Чуулганы үдээс хойших нэгдсэн хуралдаанаар Хууль тогтоомжийн төсөл боловсруулах, өргөн мэдүүлэх, хууль тогтоомжийг хэрэгжүүлэх журмын тухай /шинэчилсэн найруулга/ болон холбогдох бусад хуулийн төслүүдийг хэлэлцэх эсэх асуудлыг хэлэлцлээ. /Засгийн газар 2015.01.23-ны өдөр өргөн мэдүүлсэн/ Хууль санаачлагчийн илтгэлийг Хууль зүйн сайд Д.Дорлигжав, Хууль зүйн байнгын хорооны санал, дүгнэлтийг Улсын Их Хурлын гишүүн Л.Болд тус тус танилцуулав.
Монгол Улсын Их Хурлын 2012 оны 37 дугаар тогтоолоор баталсан “Монгол Улсын Засгийн газрын 2012-2016 оны үйл ажиллагааны хөтөлбөр”-ийн Эрх чөлөөтэй Монгол хүн гэсэн тавдугаар бүлэгт “Хуулийн тухай хуулийг батлуулж, хуулийн хэрэгцээ шаардлага, хэрэгжилтийг үнэлдэг болох” гэж заасныг хэрэгжүүлэх зорилгоор Хууль тогтоомжийн төсөл боловсруулах, өргөн мэдүүлэх, хууль тогтоомжийг хэрэгжүүлэх журмын тухай хуулийн төслийг боловсруулсан байна.
Хуулийн төсөлд хууль, Улсын Их Хурлын бусад шийдвэрийг санаачлах, тэдгээрийн төсөл боловсруулах, магадлан шалгах, хэлэлцүүлэх, Улсын Их Хуралд өргөн мэдүүлэх, батлагдсан хууль тогтоомжийг хэвлэн нийтлэх, мэдээлэх, хэрэгжилтийг зохион байгуулах, хяналт шинжилгээ, үнэлгээ хийхтэй холбогдсон харилцааг зохицуулахаар тусгасан бөгөөд хууль батлагдсанаар хууль тогтоомжийн төслийн боловсруулалт, хууль тогтоомжийн чанар сайжрах, хууль тогтоомж хэрэгжих нөхцлийг бүрдүүлэх зэрэгт эерэг нөлөө үзүүлэх чухал ач холбогдолтой гэж хууль санаачлагч үзэж байгаа юм.
Хууль санаачлагчийн илтгэл болон байнгын хорооны санал, дүгнэлттэй холбогдуулан гишүүд хуулийн төслийн тодорхой зүйл, заалтын зохицуулалтын талаар асуулт асууж, санал хэллээ.
Мөн хэлэлцүүлгийн шатанд хуулийн төслийг дэмжиж буйгаа илэрхийлж Улсын Их Хурлын гишүүн М.Батчимэг, Н.Энхболд, Л.Болд үг хэлсэн бол хуулийн төслийг дэмжих боломжгүй гэсэн байр суурьтай гишүүн гараагүй юм. Гишүүдийн зүгээс энэ хуулийг гаргах цаг нь болсон гэдгийг тодотгож, хуулийн төслийг хэлэлцүүлгийн шатанд улам сайжруулж, чамбайруулах шаардлагатай гэдэгт санал нэгтэй байлаа. Ингээд байнгын хорооны саналаар хуулийн төслүүдийг хэлэлцэх нь зүйтэй гэсэн саналын томьёоллоор санал хураалт явуулсныг 89,3 хувийн саналаар дэмжсэн тул хуулийн төслүүдийг анхны хэлэлцүүлэгт бэлтгүүлэхээр Хууль зүйн байнгын хороонд шилжүүлэв. Чуулганы хуралдаан цаг сунган үргэлжилж байна хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.