Гарч ирсэн цагаасаа л эхлэн энэ ч болохгүй, тэр ч бүтэхгүй байна гэсэн зүйлийг ярьсаар өнөөдрийг хүрсэн Ерөнхий сайд эдийн засгийг хэвтрээс гаргах хөг нь өнгөрөв бололтой. Түүний хэрэгжүүлж буй хэрэгжүүлэхээр зэхэж буй арга бүр нь буруудаад, буруутгагдаад байна. Ард түмний эсэргүүцэлтэй тулгараад байх юм. Уг нь эхэндээ түүнд монголчууд ихээхэн горьдлог тавьж суусан ч их санасан газар есөн шөнө хоосон хонов бололтой. Эдийн засгаа тэнхэрүүлэхийн тулд хэмнэлтийн горимд шилжиж халамжийн гэх хэдхэн төгрөгийг хасна гэж хэлчихээд харийн нэгэн компаниас зөвлөгөө авахын тулд улсын төсвөөс 17 тэрбумыг зарцуулах гэж байна.
                  Тэгвэл тэрээр дахин нэг хачирхалтай гэмээр алхам хийжээ. Тодруулбал энэ долоо хоногийн даваа гарагт Ерөнхий сайд Ч.Сайханбилэг ОУВС-д “Манайд ирж ажиллаач” гэдэг хүсэлтийг явуулсан байна. ОУВС гэдэг бол нэг ёсондоо өрнөдийн өндөр хөгжилтэй капиталист орнуудын үүсгэн байгуулсан эдийн засгийн маш хүчирхэг "аюулт зэвсэг". Тус байгууллагыг үндэстэн дамнасан томоохон компаниудын хөрөнгө оруулалтаар ажилладаг гэдгийг бараг захын нэг "хашааны банхар" ч мэднэ. Дэлхий нийт ч энэ тухай ярьж, бичсээр өдийг хүрлээ.ОУВС-г урьсан ганц зорилго нь сүүлийн үед ихээхэн яригдаж буй буй их хэмжээний валютыг бага хүүтэйгээр зээлж, Стандбай хөтөлбөрт нь хамрагдах явдал юм. Энэ хөтөлбөрийг эдийн засгийн нарийн мэргэжилтэнгүүдээс авахуулаад эдийн засгаар нэгдүгээр курсын оюутнууд хүртэл хортой гэж хэлдэг. Угаасаа ч хортой хөтөлбөр. Стандбай хөтөлбөрийг ОУВС-гаас манайх шиг улс орон нь өрөнд баригдсан, улстөрчид нь хувиа бодсон, иргэд нь ядууралд автсан улс орнуудад өгдөг. Тэд стандбай хөтөлбөрөө ерөнхий хоёр хэсэгт хуваадаг. Эхнийх нь улс орон нь дампуурсан орнуудад өгдөг бол нөгөөдөхийг нь манайх шиг байгалийн баялагтай, эдийн засаг нь уналтад орсон улсад өгдөг юм. Ер нь бодлогоор эдийн засгийг нь дампууруулж байгаад өөрсдийн ноёрхолоо тогтоодог ч гэж сонсогддог.
                  Стандбай хөтөлбөрийг авахад ОУВС-гаас маш тодорхой болзолуудыг тавьдаг.  Зээлийн авахын тулд бид төсөв, мөнгөний бодлогоо ОУВС-ийн зөвлөснөөр өөрчилж, шууд гадны хараат байдлаар асуудлыг шийдэж эхэлнэ. Жишээлбэл иргэдэд өгч буй бүх нийгмийн халамжийг бууруулах болон бүр мөсөн зогсоох. Үүнд нөгөө хүүхдийн мөнгө, одонтой ээжүүдийн мөнгө, тариа буудай, ноос ноолуурын урамшуулал гэх мэт халамжийн бодлогууд орно. Дараа нь гадаадын хөрөнгө оруулагчдад хандсан маш уян хатан, нээлттэй бодлого барихыг үүрэг болгоно. Энэ бол нөгөө л газрын доорх баялаг руу шунахай сувдаг сэтгэлтэй гадны хар сэтгэлтнүүдийг вагон, вагоноор нь оруулах далд санаархал. Энэ хамгийн аюултай шахалт юм. Мөн төрийн өмчийн бүхий л онцгой обьект, барилга байгууламж, дэд бүтцийн чухал салбаруудийг ч хүртэл хувьчлахыг шаарддаг. Энэ заалтын цаана үндэстэн дамнасан томоохон компаниудын мөнгөтэй эрхмүүд нөлөөллөө тогтоож эхэлдэг. Тэдэнд өгөхгүй гэх арга байдаггүй аж. Манайх уг хөтөлбөрт урд нь хэд хэдэн удаа хамрагдаж байсан бөгөөд хамгийн сүүлд 2009 онд хамрагдаж байлаа. Харин өнөөдөр дахин хамрагдах гэж байна. Ер нь ч дэлхийн төвшинд гарч ирэх хөгжингүй орон гэж өөрсдийгөө тодорхойлж онгирч явдаг манай улс хэдхэн жилийн дараа ОУВС-гаас дахин тусламж хүснэ гэдэг гутамшиг. Ерөнхий сайд МҮОНРТ-ийн "Цаг үе-Үзэл бодол" нэвтрүүлэгт оролцохдоо "Бидэнд хоёр зам байна. Эхнийх нь Тавантолгой, Оюутолгой гэсэн томоохон ордуудыг эргэлтэд оруулах. Нөгөө зам нь халамжийн гэх тодотголтой бүх мөнгийг хасж хэмнэлтийн горимд шилжих" гэж хэлсэн. Энэ хоёр замын алийг сонгохыг иргэдээсээ асуухаа ч мэдэгдсэн. Гэхдээ бид саналаа өгсөн ч, өгөөгүй ч ялгаагүй нэгэнт шийдвэр нь гарсан бололтой. 2009 оны гуравдугаар сард хамрагдаж байсан үеийн үзүүлэлтүүдийг үзэхэд инфляци 30, ажилгүйдэл 80 мянга, ядуурал 38-45 хувьтай байсан гэх зэрэг тоонууд гарч ирнэ. Ер нь бол амьдрал нь тартагтаа тулсан Африкийн болон баялгын хараал гэдэгт өртсөн латин америкийн хэдэн орон л энэ хөтөлбөрт “нугасгүй”. Ерөнхий сайдад маань буруу л хүмүүс зөвлөөд байгаа юм болов уу даа.