөөр нэмэгдүүлж тооцжээ.
18.    Улсын төсвийн урсгал зардлыг улстөрийн албан тушаалтнуудын бичиг хэрэг, тээвэр шатахуун, шуудан холбоо, ном хэвлэл, гадаад, дотоод албан томилолт, тойрогт ажиллах, зочин төлөөлөгч хүлээн авах, мэдээлэл сурталчилгааны болон мөрийн хөтөлбөрт туссан арга хэмжээний зардлыг 5 хувиар буюу 467.2 сая төгрөгөөр бууруулсан.
19.    Хөрөнгө оруулалтын зардалд 35,473.1 сая төгрөгийн төсөл, арга хэмжээг нэмж, 68,161.5 сая төгрөгийн төсөл, арга хэмжээг төслөөс хассан байна.
20.   Эрүүл мэндийн сайдад хамгийн бага багц буюу 6.2 тэрбум төгрөгийг төсвийн тодотголоор тусгасан. Энэ нь хогны ногоон уутанд төсөвлөсөн мөнгөнөөс ч бага юм. Хогны ногоон уутанд жилд 6.7 тэрбум төгрөгийг төсөвлөдөг.
21.    Монгол Улсын 2015 оны төсвийн тухай хуульд нэмэлт, өөрчлөлт оруулах тухай хуулийн төслийг бүхэлд нь батлахыг чуулганы нэгдсэн хуралдаанд оролцсон 45 гишүүний 41 нь буюу 91.1 хувь нь дэмжсэн.
22.   Төсвийн тодотголоор Сангийн сайдын багц хамгийн их нь буюу 3.7 их наяд төгрөгийн 2015 онд зарцуулна.
23.     2015 онд нийт 1600 төрийн албан хаагчдыг чөлөөлнө.
24.    Улсын өрийн хэмжээг шатлан бууруулна. Тодруулбал 2014 оны гүйцэтгэлээр ДНБ 55 хувь байгаа бөгөөд 2018 онд хуулинд заасан хэмжээ болох 40 хувьд хүргэнэ гэсэн тооцоог Засгийн газар гаргасан. Харин гишүүд Засгийн газрыг хэд хоногийн дараа өр нэмэхгүй бол болохгүй нь гэсэн зүйл ярихгүй байхыг хатуу сануулсан.